បច្ចុប្បន្នភាពកម្ពុជា

លោក ស៊ុន ចាន់ថុល ពន្យល់អំពីរឿងរថយន្តដឹកទូកុងតឺន័រវែងដែលមហាជនកំពុងមានចម្ងល់ ហើយអះអាងថា មន្ត្រីជំនាញមិនល្ងង់ដល់ទៅកាត់ទូកុងតឺន័រដែលជាខ្នាតអន្តរជាតិនោះទេ

FN ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានចេញមកអះអាងថា មន្ត្រីជំនាញរបស់លោក មិនបានកាត់ទូកុងតឺន័រនោះទេ ពោលគ្រាន់តែវាស់វែង និងគូស ដើម្បីកត់សម្គាល់ថា ពីការលើសរបស់ទូកុងតឺន័រតែប៉ុណ្ណោះ។ លោករដ្ឋមន្ត្រីអះអាងថា ទូកុងតឺន័រមិនលើសនោះទេ អ្វីដែលលើសគឺក្រុមហ៊ុនដឹកជញ្ជូនមួយចំនួន បានយករថយន្តក្បាលវែងយកមកអូស ឬដឹកទូកុងតឺន័រទាំងនេះ ទើបធ្វើឲ្យមានការលើសប្រវែង ដែលខុសនឹងច្បាប់ចរាចរណ៍នៅកម្ពុជា តែបើប្រើក្បាលដឹក និងអូសខ្លីមិនមានបញ្ហាចោទនោះឡើយ។

ការចេញមកពន្យល់របស់លោករដ្ឋមន្ត្រី បានធ្វើឡើងបន្ទាប់ពីមានការប្រតិកម្មពីក្រុមហ៊ុនដឹកជញ្ជូនមួយចំនួន បានកាត់ទូកុងតឹន័រ។ លោក ចាន់ថុល ថា មន្ត្រីរបស់ក្រសួងមិនល្ងង់ដល់ថ្នាក់កាត់ទូកុងតឺន័រនោះទេ បើកាត់ទូកុងតឺន័រមិនមានអ្វីធ្វើគន្លឹះទាក់ជាមួយតួរថយន្តសណ្តោងនោះឡើយ។

លោក ស៊ុន ចាន់ថុល បានបញ្ជាក់ជាមួយអង្គភាពព័ត៌មាន Fresh News នៅព្រឹកថ្ងៃទី១៤ ខែកុម្ភៈ ឆ្នាំ២០១៨ យ៉ាងដូច្នេះថា «យើងមិនកាត់កុងតឺន័រទេ យើងបានវាស់ពីក្បាលខាងមុខ ទៅខាងក្រោយ ហើយក៏គូសគំនូសបញ្ជាក់ថា កុងតឺន័រហ្នឹងទាំងក្បាលទាំងអីទៅវាលើស១៦ម៉ែត្រ។ សូមជម្រាបថា ក្នុងច្បាប់យើងឲ្យ១៦ម៉ែត្រ ហើយខ្នាតអន្តរជាតិ ប្រទេសណា ដែលមានផ្លូវពីរគន្លង គឺគេឲ្យ ១៦ម៉ែត្រកន្លះ កុងតឺន័រ ៤៥នេះ បានដែរប្រសិនណាយើងយកក្បាលខ្លី ដឹកបានវាស់ទៅ វាជិត១៦ម៉ែត្រ ឬលើសបន្តិចបន្តួចក៏យើងអនុញ្ញាតដែរ។ ប៉ុន្តែផ្នែកឯកជនមួយចំនួននៅតែមានៈ គាត់យកក្បាលវែងរបស់អាមេរិកមកអូស មកដឹក ដល់ដឹកទៅវាលើសដល់ ១៨ម៉ែត្រខុសខ្នាតអន្តរជាតិចំពោះផ្លូវពីរគន្លងផង ធ្វើឲ្យកកស្ទះចរាចរណ៍ផង និងខុសច្បាប់ចរាចរណ៍ផង»។

សូមបញ្ជាក់ថា មន្ត្រីពាក់ព័ន្ធទូទាំងរាជធានី ខេត្តកំពុងធ្វើការយ៉ាងយកចិត្តទុកដាក់ចំពោះរថយន្តតទ្រុងខុសលក្ខណៈបច្ចេកទេស បន្ទាប់ពីការដាក់ចេញបទបញ្ជារបស់សម្តេចតេជោ ហ៊ុន សែន កាលពីថ្ងៃទី០៩ ខែកុម្ភៈ កន្លងទៅនេះ។ ការដាក់ចេញបទបញ្ជានេះ ក៏ព្រោះតែសម្តេចមើលឃើញថា រថយន្តតទ្រុងខុសបច្ចេកទេសទាំងនេះ បង្កជាគ្រោះថ្នាក់ចរាចរ និងធ្វើឲ្យខូចផ្លូវផងដែរ៕

ស៊ីម៉ាក់បន្ដរកឃើញទីតាំងអាវុធគីមីរបស់អាមេរិក ១២ទីតាំងថ្មីទៀត នៅក្នុងស្រុករមាសហែក ខេត្តស្វាយវៀង

FN​ ៖ លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា (ស៊ីម៉ាក់) បានបញ្ជាក់ប្រាប់បណ្ដាញព័ត៌មាន Fresh News ឲ្យដឹងនៅរសៀលថ្ងៃទី១៤ ខែកុម្ភៈ ឆ្នាំ២០១៨នេះថា មន្ដ្រីជំនាញរបស់ស៊ីម៉ាក់ បានស្រាវជ្រាវរកឃើញតំបន់ផលប៉ះពាល់ ដោយគ្រាប់បែកគីមីរបស់អាមេរិកចំនួន១២ទីតាំងថ្មីទៀត នៅក្នុងស្រុករមាសហែក ខេត្ដស្វាយវៀង។

លោក ហេង រតនា បានបញ្ជាក់ថា «ទីតាំងអាវុធគីមី១២កន្លែងថ្មីនេះ មាន១១ទីតាំងត្រូវបានរកឃើញ នៅឃុំត្រួស និង១ទីតាំងទៀត នៅឃុំគគីរ ស្រុករមាសហែក​ ខេត្តស្វាយវៀង»។

បើគិតថែមទាំង១២ទីតាំងថ្មីនេះ អាវុធគីមីរបស់អាមេរិកដែលទម្លាក់ ក្នុងសម័យសង្គ្រាមទសវត្សរ៍ឆ្នាំ៧០ ដែលរកឃើញនៅឃុំគគីរ និងឃុំត្រួសនេះ មានរហូតដល់ជាង៤០ទីតាំងហើយ ដែលទីតាំងខ្លះស្ថិតនៅក្រោមផ្ទះរបស់ប្រជាពលរដ្ឋ និងខ្លះទៀតនៅក្នុងចំការដំណាំ។

ជាមួយនឹងការរកឃើញទីតាំងអាវុធគីមី យ៉ាងច្រើនសន្ធឹកសន្ធាប់បែបនេះ ប្រជាពលរដ្ឋរងគ្រោះដោយសារ សារធាតុគីមី របស់អាវុធគីមី ក៏មានចំនួនច្រើនឡើងផងដែរ ដែលគិតមកដលពេលនេះ ប្រជាពលរដ្ឋជាង១០០នាក់ហើយ ត្រូវបញ្ជូនទៅពិនិត្យព្យាបាលនៅមន្ទីរពេទ្យ។ ភាគច្រើននៃប្រជាពលរដ្ឋទាំងអស់ គឺមានបញ្ហា ថប់ដង្ហើម និងរមាស់ កន្ទួលលើស្បែក។

អាវុធគីមីរបស់សហរដ្ឋអាមេរិក ត្រូវបានរកឃើញនៅខេត្តមួយចំនួន នៃប្រទេសកម្ពុជា រួមមាន៖ ខេត្តមណ្ឌលគិរី, ត្បូងឃ្មុំ, និងស្វាយវៀងជាដើម ហើយគេជឿជាក់ថា មាននៅក្នុងខេត្តមួយចំនួនទៀតផងដែរ។

នៅឆ្នាំ២០១២ អង្គការហាមឃាត់អាវុធគីមី (OPCW) របស់អង្គការសហការប្រជាជាតិ បានចុះមកពិនិត្យស្រាវជ្រាវអាវុធគីមីម្ដងរួចមកហើយ នៅខេត្តមណ្ឌលគិរី ដោយពេលនោះអង្គការនេះបានបញ្ជាក់ថា គ្រាប់បែកនោះ គឺជាអាវុធគីមីយ៉ាងពិតប្រាកដ។

បន្ទាប់ពីរកឃើញទីតាំងគ្រាប់បែក ជាច្រើនកន្លែងនៅខេត្តស្វាយវៀង រាជរដ្ឋាភិបាលកម្ពុជា បានដាក់លិខិតផ្លូវការមួយថ្មីទៀត ទៅកាន់អង្គការ OPCW ដើម្បីស្នើឲ្យអង្គការនេះ បញ្ជូនមន្ដ្រីបច្ចេកទេសរបស់ខ្លួន មកពិនិត្យ និងវាយតម្លៃគ្រាប់បែកគីមី ដែលរកឃើញនៅកម្ពុជា។

នៅដើម ខែធ្នូ ឆ្នាំ២០១៧ អង្គការ OPCW បានបញ្ជូនមន្ដ្រីបច្ចេកទេសរបស់ពួកគេមកកម្ពុជា ដើម្បីធ្វើការពិនិត្យ និងវាយតម្លៃគ្រាប់បែកទាំងនោះ ដែលបានរកឃើញនៅ...Read More

យុទ្ធនាការរឹតបន្ដឹងច្បាប់ចរាចរណ៍ទូទាំងប្រទេសថ្ងៃទី១៥ ខែកុម្ភៈ៖ រកឃើញយានយន្ដល្មើសច្បាប់៥៧៨គ្រឿង និងផាកពិន័យ២៤៧គ្រឿង, រាជធានីភ្នំពេញឃាត់យានយន្ត៥២៥គ្រឿង

FN​៖ យុទ្ធនាការរឹតបន្ដឹងច្បាប់ចរាចរណ៍ទូទាំងប្រទេស សម្រាប់ថ្ងៃទី១៥ ខែកុម្ភៈ ឆ្នាំ២០១៨នេះ កម្លាំងនគរបាលចរាចរណ៍ បានត្រួតពិនិត្យយានយន្ដចំនួន ៤,៣៦៥គ្រឿង រកឃើញល្មើសច្បាប់៥៧៨គ្រឿង (ម៉ូតូ៥៧ភាគរយ) អប់រំ៣៣១គ្រឿង និងផាកពិន័យ២៤៧គ្រឿង, នេះបើតាមរបាយការណ៍ផ្លូវការ របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ ដែលអង្គភាព Fresh News ទទួលបាននៅរសៀលថ្ងៃទី១៥ ខែកុម្ភៈនេះ។

របាយការណ៍បានបញ្ជាក់ទៀតថា ចំពោះការត្រួតពិនិត្យមួក និងកញ្ចក់​ នៅថ្ងៃទី១៥ខែកុម្ភៈនេះ ត្រួតពិនិត្យរួមបានចំនួន២៥០៧គ្រឿង អប់រំ១៧៨គ្រឿង និងផាកពិន័យចំនួន១១៥គ្រឿង។

ដោយឡែកសម្រាប់រាជធានីភ្នំពេញវិញ នៅថ្ងៃទី១៥ ខែកុម្ភៈ ឆ្នាំ២០១៨ សមត្ថកិច្ចនគរបាលឃាត់បានម៉ូតូ៥២៥គ្រឿង ដែលជិះបញ្ច្រាស មិនពាក់មួកសុវត្ថិភាព មិនដាក់កញ្ចក់ មិនមានស្លាកលេខ។

សម្រាប់លទ្ធផល នៃការត្រួតពិនិត្យរយៈពេល១៥ថ្ងៃ ចាប់ពីថ្ងៃទី០១ ដល់ថ្ងៃទី១៥ ខែកុម្ភៈនេះ នគរបាលបានត្រួតពិនិត្យយានយន្តចំនួន ៥៩,៤៨៥គ្រឿង រកឃើញយានយន្តល្មើស ៨,១៤០គ្រឿង (ម៉ូតូ៧១ភាគរយ) ក្នុងនោះអប់រំ ៤,៧៣៣គ្រឿង និងផាកពិន័យ៣,៤០៧គ្រឿង (ម៉ូតូ៨៨ភាគរយ)៕

បារាំងផ្តល់ប្រាក់ជំនួយ និងឥណទានមានការប្រាក់ទាបដល់កម្ពុជា ជាង៥០លានដុល្លារ សម្រាប់គម្រោងទឹកស្អាត និងអនាម័យតាមបណ្តាខេត្ត

FN ៖ រដ្ឋាភិបាលបារាំង តាមរយៈទីភ្នាក់ងារបារាំងសម្រាប់អភិវឌ្ឍន៍ (AFD) នៅថ្ងៃទី២៤ ខែមករា ឆ្នាំ២០១៨ បានផ្តល់ជំនួយ និងឥណទានមានការប្រាក់ទាបប្រមាណ៤១លានអឺរ៉ូ ដែលស្មើនឹងជាង៥០លានដុល្លារដល់កម្ពុជា សម្រាប់គម្រោងចំនួន២ នៅតាមបណ្តាខេត្ត ជាពិសេសលើគម្រោងទឹកស្អាត និងអនាម័យ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ដែលបណ្តាញព័ត៌មាន Fresh News ទទួលបាននៅថ្ងៃទី២៥ ខែមករា ឆ្នាំ២០១៨នេះ។

ពិធីចុះហត្ថលេខាលើការផ្តល់ជំនួយ និងឥណទាននេះ ត្រូវបានធ្វើឡើង ក្នុងកិច្ចប្រជុំពិគ្រោះយោបល់កម្រិតគោលនយោបាយលើកទី២រវាងភាគីកម្ពុជាដែលដឹកនាំដោយ លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ជាមួយសមភាគីបារាំងដែលដឹកនាំដោយលោក Philippe BAUDUIN នាយកប្រតិបត្តិរងរបស់ទីភ្នាក់ងារបារាំងសម្រាប់អភិវឌ្ឍន៍ (AFD) នៅទីស្នាក់ការកណ្តាលរបស់ AFD នាទីក្រុងប៉ារីស សាធារណរដ្ឋបារាំង នាថ្ងៃទី២៤ ខែមករា ឆ្នាំ២០១៨។

ក្រោយបញ្ចប់កិច្ចប្រជុំនេះ បារាំង-កម្ពុជាបានចុះកិច្ចព្រមព្រៀងចំនួន២រួមមាន៖

១៖ កិច្ចព្រមព្រៀងឥណទានសម្បទានលើគម្រោងទឹកស្អាត និងអនាម័យនៅទីរួមខេត្ត ក្នុងទឹកប្រាក់ចំនួន ៤០លានអឺរ៉ូ ប្រហែល៤៩លានដុល្លារ

២៖ កិច្ចព្រមព្រៀងហិរញ្ញប្បទានឥតសំណងសម្រាប់ការសិក្សា និងពង្រឹងសមត្ថភាព ក្នុងទឹកប្រាក់ចំនួន ១លានអឺរ៉ូ ប្រហែល១,២៤លានដុល្លារ។

កិច្ចព្រមព្រៀងសហប្រតិបត្តិការទាំងពីរខាងលើនេះ នឹងចូលរួមចំណែកក្នុងផ្តល់ការអភិវឌ្ឍន៍ហេដ្ឋា-រចនាសម្ព័ន្ធជនបទតាមរយៈការផ្តល់សេវាកម្ម ក៏ដូចជាការតបណ្តាញទឹកស្អាតទៅកាន់ទីជនបទ និងការកសាងសមត្ថភាពមន្រ្តីអនុវត្តគម្រោង និងការសិក្សាសមិទ្ធិលទ្ធភាពគម្រោងក្នុងក្របខ័ណ្ឌកិច្ចសហប្រតិបត្តិការអភិវឌ្ឍន៍ជាមួយ AFD។

លោក វង្សី វិស្សុត បានលើកឡើងថា ក្នុងគោលដៅធានាដល់ការអភិវឌ្ឍប្រកបដោយចីរភាពរបស់កម្ពុជា, កិច្ចសហ-ប្រតិបត្តិការហិរញ្ញវត្ថុដែលផ្តល់ដោយរដ្ឋាភិបាលបារាំងតាមរយៈ AFD ក្នុងក្របខណ្ឌឥណទានសម្បទាន ត្រូវតែឆ្លើយតបទៅនឹងតម្រូវការរបស់កម្ពុជា ដើម្បីទ្រទ្រង់ដល់កំណើនសេដ្ឋកិច្ច, ការកាត់បន្ថយភាពក្រីក្រ និងត្រូវឲ្យចំនូវអាទិភាពគោលនយោបាយនានារបស់កម្ពុជា ដូចមានចែងនៅក្នុងយុទ្ធសាស្ត្រចតុកោណ ដំណាក់កាលទី៣ ក៏ដូចជាត្រូវឱ្យមានសង្គតិភាពជាមួយគោលនយោបាយក្នុងការខ្ចី ព្រមទាំងច្បាប់ និងបទបញ្ញត្តិពាក់ព័ន្ធនានារបស់កម្ពុជាផងដែរ។

នាឱកាសនោះដែរ លោក Philippe Bauduin ក៏បានបង្ហាញនូវការបេ្តជ្ញាចិត្តរបស់ខ្លួន ក្នុងការបន្តគាំទ្រដល់កិច្ចអភិវឌ្ឍន៍របស់កម្ពុជា។ លោកបានបញ្ជាក់ផងដែរថា AFD...Read More

សម្ដេច ស ខេង ជំរុញថ្នាក់ដឹកនាំគ្រប់លំដាប់ថ្នាក់ ខិតខំបម្រើសេវាសាធារណៈឲ្យមានតម្លាភាព ប្រសិទ្ធភាព និងទាន់ពេលវេលា ជូនប្រជាពលរដ្ឋ

FN ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានក្រើនរំឭកជាថ្មីថា ប្រទេសកម្ពុជាមានលទ្ធិប្រជាធិបតេយ្យ ហើយប្រជាពលរដ្ឋកម្ពុជាមានសេចក្ដីសុខទៅបាន លុះត្រាតែមន្ត្រីរាជការទាំងអស់ ដែលជាសេនាធិការរបស់រាជរដ្ឋាភិបាល ប្រឹងប្រែងអនុវត្តតួនាទី និងភារកិច្ចរបស់ខ្លួនឲ្យបានត្រឹមត្រូវ។

សម្ដេចក្រឡាហោម ស ខេង លើកឡើងបែបនេះក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៧ និងលើកទិសដៅការងារសម្រាប់អនុវត្តឆ្នាំ២០១៨ របស់រដ្ឋបាលខេត្តកំពង់ធំ នាថ្ងៃទី២៥ ខែមករា ឆ្នាំ២០១៨ ដែលមានមន្រ្តីរាជការចូលរួមចំនួន ៣៥០នាក់។

សម្តេចក្រឡាហោមថ្លែងយ៉ាងដូច្នេះថា «ភាពដែលអាទទួលបានលទ្ធិប្រជាធិបតេយ្យនេះទៅបាន លុះត្រាតែថ្នាក់ដឹកនាំ និងមន្ត្រីរាជការទាំងអស់ ដែលជាសេនាធិការរបស់រាជរដ្ឋាភិបាល ព្យាយាមធ្វើការអនុវត្តនូវតួនាទី និងភារកិច្ច ក្នុងគោលបំណងជាអ្នកផ្តល់នូវសេវា ហើយប្រជាពលរដ្ឋ គឺជាម្ចាស់នៃសេវា ទាំងការផ្តល់នូវសេវាតម្រូវការ និងសេវាចាំបាច់»។

សម្ដេច ស ខេង បានបន្តថា សេវាទាំងអស់នោះរួមមាន ការពង្រឹងសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សាធារណៈ ដោយមានការចូលរួមពីប្រជាពលរដ្ឋក្នុងមូលដ្ឋាន រួមមានកិច្ចសហការរវាងលោកមេភូមិ ប្រជាការពារ ប៉ុស្តិ៍នគរបាល និងរដ្ឋបាលឃុំ-សង្កាត់ផងដែរ។

សម្តេចបានជំរុញថ្នាក់ដឹកនាំគ្រប់លំដាប់ថ្នាក់ ខិតខំបម្រើសេវាសាធារណៈឲ្យមានតម្លាភាព ប្រសិទ្ធភាព និងទាន់ពេលវេលា ស្របតាមការធ្វើកំណែទម្រង់នានារបស់រាជរដ្ឋាភិបាល ដែលទទួលបានដំណើរការល្អ សមស្របទៅតាមស្ថានភាពរបស់ប្រទេសជាតិបច្ចុប្បន្ន និងមានការគាំទ្រពីមន្ត្រីរាជការ ដែលធ្វើការកែទម្រង់ស៊ីជម្រៅទទួលបានលទ្ធផលល្អប្រសើរ ធ្វើឲ្យការអភិវឌ្ឍសេដ្ឋកិច្ចប្រទេសជាតិ អាចរក្សាកំណើនបាន៧%ក្នុងមួយឆ្នាំ។

សម្ដេចក្រឡាហោម ស ខេង ក៏មិនភ្លេចណែនាំដល់មន្ត្រីក្នុងរដ្ឋបាលខេត្តកំពង់ធំ ត្រូវយកមកធ្វើបន្តទៀតនៅឆ្នាំថ្មី ដើម្បីដោះស្រាយបញ្ហាប្រឈមដែលនៅសេសសល់ នៅក្នុងដែនសមត្ថកិច្ច របស់ខ្លួនឲ្យអស់ចប់សព្វគ្រប់ ក្នុងឆ្នាំ២០១៨នេះ។ ម្យ៉ាងទៀត មន្ត្រីរាជការទំាងអស់ត្រូវខិតខំធ្វើអំពើល្អជាមួយប្រជាពលរដ្ឋ ថ្នាក់ដឹកនាំខេត្ត ក្រុង ស្រុក ត្រូវពង្រឹងគណៈបញ្ជាការឯកភាពឲ្យបានល្អ ពង្រឹងគោលនយោបាយភូមិ-ឃុំ មានសុវត្ថិភាព ជាពិសេសត្រូវលើកទឹកចិត្តប៉ុស្តិ៍នគរបាលរដ្ឋបាលឃុំសង្កាត់ និងប្រជាការពារ ត្រូវមានការសហការគ្នាធ្វើការងារ និងចូលរួមគោរពច្បាប់ចរាចរណ៍ទំាងអស់គ្នា។

លោក សុខ លូ អភិបាលខេត្តកំពង់ធំ បានលើកឡើងថា រដ្ឋបាលខេត្តបានរៀបចំកែលម្អសោភណ្ឌភាពក្រុងស្ទឹងសែន...Read More

ក្រសួងការងារ៖ រយៈពេល១៩ថ្ងៃមកនេះ រាជរដ្ឋាភិបាលចំណាយថវិកាជាង៩១២.៨លានរៀល ឧបត្ថម្ភដល់កម្មការិនីសម្រាលកូនសរុបចំនួន២២៨២នាក់

FN ៖ លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានថ្លែងប្រាប់អង្គភាព Fresh News ឱ្យដឹងថា រយៈពេល១៩ថ្ងៃ នៃការដាក់ឲ្យអនុវត្តកម្មវិធីថ្មី របស់រាជរដ្ឋាភិបាលសម្តេចតេជោ ហ៊ុន សែន ក្នុងការបើក ផ្តល់សាច់ប្រាក់ជូនកម្មការិនី ដែលសម្រាលកូននោះ បេឡាជាតិរបបសន្តិសុខសង្គម នៃក្រសួងការងារ បានទទួលបញ្ជី កម្មការិនីសម្រាលកូនសរុបចំនួន ២២៦៣នាក់ និងបញ្ជីទារកសរុបចំនួន ២២៨២នាក់ និងបានបើកផ្តល់ថវិកាសរុបចំនួន ៩១២.៨លានរៀល។

គិតចាប់ពីថ្ងៃទី១ មកដល់ថ្ងៃទី១៩ ខែមករា នេះមានកម្មការិនីដែលសម្រាលបានកូនភ្លោះ២ មានចំនួន១៩នាក់។

ការឧបត្ថម្ភនេះបានបង្ហាញពីការចាប់ផ្តើមអនុវត្តកម្មវិធី បើកផ្តល់ប្រាក់ឧ​បត្ថម្ភបន្ថែម ដល់កម្មករនិយោជិតជាស្រ្តី ទាំងក្នុងនិងក្រៅប្រព័ន្ធ ពេលសម្រាលកូន។

សូមជំរាបថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសដាក់ចេញគោលនយោបាយថ្មីរបស់ រាជរដ្ឋាភិបាល ឧបត្ដម្ភថវិកាដល់កម្មការិនី ឆ្លងទន្លេចំនួន៤០ម៉ឺនរៀល សម្រាប់អ្នកកើតបានកូនម្នាក់, ចំណែកអ្នក កើតបានកូនភ្លោះពីរនាក់ ទទួលបាន៨០ម៉ឺនរៀល និងសម្រាប់អ្នកកើតបានកូនភ្លោះបី ១,២០០,០០០រៀល ដែលគោលនយោបាយនេះ ចាប់អនុវត្តចាប់ពីថ្ងៃទី០១ ខែមករា ឆ្នាំ២០១៨ តទៅ។ រាជរដ្ឋាភិបាល បានត្រៀមបម្រុង ចំណាយថវិកាប្រមាណ ១០លានដុល្លារអាមេរិក ក្នុងមួយឆ្នាំសម្រាប់ចំណាយប្រាក់ ឧបត្ថម្ភដល់កម្មការិនីឆ្លងទន្លេ៕

សម្ដេចពិជ័យសេនា ទៀ បាញ់៖ រយៈពេលជិត១២ឆ្នាំមកនេះ ទ័ពមួកខៀវកម្ពុជាជិត៥,០០០នាក់ ត្រូវបានបញ្ជូនទៅប្រទេសមួយចំនួន លើពិភពលោក ក្រោមឆត្រអង្គការសហប្រជាជាតិ

FN ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី​ រដ្ឋមន្ដ្រីក្រសួងការពារជាតិ បានថ្លែងថា ក្នុងរយៈពេលជិត១២ឆ្នាំនេះ រាជរដ្ឋាភិបាលកម្ពុជា បានបញ្ជូនកម្លាំងរក្សាសន្ដិភាពជិត៥,០០០នាក់ ទៅកាន់ប្រទេសមួយចំនួនលើពិភពលោក ក្នុងក្របខណ្ឌអង្គការសហប្រជាជាតិ នៅតំបន់អាហ្វ្រិក មជ្ឈឹមបូព៌ា និងអឺរ៉ុប។

ការថ្លែងបែបនេះ របស់សម្ដេច ទៀ បាញ់ ត្រូវបានធ្វើឡើងនៅព្រឹកថ្ងៃទី១៨ ខែមករា ឆ្នាំ២០១៨នេះ ក្នុងឱកាសអញ្ជើញជាអធិបតី ក្នុងពិធីជូនដំណើរកងវិស្វកម្មលេខ៩៦៣ ទៅប្ដូរវេនកងវិស្វកម្មលេខ៣៦៩ ដែលបញ្ចប់បេសកកម្មរក្សាសន្ដិភាព របស់អង្គការសហប្រជាជាតិ នៅសាធារណរដ្ឋលីបង់ និងកងវិស្វកម្មលេខ៤៥៩ បញ្ចប់បេសកកម្មនៅសាធារណរដ្ឋអាហ្វ្រិកកណ្ដាល។

ប្រមុខដឹកនាំក្រសួងការពារជាតិ បានលើកឡើងទៀតថា នេះជាសមិទ្ធិផលថ្មីមួយថែមទៀត លើសមិទ្ធិផលជាច្រើនដែលកម្ពុជាសម្រេចបាន លើការងារបញ្ជូនកម្លាំងទៅចូលរួមបេសកកម្មរក្សាសន្ដិភាព របស់អង្គការសហប្រជាជាតិ ក្នុងការរួមវិភាគទានដល់កិច្ចប្រឹងប្រែងរបស់សហគមន៍អន្ដរជាតិ ដើម្បីបុព្វហេតុ សន្ដិភាព សន្ដិសុខ និងមនុស្សធម៌លើពិភពលោក។

បើតាមសម្ដេច ទៀ បាញ់ សមិទ្ធិផលនេះ បានបង្ហាញឲ្យឃើញពីសមត្ថភាព បទពិសោធន៍ការងារប្រកបដោយវិជ្ជាជីវៈ ក្នុងការបំពេញបេសកកម្មរបស់កងយោធពលខេមរភូមិន្ទ ដែលជានិច្ចកាលមន្ដ្រីតំណាងអង្គការសហប្រជាជាតិ តែងតែវាយតម្លៃខ្ពស់ និងកោតសរសើរចំពោះសេចក្ដីក្លាហាន វិជ្ជាជីវៈ ភាពប៉ិនប្រសប់ វិន័យល្អ និងសហប្រតិបត្តិការប្រសើរជាមួយកម្លាំងចូលរួមបេសកកម្ម របស់អង្គការសហប្រជាជាតិ។

សម្ដេចពិជ័យសេនា ទៀ បាញ់ បានគូសបញ្ជាក់ថា រាជរដ្ឋាភិបាលកម្ពុជា បានបញ្ជាក់ជំហររបស់ខ្លួនក្នុងការចូលរួមរក្សាសន្ដិភាព របស់អង្គការសហប្រជាជាតិ តាមរយៈបង្កើនការរៀបចំរចនាសម្ព័ន្ធ រួមទាំងកម្លាំងមធ្យោបាយគ្រឿងបំពាក់ និងសម្ភារៈ ជាកម្រិតចល័តរហ័ស ដើម្បីធ្វើការចល័តក្នុងអំឡុងពេលដែលមានសំណើរចាំបាច់ របស់ទីបញ្ជាការអង្គការសហប្រជាជាតិ និងពង្រឹងការចូលរួមឲ្យកាន់តែសកម្មថែមទៀត។

ជាមួយគ្នានោះ លោកស្រី Claire Van der Vaeren អ្នកសម្របសម្រួលអង្គការសហប្រជាជាតិ ប្រចាំកម្ពុជា ក្នុងនាមមន្ដ្រីអង្គការសហប្រជាជាតិ បានសម្ដែងនូវការដឹងគុណដ៏ជ្រាលជ្រៅចំពោះរាជរដ្ឋាភិបាល និងប្រជាជនកម្ពុជាក្នុងការជួយបង្កើតឲ្យមានសន្ដិភាពជាក់ស្ដែង សម្រាប់បណ្ដាប្រទេសផ្សេងៗ។

បន្ថែមពីនេះ លោកស្រី បានសម្ដែងនូវសេចក្ដីសប្បាយរីករាយចំពោះវត្តមាននារី១៣រូប ដែលបានទៅចូលរួមក្នុងបេសកកម្មនៅសាធារណរដ្ឋលីបង់នាពេលនេះ ដែលជាការលើកទឹកចិត្ត...Read More

ឧបនាយករដ្ឋមន្ត្រី ម៉ែន សំអន៖ ព្រះពុទ្ធសាសនា ជាសាសនារបស់រដ្ឋ និងជាកម្លាំងដឹកនាំ ចរិយាធម៌សង្គម ឲ្យដើរផ្លូវល្អ

FN ៖ ឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច តំណាងសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅថ្ងៃទី១៨ ខែមករា ឆ្នាំ២០១៨នេះ បានលើកឡើងថា ព្រះពុទ្ធសាសនា ជាសាសនារបស់រដ្ឋ និងជាកម្លាំងដឹកនាំ ចរិយាធម៌សង្គម ឲ្យមនុស្សគ្រប់រូប ដើរតាមផ្លូវល្អ។

ឧបនាយករដ្ឋមន្ត្រី ម៉ែន សំអន បានបន្ថែមទៀតថា មិនតែប៉ុណ្ណោះ ព្រះពុទ្ធសាសនា ក៏ត្រូវចូលរួមបំពេញកុសលទាំងឡាយ ដើម្បីជាគុណប្រយោជន៍ ដល់ការថែរក្សាការពារ សេចក្តីសុខ សន្តិភាព ស្ថេរភាព សាមគ្គីភាព ក្តីសង្ឃឹម លើកស្ទួយ ការកសាងជាតិ ឆ្ពោះទៅរកសេចក្តីថ្កុំថ្កើង រុងរឿងសម្បូរសប្បាយ។

ការលើកឡើងបែបនេះ ក្នុងឱកាសដែលឧបនាយករដ្ឋមន្ត្រី ម៉ែន សំអន អញ្ជើញចូលរួមសម្ពោធដាក់ឲ្យ​ ប្រើប្រាស់សមិទ្ធ ផលនានា នៅវត្ដ ពោធិ៍សត្វ ស្ថិតនៅក្នុងឃុំត្រពាំងវែង ស្រុកកណ្ដាលស្ទឹង ខេត្ដកណ្ដាល នាថ្ងៃទី១៨ ខែមករា ឆ្នាំ២០១៨នេះ។

ឧបនាយករដ្ឋមន្ត្រី ម៉ែន សំអន បានបញ្ជាក់ទៀតថា ការរីកចម្រើនទាំងនេះ ដោយសារតែការរួមគ្នាកសាងរវាង វិស័យពុទ្ធចក្រ និងអាណាចក្រ ខណៈប្រទេសជាតិ មានសុខសន្តិភាព និងស្ថេរភាពនយោបាយពេញលេញ។ ដោយមានការដឹកនាំដ៏ត្រឹមត្រូវ របស់សម្ដេចតេជោ ហ៊ុន សែន ជានាយករដ្ឋមន្ដ្រីនៃកម្ពុជា។

លោកស្រីថា «សុខសន្តិភាពទាំងនេះ ជាតម្លៃដែលបានផ្តល់ឲ្យយើង មានឱកាសបញ្ជូនកូនចៅ ទៅរៀនសូត្រ ចាប់ពីមតេយ្យរហូត ដល់មហាវិទ្យាល័យ និងមានជីវភាពរស់នៅធូរធាដោយ ស្ថិតនៅក្រោមដំបូលរដ្ឋធម្មនុញ្ញតែមួយ ហើយការអភិវឌ្ឍន៍សេដ្ឋកិច្ចជាតិ ក៏មានការរីចម្រើនហេដ្ឋារចនា សម្ព័ន្ធខ្វាត់ខ្វែង តភ្ជាប់ជាមួយផ្លូវជាតិ គ្រប់តំបន់ស្របតាមយុទ្ធសាស្ត្រចតុកោណ ដំណាក់កាលទី៣...Read More

នគរបាលកម្ពុជា និងតម្រួតឡាវ ប្រជុំពិភាក្សាការងារទ្វេភាគី សម្រាប់កិច្ចសហប្រតិបត្តិការប្រឆាំងបទល្មើសគ្រឿងញៀនឆ្លងដែនខុសច្បាប់

FN  ៖ នាយឧត្តសេនីយ៍ ម៉ក់ ជីតូ អគ្គស្នងការរងនគរបាលជាតិ នៅថ្ងៃទី១៥ ខែមករា ឆ្នាំ២០១៨នេះ បានដឹកនាំប្រតិភូនគរបាលកម្ពុជា អញ្ជើញបើកកិច្ចប្រជុំទ្វេភាគី ជាមួយអគ្គនាយកដ្ឋានតម្រួត នៃក្រសួងសន្តិសុខឡាវ នៅសណ្ឋាគារ Landmark ទីក្រុងវៀងចន្ទ ប្រទេសឡាវ។

កិច្ចប្រជុំនេះ ភាគីកម្ពុជាដឹកនាំដោយ លោក ម៉ក់ ជីតូ និងសមាជិកផ្សេងទៀតដែលអញ្ជើញចូលរួមមាន៖ ១៖ លោក ឧត្តមសេនីយ៍ទោ ងួន គឿន ស្នងការរតនគីរី, ២៖ លោក ឧត្តមសេនីយ៍ទោ ម៉ៅ តារា ស្នងការស្ទឹងត្រែង ៣៖ លោកឧត្តមសេនីយ៍ទោ យិន ចំណាន ស្នងការព្រះវិហារ, ៤៖ លោក ឧត្តមសេនីយ៍ត្រី ឡេង ប៊ុនណា នាយករងមន្ទីរប្រឆាំងគ្រឿងញៀន, ៥៖ លោក វរសេនីយ៍ឯក អ៊ិន សុង នាយការិយាល័យសេនាធិការ មន្ទីរប្រឆាំងគ្រឿងញៀន និង៦៖លោក វរសេនីយ៍ឯក យិន បញ្ញារិទ្ធ នាយការិយាល័យក៩។

ចំណែកភាគីឡាវ ដឹកនាំដោយ លោកវរសេនីយ៍ឯក Khamhoung SENGPASERT អគ្គនាយករងតម្រួតឡាវ ប្រធានប្រតិភូ និងមានសមាជិកចូលរួមចំនួន១០រូបទៀត។

កិច្ចប្រជុំនោះរៀបចំឡើង ស្ដីពីកិច្ចសហប្រតិបត្តិការបទល្មើសឆ្លងដែន ជាពិសេសគឺប្រឆាំងបទល្មើសគ្រឿងញៀនឆ្លងដែន៕

កម្ពុជា-តួកគី សន្យាជំរុញឲ្យមានការហោះហើរត្រង់ ដើម្បីបង្កើនការផ្លាស់ប្តូរពាណិជ្ជកម្ម និងទេសចរណ៍

FN ៖ កម្ពុជា និងតួកគី បានសន្យារួមគ្នាជំរុញឲ្យមានការហោះហើរត្រង់រវាងប្រទេសទាំងពីរឲ្យបានឆាប់ ដើម្បីបង្កើនការផ្លាស់ប្តូរពាណិជ្ជកម្ម និងទេសចរណ៍ ខណៈកិច្ចព្រមព្រៀងនៃការហោះហើរត្រង់រវាងប្រទេសទាំងពីរបានចុះហត្ថលេខារួចរាល់ហើយនោះ។

ការសន្យាបានធ្វើឡើងក្នុងឱកាសដែលលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ អនុញ្ញាតឲ្យលោក Ilhan Kemal Tug ឯកអគ្គរដ្ឋទូតតួកគីប្រចាំកម្ពុជា ចូលជួបជម្រាបលាក្នុងពេលដែលលោកត្រូវបញ្ចប់អាណត្តិការងារនៅកម្ពុជា។

ក្នុងជំនួបជម្រាបលា ដែលធ្វើឡើងនាព្រឹកថ្ងៃទី១៦ ខែមករា ឆ្នាំ២០១៨នេះ ប្រមុខការទូតកម្ពុជា និងលោក Ilhan Kemal Tug បានពិភាក្សាលើការងារជាច្រើន ដែលសម្រេចបានក្នុងអាណត្តិរបស់លោក និងការងារមួយចំនួនទៀត ដែលរាជរដ្ឋាភិបាលកម្ពុជា និងរដ្ឋាភិបាលតួកគីត្រូវអនុវត្តន៍បន្ត។

លោក ជុំ សុន្ទរី អ្នកនាំពាក្យក្រសួងការបរទេស បានឲ្យដឹងថា ក្នុងជំនួបនោះលោក Ilhan Kemal Tug បានថ្លែងអំណរគុណលោក ប្រាក់ សុខុន និងរាជរដ្ឋាភិបាលកម្ពុជា ដែលតែងបានគាំទ្រ និងចូលរួមសហការល្អធ្វើឲ្យការបំពេញបេសកកម្មការទូតរបស់លោកនៅកម្ពុជា ទទួលបានជោគជ័យ។

ជំនួបនាព្រឹកមិញ ក៏បានពិភាក្សាផងដែរទៅលើការផ្លាស់ប្តូរទំហំពាណិជ្ជកម្មរវាងប្រទេសទាំងពីរ។ លោក Ilhan Kemal Tug បានគូសបង្ហាញថា ទំហំពាណិជ្ជកម្មរវាងកម្ពុជា និងតួកគី មានការកើនឡើងគួរឲ្យកត់សម្គាល់ ដែលក្នុងនោះឆ្នាំ២០១៧កន្លងទៅទំហំពាណិជ្ជកម្មប្រទេសទាំងពីរមានរហូតដល់ទៅ ៧៥លានដុល្លារអាមេរិក។

ទោះបីទំហំពាណិជ្ជកម្មមានការកើនឡើង តែទាំងលោក ប្រាក់ សុខុន និង លោក Ilhan Kemal Tug មើលឃើញដូចគ្នាថា ទំហំពាណិជ្ជកម្មនេះមិនទាន់ឆ្លើយតបនឹងសក្តានុពលនៃប្រទេសទាំងពីរនៅឡើយនោះទេ។ ក្នុងន័យនេះភាគីទាំងពីរ បានស្នើឲ្យមានការកោះប្រជុំគណៈកម្មការសេដ្ឋកិច្ចចម្រុះនៃប្រទេសទាំងពីរ ដើម្បីបង្កើនកិច្ចសហប្រតិបត្តិការសេដ្ឋកិច្ច។

លោក ប្រាក់ សុខុន និង លោក Ilhan Kemal Tug ក៏បានពិភាក្សាពីគម្រោងហោះហើរត្រង់នៃប្រទេសទាំងពីរ ដោយបានរំលឹកថា ប្រទេសទាំងពីរបានចុះកិច្ចព្រមព្រៀងរួចហើយពីការហោះហើរត្រង់ ប៉ុន្តែមិនទាន់មានការហោះហើរត្រង់នៅឡើយ។ បញ្ហានេះ...Read More

រដ្ឋមន្ត្រីការងារ៖ កម្ពុជា-ចិន នឹងបង្កើតកម្មវិធីបណ្តុះបណ្តាលវិជ្ជាជីវៈ តាមប្រព័ន្ធអនឡាញនាពេលខាងមុខ

FN ៖ ក្រោយជំនួបពិភាក្សាជាមួយលោក ជាំង ហៅ ប្រធានក្រុមហ៊ុន Join Capital investment & Management Co.,Ltd លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ក្រសួងការងារកម្ពុជា នឹងសហការជាមួយក្រុមហ៊ុនចិនមួយនេះ បង្កើតកម្មវិធីបណ្តុះបណ្តាលវិជ្ជាជីវៈ តាមរយៈប្រព័ន្ធអនឡាញលើមុខជំនាញជាច្រើន នាពេលខាងមុខ។

កិច្ចពិភាក្សាការងារនេះ ធ្វើឡើងនាព្រឹកថ្ងៃទី១៦ ខែមករា ឆ្នាំ២០១៨ នៅទីស្ដីការក្រសួងការងារ ដើម្បីស្វែងរកកិច្ចសហប្រតិបត្តិការជាមួយក្រសួងការងារ លើកម្មវិធីបណ្តុះបណ្តាលបច្ចេកទេសថ្មីមួយ គឺការបណ្តុះបណ្តាលតាមរយៈប្រព័ន្ធអនឡាញ។

លោករដ្ឋមន្ត្រីថ្លែងយ៉ាងដូច្នេះថា «តាមអ្វីដែលយើងពិភាក្សាគ្នា គឺតាមបទពិសោធន៍របស់សាធារណរដ្ឋប្រមានិតចិន គេបានទទួលជោគជ័យធំ ក្នុងការបណ្តុះបណ្តាលវិជ្ជាជីវៈ តាមប្រព័ន្ធអនឡាញនេះ ដោយសារការបណ្តុះបណ្តាលបែបនេះ ប្រើប្រាស់ធនធានថវិកាតិចជាង ហើយអាចផ្តល់ឱកាសច្រើនដល់យុវជន និងយុវនារី ឬប្រជាពលរដ្ឋដែលពេញនិយម និងចូលចិត្តសិក្សា អីញ្ចឹងយើងបានព្រមព្រៀងគ្នា និងឯកភាពជាដៃគូគ្នារវាងក្រសួងការងារ និងក្រុមហ៊ុនចិននេះ»។

លោករដ្ឋមន្ត្រីបានបន្តថា កម្មវិធីបណ្តុះបណ្តាលតាមរយៈអនឡាញនេះ នឹងធ្វើការបណ្តុះបណ្តាលលើមុខជំនាញ បច្ចេកទេសវិជ្ជាជីវៈ ស្របតាមវិស័យដែលកម្ពុជាកំពុងត្រូវការ លើផ្នែកឧស្សាហកម្ម សេវាកម្ម ស្ថាបត្យកម្ម និងផ្នែកផ្សេងទៀត។ ការបណ្តុះបណ្តាលនេះ ត្រូវតែមានការទទួលស្គាល់ទំាងគុណភាពគ្រប់កម្រិត ចាប់ពីថ្នាក់វិញ្ញាបណ្ណបត្រ សញ្ញាបត្រឡើងទៅ។

លោករដ្ឋមន្ត្រីបានបន្ថែមថា ក្រសួងការងារចង់ឲ្យកម្មវិធីបណ្តុះបណ្តាលនេះ ឆាប់ចេញជារូបរាង ប៉ុន្តែត្រូវការពេលវេលាពិភាក្សាគ្នាសិន ហើយក្រុមការងារកំពុងតែសហការគ្នាបកប្រែកម្មវិធី ពីភាសាចិនមកជាភាសារខ្មែរ ទោះបីមានកម្មវិធីបកប្រែរបស់ Google ក៏ពិតមែន ក៏ត្រូវបកប្រែពាក្យពេចន៍ឲ្យបានត្រឹមត្រូវដែរ ព្រោះលោករដ្ឋមន្ត្រីចង់ឲ្យមានការបកប្រែជាភាសាបច្ចេកទេសពីចិនមកតែម្តង ដោយគ្រាន់តែបង្កើតកម្មវិធីបកប្រែ ដើម្បីកុំឲ្យមានកំហុសច្រើន។

លោករដ្ឋមន្ត្រីអះអាងថា កម្មវិធីនេះអាចរៀនបានគ្រប់មនុស្សស្រទាប់វណ្ណៈ ដោយគ្រាន់តែមានប្រព័ន្ធអ៊ិនធីរណេត ហើយសម្រាប់កម្មវិធីបណ្តុះបណ្តាលនេះ អ្នករៀនអាចនឹងបង់ថវិកាតិចតួចដែរ៕

ក្រសួងការងារ៖ ១៧ថ្ងៃនេះ រាជរដ្ឋាភិបាល ចំណាយថវិកាជាង៨១១.២លានរៀល ឧបត្ថម្ភដល់កម្មការិនីសម្រាលកូនសរុបចំនួន២០២៨នាក់

FN ៖ លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានថ្លែងប្រាប់អង្គភាព Fresh News ឱ្យដឹងថា រយៈពេល១៧ថ្ងៃ នៃការដាក់ឲ្យអនុវត្តកម្មវិធីថ្មី របស់រាជរដ្ឋាភិបាលសម្តេចតេជោ ហ៊ុន សែន ក្នុងការបើកផ្តល់សាច់ប្រាក់ជូនកម្មការិនី ដែលសម្រាលកូននោះ បេឡាជាតិរបបសន្តិសុខសង្គម នៃក្រសួងការងារ បានទទួលបញ្ជីកម្មការិនីសម្រាលកូនសរុបចំនួន ២០១០នាក់ និងបញ្ជីទារកសរុបចំនួន ២០២៨នាក់ និងបានបើកផ្តល់ថវិកាសរុបចំនួន ៨១១.២លានរៀល។

គិតចាប់ពីថ្ងៃទី១ មកដល់ថ្ងៃទី១៧ ខែមករា នេះមានកម្មការិនីដែលសម្រាលបានកូនភ្លោះ២ មានចំនួន១៨នាក់។

ការឧបត្ថម្ភនេះបានបង្ហាញពីការចាប់ផ្តើមអនុវត្តកម្មវិធីបើកផ្តល់ប្រាក់ឧ​បត្ថម្ភបន្ថែមដល់កម្មករនិយោជិតជាស្រ្តី ទាំងក្នុងនិងក្រៅប្រពន្ធពេលសម្រាលកូន។

សូមជំរាបថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសដាក់ចេញគោលនយោបាយថ្មីរបស់រាជរដ្ឋាភិបាល ឧបត្ដម្ភថវិកាដល់កម្មការិនី ឆ្លងទន្លេចំនួន៤០ម៉ឺនរៀល សម្រាប់អ្នកកើតបានកូនម្នាក់, ចំណែកអ្នកកើតបានកូនភ្លោះពីរនាក់ ទទួលបាន៨០ម៉ឺនរៀល និងសម្រាប់អ្នកកើតបានកូនភ្លោះបី ១,២០០,០០០រៀល ដែលគោលនយោបាយនេះ ចាប់អនុវត្តចាប់ពីថ្ងៃទី០១ ខែមករា ឆ្នាំ២០១៨ តទៅ។ រាជរដ្ឋាភិបាល បានត្រៀមបម្រុង ចំណាយថវិកាប្រមាណ ១០លានដុល្លារអាមេរិក ក្នុងមួយឆ្នាំសម្រាប់ចំណាយប្រាក់ ឧបត្ថម្ភដល់កម្មការិនីឆ្លងទន្លេ៕