ពត៌មាន តេជោ | កម្ពុជាទស្សនៈថ្មី

ជួបជាមួយកីឡាករគ្រប់ប្រភេទ នៅថ្ងៃកំណើត ០៤ មេសា

រសៀលថ្ងៃទី ០៨ ខែ មីនា ឆ្នាំ ២០១៦ ក្នុងឱកាសជួបកីឡាករជ័យលាភីនៃការប្រកួតកីឡាអាស៊ានប៉ារ៉ា ហ្គេម លើកទី ៨ នៅប្រទេសសឹង្ហបុរី និងក្រុមកីឡាបាល់ទាត់ Cambodia All Stars ដែលរៀបចំឡើងនៅ វិមានសន្ដិភាព សម្ដេចតេជោ ហ៊ុន សែន បានសូមអោយរដ្ឋមន្ត្រីពីររូប គឺរដ្ឋមន្ត្រីក្រសួងអប់រំ និងរដ្ឋមន្ត្រីក្រសួងទេសចរណ៍ ដែលជាប្រធានគណៈកម្មាធិការជាតិអូឡាំពិកកម្ពុជា រៀបចំនូវការជួបជុំគ្នាមួយ រវាងសម្ដេច និងកីឡាករគ្រប់ប្រភេទ នៅកោះពេជ្រ មុនថ្ងៃចូលឆ្នាំខ្មែរ នាវេលាល្ងាចថ្ងៃទី ០៤ ខែ មេសា ឆ្នាំ ២០១៦ ដែលជាថ្ងៃខួបកំណើតសិប្បនិមិ្មតរបស់សម្តេច។ ក្នុងឱកាសដដែលនោះ សម្តេចតេជោ បានរំលឹកថា សម្តេចមិនបានប្រើបណ្តាញទំនាក់ទំនងសង្គម Facebook ប្រកួតប្រជែងជាមួយអ្នកណា ឬដើម្បីប្រជាប្រិយភាពទេ តែគឺដើម្បីបម្រើជាតិឲ្យមានប្រសិទ្ធិភាព និងថាជាមួយបណ្តាញទំនាក់ទំនងនេះ មិនមាននរណាអាចបោកប្រាស់សម្តេចបានទៀតឡើយ។ Facebook Page របស់សម្ដេចតេជោ មានអ្នក Like ច្រើនជាងគេនៅកម្ពុជា ហើយទើបតែមានចំនួនលើសពីចំនួន Like នៃ Facebook វិទ្យុសម្លេងសហរដ្ឋអាមេរិក (VOA) កាលពី ថ្ងៃ ច័ន្ទទី ០៧ ខែ មីនា កន្លងទៅនេះ៕

ស្រាយបៀវត្សភរិយា/កូន ក្នុងឆ្នាំ ២០១៧, ការយោគយល់ក្នុងទំនាក់ទំនងបុរស/នារី

ក្នុងពិធីអបអរខួបលើកទី ១០៥ ទិវាអន្តរជាតិ ៨ មីនា, ឆ្លើយតបទៅសំណូមពរ ស្តីពី ការតម្លើងប្រាក់បៀវត្សសម្រាប់ភរិយា និងកូនៗ នៃមន្ត្រីរាជការ និងកងកម្លាំងប្រដាប់អាវុធ សម្តេចតេជោ បានអរគុណចំពោះការផ្តល់មតិ និងបញ្ជាក់ថា បានបញ្ជូនសំណូមពរអោយរដ្ឋមន្ត្រីសេដ្ឋកិច្ច និងហិរញ្ញវត្ថុ និងរដ្ឋមន្រ្តីមុខងារសាធារណៈ រកដំណោះស្រាយហើយ។ សម្តេចតេជោ ជំរាបជូនថា “បើទោះជាមិនអាចតម្លើងបៀវត្ស សម្រាប់ភរិយា និងកូន មន្រ្តីរាជការ កងកម្លាំងប្រដាប់អាវុធ (នៅឆ្នាំនេះក្តី) ខ្ញុំសង្ឃឹមថា អាចមានចំណែកខ្លះ នៅពេលភ្ជុំ ជាដើម … ប៉ុន្តែឆ្នាំ ២០១៧ បៀវត្សនេះនឹងត្រូវបានបង្កើន …”។ ទន្ទឹមនោះ សម្តេចតេជោ បានទាញអារម្មណ៍ថា ក្នុងខែមេសា ដល់ពេលដែលត្រូវតម្លើងបៀវត្សមន្ត្រីរាជការ កងកម្លាំងប្រដាប់អាវុធហើយ។ ទាក់ទងនឹងទិវានារីអន្តរជាតិ សម្តេចបានក្រើនរំលឹកអោយស្រ្តី និងបុរស មានការអត់ធ្មត់ និងយោគយល់គ្នា ក្នុងទំនាក់ទំនងទ្វេទិស ដើម្បីជៀសវាងជម្លោះ ការលែងលះ បែកបាក់គ្រួសារ៕

ហូបអំបិលកម្ពុជា មិនពកក, ខេត្តនានាត្រៀមដី សហការជាមួយ “ភូមិកុមារ SOS អន្តរជាតិ”

ព្រឹកថ្ងៃទី ០៥ ខែ មីនា ឆ្នាំ ២០១៦ ក្នុងឱកាសសម្ពោធភូមិកុមារ អេសអូអេស ខេត្តកំពត សម្តេចតេជោ ហ៊ុន សែន បានអំពាវនាវដល់ប្រជាពលរដ្ឋកម្ពុជាគ្រប់រូប អោយងាកមកប្រើប្រាស់អំបិលក្នុងស្រុកវិញ ព្រោះជាអំបិលផលិតចេញពីទឹកសមុទ្រ មិនដូចអំបិលនាំចូលពីបរទេស ដែលផលិតចេញពីរ៉ែក្រោមដីឡើយ។ លើសពីនេះទៀត សម្តេចបានទាញអារម្មណ៍ថា អំបិលកម្ពុជាមានបញ្ចូលនូវសារធាតុអ៊ីយ៉ូត ដែលជួយការពារមិនអោយមានជំងឺពកកផង។ ពាក់ព័ន្ធនឹងសកម្មភាពអង្គការ “ភូមិកុមារ SOS អន្តរជាតិ” សម្ដេចតេជោ ហ៊ុន សែន បានសំដែងនូវសេចក្ដីរីករាយ និងពេញចិត្តចំពោះកិច្ចសហប្រតិបត្តិការរួម ចាប់តាំងពីឆ្នាំ ១៩៩៩ ដែលមកទល់គ្នានឹងពេលនេះ បានចំណាយថវិកាប្រមាណជាង ២៦ លានដុល្លារ រួមចំណែកជួយដល់កុមារកម្ពុជា នៅ ៦ ទីតាំង ផ្តល់សេវាជំនួយដល់កុមារកម្ពុជាជិត ២ ពាន់នាក់។ សម្ដេចតេជោ អះអាងថា រាជរដ្ឋាភិបាលនឹងបន្តកិច្ចសហការជាមួយ អង្គការ “ភូមិកុមារ SOS អន្តរជាតិ” បន្តទៀត និងបានដាស់តឿនដល់ខេត្តនានា ត្រៀមដីទុកឱ្យហើយ បើមានបំណងចង់ឱ្យអង្គការ “ភូមិកុមារ SOS អន្តរជាតិ” ទៅជួយ។ សម្តេចតេជោ ចាត់ទុក “ភូមិកុមារ SOS អន្តរជាតិ” បានរួមចំណែកយ៉ាងសំខាន់ ជាមួយរាជរដ្ឋាភិបាលកម្ពុជា តាមរយៈសកម្មភាពក្រសួងសង្គមកិច្ច អតីតយុទ្ធជន និងយុវនីតិសម្បទា ជួយដល់កុមារកំព្រាកម្ពុជាឱ្យទទួលមានការរស់នៅ ការអប់រំ ការការពារសិទ្ធិ សេរីភាព អភិវឌ្ឍខ្លួនកាន់តែប្រសើរឡើង និងបានសម្រេចផ្តល់ដីសាងសង់វិទ្យាល័យ ផ្តល់ការអប់រំកម្រិតមធ្យមនៅ “ភូមិកុមារ SOS កំពត” និងជាប្រយោជន៍ដល់កូនចៅអ្នកស្រុកដែលនៅតំបន់ក្បែរនោះ៕

បម្រែបម្រួលប្រជាសាស្ត្រ និងការអភិវឌ្ឍ, ផាកពិន័យការបង្ហុយផ្សែងបារី

ព្រឹកថ្ងៃទី ០៤ ខែ មីនា ឆ្នាំ ២០១៦ ដឹកនាំកិច្ចប្រជុំគណៈរដ្ឋមន្រ្តីពេញអង្គ នៅវិមានសន្តិភាព ដែលពិនិត្យលើ សេចក្តីព្រាងគោលនយោបាយជាតិប្រជាជន ឆ្នាំ ២០១៦-២០៣០ និងសេចក្តីព្រៀងអនុក្រឹត្យ ស្តីពីវិធានការហាមការជក់ ឬបង្ហុយផ្សែងផលិតផលថ្នាំជក់នៅកន្លែងធ្វើការ ឬកន្លែងសាធារណៈ សម្តេចតេជោ ហ៊ុន សែន បានធ្វើការណែនាំអំពីការតម្លើងតួនាទីនៅថ្នាក់ក្រោមជាតិ ដូចជា អភិបាលខេត្ត/ក្រុង/ស្រុក ដោយតម្រូវឲ្យជ្រើសរើសមន្រ្តី នៅនឹងមូលដ្ឋាននោះតែម្តង ដោយមិនយកមន្រ្តីពីថ្នាក់ជាតិទៅយកមុខតំណែងទាំងនោះ ដើម្បីធ្វើអោយមានប្រសិទ្ធិភាពការងារ។ គោលនយោបាយជាតិប្រជាជន ផ្តោតការយកចិត្តទុកដាក់លើចំណងទាក់ទងគ្នារវាងបម្រែបម្រួលប្រជាសាស្រ្ត និងការ ធ្វើផែនការអភិវឌ្ឍន៍ មានវិស័យអាទិភាពបួន គឺការអភិវឌ្ឍ និងពង្រីកហេដ្ឋារចនាសម្ព័ន្ធរូបវ័ន្ត, ការគ្រប់គ្រងទេសន្តរប្រវេសន៍ និងនគរូបនីយកម្ម, ការពង្រីកវិស័យកសិកម្ម និងសកម្មភាពពាក់ព័ន្ធ និងការវិនិយោគលើវិស័យសង្គមកិច្ច និងការអភិវឌ្ឍមូលធនមនុស្ស។ អនុក្រឹត្យ ស្តីពីវិធានការហាមការជក់ ឬបង្ហុយផ្សែងផលិតផលថ្នាំជក់នៅកន្លែងធ្វើការ ឬកន្លែងសាធារណៈ មានរៀបរាប់ពីការផាកពិន័យជាទឹកប្រាក់ចំនួន ២ ម៉ឺនរៀលចំពោះអ្នកប្រព្រឹត្តល្មើស និង ៥ ម៉ឺនរៀលចំពោះម្ចាស់ហាងដែលមិនបានដាក់ស្លាកហាមជក់បារី។ សម្តេចតេជោ នៅបានក្រើនរំលឹកដល់ក្រសួងសាធារណការ និងដឹកជញ្ជូនឲ្យបង្កើនល្បឿន និងបង្កលក្ខណៈងាយស្រួល ក្នុងការធ្វើ និងផ្ទេរប័ណ្ណសម្គាល់យានយន្ត ជូនប្រជាពលរដ្ឋ ទៅតាមការកំណត់នៃច្បាប់ចរាចរណ៍ផ្លូវគោកថ្មី៕

សម្តេចតេជោ៖ “កម្ពុជាក្រប្រាក់ តែមិនក្រចិត្ត” ជួយមិត្តភក្តិវិញទេ

នៅរសៀល ថ្ងៃទី ០១ មីនា ឆ្នាំ ២០១៦ នៅក្នុងពិធីបិទសន្និបាតបូកសរុបការងារបញ្ជូនកងកម្លាំងកម្ពុជា ចូលរួមរក្សាសន្តិភាពរបស់អង្គការសហប្រជាជាតិ នៅវិមានសន្តិភាព, សម្តេចតេជោ បានរៀបរាប់ពីមហិច្ឆតា របស់កម្ពុជា ក្នុងការពង្រីកកម្លាំងបញ្ជូនទៅក្រៅប្រទេស បើសិនជាមានសំណូមពរពីអង្គការសហប្រជាជាតិ។ «ខ្ញុំមានមហិច្ឆតា ព្រោះមិត្តភក្តិ(ធ្លាប់)បានជួយមកដល់យើង។ យើងក៏បានជួយទៅដល់មិត្តភក្តិវិញផងដែរ។ ពិតមែនតែកម្ពុជាក្រប្រាក់កាស ក៏ប៉ុន្តែកម្ពុជាមិនក្រផ្លូវចិត្តទេ … (ហើយ) បើសិនកម្ពុជា(ក្លាយ)ជាប្រទេសអ្នកមានខាងសេដ្ឋកិច្ចវិញ កម្ពុជានឹងផ្តល់ជំនួយទៅក្រៅប្រទេសឲ្យស្មើនឹង ០.៧% នៃ GDP។ នេះជាមហិច្ឆតារបស់ខ្ញុំ» សម្តេចបន្ថែម។

សម្តេចតេជោ ហ៊ុន សែន បានរំលឹកពីការសម្រេចចិត្តដ៏លំបាកពីរលើក ទីមួយ ការទទួលយកអង្គការសហប្រជាជាតិចូលមកប្រតិបត្តិការនៅកម្ពុជា ក្នុងគ្រាដែលកម្ពុជាកំពុងតែមានជម្លោះ និងស្ថិតក្នុងស្ថានភាពចរចាសន្តិភាព និងទីពីរ ពេលដែលកម្ពុជាខ្លួនឯងកំពុងលំបាក ប៉ុន្តែបែរជាចិត្តធំ ហ៊ានបញ្ជូនកងទ័ពទៅក្រៅប្រទេស។ យ៉ាងណាក្តី សម្តេចតេជោ វាយតម្លៃថា “ការសម្រេចចិត្តទាំងពីរ គឺសុទ្ធតែជាការសម្រេចចិត្តដែលត្រឹមត្រូវ និងគួរជាទីមោទនៈ”។

សម្តេចតេជោ នៅបានកោតសរសើរដល់កងកម្លាំង ដែលបញ្ជូនទៅក្រៅប្រទេសរបស់កម្ពុជាថា មិនបានធ្វើឲ្យអាប់អោនដល់កម្ពុជាទេ ដែលប្រការនេះវាផ្ទុយពីទាហាន អាជ្ញាធរអន្តរកាលនៃអង្គការសហប្រជាជាតិ ឬ UNTAC ដែលបានចម្លងជម្ងឺអេដស៍ និងបន្សល់ទុកកូនកាត់នៅប្រទេសកម្ពុជា ក្នុងកំឡុងពេល ប្រតិបត្តិការរបស់ខ្លួន ហើយបានផ្តាំផ្ញើទៅកងកម្លាំងមួកខៀវទាំងអស់ អោយពង្រីកចំណេះដឹងទូទៅ ពិសេសផ្នែកភាសាបរទេស, គោរពវិន័យ ច្បាប់ទម្លាប់ អនុសាសន៍ និងបទបញ្ជា, បន្តទំនាក់ទំនងល្អជាមួយប្រជាជននៅកន្លែងដែលខ្លួនប្រតិបត្តិការ និងប្រុងប្រយ័ត្នចំពោះគ្រោះថ្នាក់គ្រប់ប្រភេទ ព្រមទាំងចេះជួយយកអាសារគ្នាទៅវិញទៅមក៕

អប់រំគ្នា ស្រាយបញ្ហាជាមួយគ្នា រក្សាភាពថ្លៃថ្នូរនៃគ្រូពេទ្យភាគច្រើន

ថ្ងៃច័ន្ទ ទី ២៩ កុម្ភៈ ២០១៦ អញ្ជើញសម្ពោធអគារថ្មីមន្ទីរពេទ្យបង្អែកខេត្តព្រះសីហនុ ជាជំនួយរបស់ប្រទេសជប៉ុន សម្តេចតេជោ ហ៊ុន សែន មានប្រសាសន៍ថា “ដើម្បីចៀសវាងការដែលមនុស្សមួយចំនួនបំផ្លាញកិត្តិនាមរបស់រាជរដ្ឋាភិបាល ក៏ដូចជារដ្ឋាភិបាលជប៉ុន … (សូមអោយអ្នកទាំងនោះ) សួរទៅអគ្គរដ្ឋទូតជប៉ុន ប្រធាន JICA ឬសួររដ្ឋាភិបាលជប៉ុនចុះ”។ សម្តេចបញ្ជាក់ថា គំរោងជំនួយជប៉ុន មិនមែនដេញថ្លៃនៅស្រុកខ្មែរទេ គឺធ្វើនៅតូក្យូ ហើយមានតែក្រុមហ៊ុនជប៉ុនទៀត ទើបមានសិទ្ធិសាងសង់។ ទាក់ទងនឹងការរិះគន់ដល់គ្រូពេទ្យថ្មីៗនេះ សម្តេចតេជោបានរំលឹកថា (បុគ្គលិកពេទ្យធ្វើការ)គ្មានថ្ងៃឈប់សម្រាក គ្មានថ្ងៃបុណ្យទានទេ បើប្រៀបធៀបជាមួយនឹងអ្នកធ្វើការដទៃទៀត។ សម្តេចតេជោចាត់ទុកថា នេះជាការលះបង់របស់គ្រូពេទ្យ ដែលភាគច្រើនមានក្រមសីលធម៌ មានវិជ្ជាជីវៈ ប្រកបដោយការទទួលខុសត្រូវ និងលះបង់ ដើម្បីជួយអ្នកជម្ងឺ។ យ៉ាងណាក្តី សម្តេចទទួលស្គាល់ថា អាចមានគ្រូពេទ្យមួយចំនួនតូច ធ្វើឲ្យមានការប៉ះពាល់ដល់មន្ទីរពេទ្យទាំងមូល។ សម្តេចតេជោ បានស្នើថា វិធីដែលល្អជាងគេ គឺការជួយអប់រំគ្នា គ្រប់គ្រងដោះស្រាយបញ្ហាជាមួយគ្នា ដើម្បីម្យ៉ាង លើកកម្ពស់ការយកចិត្តទុកដាក់ពិនិត្យ ព្យាបាលអ្នកជម្ងឺ និងម្យ៉ាងទៀតរក្សានូវភាពថ្លៃថ្នូររបស់គ្រូពេទ្យភាគច្រើន។ សម្តេចតេជោ ចាត់ទុកការវិភាគថា “គ្រូពេទ្យ ១០០ នាក់ ខូចអស់ ៩៩” ជាសំដីប្រមាថ៕

សម្តេចតេជោ៖ មន្ត្រីជញ្ជីងត្រូវបើកភ្នែកមើល អ្វីបំផ្លាញស្ពាន/ថ្នល់ និងសុវត្ថិភាពសាធារណៈ

ដោយសង្កេតឃើញថា គ្រោះថ្នាក់បង្កឡើងដោយរថយន្តតូចធំ រថយន្តសណ្តោងដឹកទំនិញលើសកំណត់ ដូចជាករណីដឹកកាត់ស្ពានអ្នកលឿង(ទ្សឹបាស្សា) បានបណ្តាលឲ្យខូចខាតស្ពាន រហូតមានបានករណីរថយន្តដឹកដីខ្នាតធំបុកម៉ូតូយុវសិស្ស បណ្តាលឲ្យគ្រោះថ្នាក់ដល់ជីវិតផង, ក្នុងសារតាមហ្វេសប៊ុកព្រឹកថ្ងៃទី ២៧ កុម្ភៈ ឆ្នាំ ២០១៦, ក្រៅពីបញ្ជាក់ថា ទម្ងន់បែបនេះអាចនឹងកំទេចស្ពាន បើបណ្តោយអោយឆ្លងកាត់រាល់ថ្ងៃ ដោយអាជ្ញាធរ និងសមត្ថកិច្ចប្រាកដជាបានឃើញពេលរថយន្តខ្នាតយក្សដឹកសណ្តោងលើសកំណត់តោន ជាពិសេសសមត្ថកិច្ចដែលយាមនៅគល់ស្ពាន សម្តេចតេជោ ហ៊ុន សែន បានព្រមានទាំងអ្នកបើកបរ ទាំងក្រុមហ៊ុន ថា សម្តេចនឹងមិនឲ្យជនល្មើសណា ដែលបង្កការខូចខាតដល់ស្ពានថ្នល់ បង្កគ្រោះថ្នាក់ដល់ប្រជាពលរដ្ឋហើយរត់គេចមិនទទួលខុសត្រូវ បានរួចខ្លួនតទៅទៀតឡើយ។

ស្របនឹងបានចេញបញ្ជាឲ្យក្រសួង អាជ្ញាធរ និងសមត្ថកិច្ចពាក់ព័ន្ធ ត្រូវចាត់វិធានការតឹងរ៉ឹង និងម៉ឺងម៉ាត់បំផុតទៅលើជនទាំងនោះ សម្តេចតេជោ ក៏បានអំពាវនាវទៅដល់ប្រជាពលរដ្ឋទាំងអស់ ក្រុមហ៊ុនដឹកអ្នកដំណើរ និងក្រុមហ៊ុនដឹកទំនិញ ត្រូវតែគោរពច្បាប់ចរាចរណ៍ទាំងអស់គ្នា កុំដឹកលើសទម្ងន់ ចៀសវាងគ្រោះថ្នាក់ ធានាបានសុវត្ថិភាពខ្ពស់ និងការថែរក្សាគុណភាពស្ពានថ្នល់បានយូរអង្វែង។ «ក្រុមមន្រ្តីជញ្ជីងត្រូវបើកភ្នែកមើលអោយឃើញ អ្វីដែលកំពុងបំផ្លាញផ្លូវថ្នល់ និងសុវត្ថិភាពសាធារណៈ ព្រោះត្រូវទទួលទោសដូចគ្នា» សម្តេចបញ្ជាក់៕

សម្តេចតេជោ៖ ពិចារណារុះរើគណរដ្ឋមន្ត្រី, ពន្លឿនសេវាសាធារណ, បង្កើនវិធានការណ៍សន្តិសុខ

រសៀល ថ្ងៃ ទី ២៥ ខែ កុម្ភៈ ឆ្នាំ ២០១៦ អញ្ជើញជាអធិបតីក្នុងពិធីបិទសន្និបាតបូកសរុបការងាររបស់ក្រសួងមហាផ្ទៃ, សម្តេចតេជោ ហ៊ុន សែន បានស្តីបន្ទោសធ្ងន់ៗ ទៅកាន់ក្រសួងសាធារណការ និងក្រសួងកសិកម្ម រុក្ខាប្រមាញ់ និងនេសាទ ដែលមានភាពស្ពឹកស្រពន់នៅក្នុងការដោះស្រាយបញ្ហានានា ក្រោមចំណាត់ការរបស់ខ្លួន។ សម្តេចតេជោ បានបង្ហើបថា កំពុងពិចារណាថាត្រូវមានការរុះរើគណរដ្ឋមន្រ្តីឬយ៉ាងណា។ «ខ្ញុំកំពុងតែគិត តើខ្ញុំដោះដូរគណៈរដ្ឋមន្ត្រីក្នុងឆ្នាំនេះឬទេ? … ព្រោះបើទុកម្លឹងៗ មិនកើតទេ។ វាងាប់ខ្ញុំ អាពាក្យគ្នាឯងៗ គ្រោះថ្នាក់ដល់ខ្លួនឯង» ។

ទាក់ទងនឹងការផ្តល់សេវាជូនប្រជាពលរដ្ឋ សម្តេចតេជោ ជម្រុញឲ្យមន្រ្តីគ្រប់ក្រសួងទាំងអស់បង្កើនល្បឿនផ្តល់សេវាតម្រូវការនានា ដូចជា ការផ្តល់អត្តសញ្ញាណប័ណ្ណ សៀវភៅគ្រួសារ សំបុត្រកំណើត/អាពាហ៍ពិពាហ៍/មរណភាព ប័ណ្ណបើកបរ ស្លាកលេខយានយន្ត។ល។ ដោយផ្អែកតាមគោលការណ៍ ៣ គឺ «ធ្វើឲ្យបាន ឲ្យលឿន និងមានតម្លាភាព» និងលើកឡើងពីបំណងចុះទៅពិនិត្យផ្ទាល់ ដោយមិនប្រាប់មុន តាមមូលដ្ឋានតែម្តង ដើម្បីដឹងថាតើការងារថ្នាក់មូលដ្ឋានមានសកម្មភាព ឬអត់។

បន្ថែមពីលើនោះ សម្តេចបានបញ្ជាជាកំហិតឲ្យតាមចាប់រថយន្តដឹកអង្ករ ដែលបានបង្កការខូចខាតស្ពានទ្សឹបាសា កាលពីថ្មីៗនេះ និងព្រមានបិទក្រុមហ៊ុនទាំងឡាយណា ដែលល្មើសច្បាប់ដឹកជញ្ជូន។ ដោយសង្កេតឃើញការកើនឡើង នូវការប្លន់ប្រដាប់អាវុធ និងជួញដូរគ្រឿងញៀន នាពេលថ្មីនេះ ដែលបង្កឡើងដោយក្រុមចោរ ឬក្រុមជួញដូរគ្រឿងញៀន ដែលទើបនឹងត្រូវបានដោះលែងពីពន្ធធនាគារ សម្តេចតេជោ បានបញ្ជារដ្ឋមន្រ្តីក្រសួងយុត្តិធម៌ និងអ្នកកាន់ពន្ធធនាគារ ពិនិត្យឲ្យបានម៉ត់ចត់ មុននឹងស្នើសុំដោះលែងឧក្រិដ្ឋជនណាមួយ ឬបើសិនជាអាច ធ្វើជាបញ្ជីឈ្មោះចោរដែលសុំដោះលែង ជាមួយនឹងសំណុំរឿង ឲ្យសម្តេចបានពិនិត្យ មុននឹងចុះហត្ថលេខាស្នើសុំព្រះមហាក្សត្រឡាយព្រះហស្ថលើកលែងទោស។ សម្តេចតេជោ បញ្ជាក់ថា បើចេះតែដោះលែង ទីចុងបំផុត អ្នកទាំងនោះចេញមកធ្វើសកម្មភាពដដែល៕

យល់ស្របការផ្ទេរមុខងារ រវាងបរិស្ថាន និងកសិកម្ម, បញ្ជាមន្ត្រីមូលដ្ឋានបន្តបង្ក្រាបបទល្មើសព្រៃឈើ

នៅព្រឹកថ្ងៃទី ២៥ ខែកុម្ភៈ ឆ្នាំ ២០១៦ ក្នុងពិធីសម្ពោធ «អគារមរតកតេជោ» និងពិធីបើកសន្និបាត បូក សរុបលទ្ធផលការងារឆ្នាំ ២០១៥ និងទិសដៅការងារឆ្នាំ ២០១៦ នៃក្រសួងបរិស្ថាន, សម្តេច តេជោ ហ៊ុន សែន បានកោតសរសើរឯកឧត្តម សាយ សំអាល់ រដ្ឋមន្រ្តីបរិស្ថាន ថាជារដ្ឋមន្រ្តីទី ១ ដែលបានសុំឲ្យមានការផ្ទេរមុខងារ និងធ្វើប្រតិភូកម្មការងារ។ លោករដ្ឋមន្ត្រី បានស្នើអោយរាជរដ្ឋាភិបាលប្រគល់ និងផ្ទេររាល់គម្រោងអភិវឌ្ឍន៍សម្បទានដីសេដ្ឋកិច្ច ដំណាំឧស្សាហកម្ម ទៅឲ្យក្រសួងកសិកម្មជាអ្នកគ្រប់គ្រង ហើយក្រសួងបរិស្ថានសុំយកតំបន់អភិរក្ស តំបន់ការពារ និងតំបន់បម្រុងទុក ពីក្រសួងកសិកម្មមកគ្រប់គ្រងវិញ។ សម្តេចតេជោបង្ហាញក្តីសង្ឃឹមថា រដ្ឋមន្រ្តីផ្សេងទៀត នឹងបញ្ឈប់ការអោបក្រសោប ដណ្តើមការងារ និងអំណាច ដែលជាញឹកញយ ពេលមានបញ្ហា តែងមកសុំការអន្តរាគមន៍ពីនាយករដ្ឋមន្រ្តី ដូចដែលអតីតរដ្ឋមន្រ្តីបរិស្ថាន ធ្លាប់បានធ្វើពីមុនមក។
ទាក់ទងនឹងបញ្ហាព្រៃឈើ សម្តេចតេជោ បានបន្តថា មិនឯកភាពនឹងការកាប់បំផ្លាញព្រៃឈើទេ ប៉ុន្តែ ការកាប់ព្រៃឈើល្អិតល្អោច ដើម្បីយកដីមកធ្វើកសិកម្ម ឬដាំដំណាំឧស្សាហកម្ម ដូចជា កៅស៊ូ ជាដើម វាមិនមែនជាបញ្ហាធំដុំនោះទេ ព្រោះដំណាំទាំងនោះនឹងផ្តល់មកវិញជាគម្របព្រៃឈើ និងផលប្រយោជន៍សេដ្ឋកិច្ច។ សម្តេចបានបញ្ជាមន្រ្តីតាមមូលដ្ឋានឲ្យបង្រ្កាបរាល់បទល្មើសព្រៃឈើ ព្រោះវាមិនពិបាកដូចបទល្មើសគ្រឿងញៀនទេ។ «បើថា លួចគ្រឿងញៀន លួចរត់ពន្ធគ្រឿងញៀនវាពិបាក។ ប៉ុន្តែរឿងដឹកឈើនេះ អាហ្នឹងវាដឹកនឹងឡាន ហើយធំៗណាស់ ចុះគ្រប់ផ្នែកទៅណាអស់ ទាំងភ្នែកទាហាន ភ្នែកប៉ូលិស ភ្នែកផ្នែកប៉េអឹម ទាំងភ្នែករដ្ឋបាល ទាំងភ្នែកព្រៃឈើ និងភ្នែកបរិស្ថាន ទៅណាអស់ទៅ …» សម្តេចបញ្ជាក់៕

សម្តេចតេជោ៖ "ផ្ទៃដី ១៦០០ គីឡូម៉ែត្រក្រឡា សង្ស័យថានៅមានមីន"

ក្នុងសារអបអរទិវាជាតិយល់ដឹងពីមីន លើកទី ១៧ នៅថ្ងៃ ២៤ ខែកុម្ភៈ ឆ្នាំ ២០១៦ សម្តេចតេជោ ហ៊ុន សែន បានរំលឹកអ្នកដែលកំពុងរស់នៅក្នុងតំបន់រងផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម ឲ្យបង្កើនការប្រុងប្រយ័ត្នចំពោះគ្រោះថ្នាក់ដែលបង្កឡើងដោយសារគ្រាប់ទាំងនោះ។ សម្តេចបានបន្ថែមថា ក្រៅពីបង្កសោកនាដកម្មដ៏ធ្ងន់ធ្ងរចំពោះអាយុជីវិតប្រជាពលរដ្ឋ គ្រាប់មីន និងសំណល់ជាតិផ្ទុះទាំងនោះ ក៏ជាឧបសគ្គសម្រាប់ការស្តារ និងអភិវឌ្ឍន៍ជីវភាពគ្រួសារ និងសេដ្ឋកិច្ចជាតិផងដែរ។ “រាជរដ្ឋាភិបាលបានចាត់ទុកសកម្មភាពមីន ជាគោលដៅអភិវឌ្ឍន៍ប្រកបដោយចីរភាពទី ១៨ និងបានបញ្ចូលទៅក្នុងយុទ្ធសាស្រ្តចតុកោណរបស់ខ្លួន ដែលគិតមកដល់ឆ្នាំ ២០១៦ សកម្មភាពបោស សម្អាតមីន មានរយៈពេល ២៤ ឆ្នាំមកហើយ” សម្តេចតេជោបានបញ្ជាក់។ ដោយបន្តថា កម្ពុជានៅមានផ្ទៃដីសង្ស័យថាមានមីន និងយុទ្ធភ័ណ្ឌមិនទាន់ផ្ទុះប្រមាណជាង ១៦០០ គីឡូម៉ែត្រក្រឡាទៀត ដែលត្រូវបោសសម្អាត សម្តេចលើកហេតុផលថា ត្រឹមតែការដោះមីនមួយមុខមិនអាចផ្តល់សុវត្ថិភាពគ្រប់គ្រាន់ដល់ប្រជាពលរដ្ឋបានឡើយ តែការអប់រំប្រជាពលរដ្ឋឲ្យបានយល់ដឹងអំពីគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម តាមរយៈការអប់រំផ្ទាល់តាមផ្ទះ សហគមន៍ ចលនាកីឡា ការផ្សព្វផ្សាយទូលាយតាមវិទ្យុ និងទូរទស្សន៍ ខិត្តប័ណ្ណ និងការបញ្ចូលការអប់រំពីមីនទៅក្នុងកម្មវិធីសិក្សា ទើបជាការងារគួបផ្សំដ៏សំខាន់ ដែលត្រូវធ្វើ។ សម្តេចតេជោ បានថ្លែងអំណរគុណជូនចំពោះដៃគូអភិវឌ្ឍន៍ បណ្តាអង្គការជាតិ-អន្តរជាតិ និងប្រតិបត្តិករសកម្មភាពមីនទាំងអស់ ដែលបានចូលរួមយ៉ាងសកម្មជាមួយរាជរដ្ឋាភិបាល ក្នុងការបោសសម្អាតមីន ដើម្បីកាត់បន្ថយគ្រោះថ្នាក់ និងលើកកម្ពស់សុវត្ថិភាពជីវភាព រស់នៅរបស់ប្រជាពលរដ្ឋកម្ពុជាឲ្យបានប្រសើរ និងរួមចំណែកស្តារ និងអភិវឌ្ឍសេដ្ឋកិច្ចជាតិឲ្យបានរុងរឿងឆាប់រហ័សថែមទៀត៕

សម្តេចតេជោ ប្រាប់ពលរដ្ឋខ្មែរអាមេរិក ជិត ៦០០ នាក់ ថា “ទំនាក់ទំនងកម្ពុជា-អាមេរិក ល្អមិនធ្លាប់មាន“

រសៀលថ្ងៃទី ១៤ ខែ កុម្ភៈ ឆ្នាំ ២០១៦ នៅសហរដ្ឋអាមេរិក ត្រូវនឹងថ្ងៃទី ១៥ ខែ កុម្ភៈ ឆ្នាំ ២០១៦ នៅ កម្ពុជា, មុននឹងចូលរួមកិច្ចប្រជុំកំពូលពិសេសអាស៊ាន-អាមេរិក នៅថ្ងៃទី ១៥ និង ១៦ កុម្ភៈ សម្តេចតេជោ ហ៊ុន សែន បានឆ្លៀតឱកាសជួបសំណេះសំណាលជាមួយបងប្អូនខ្មែរជាង ៦០០ នាក់ ដែលរស់នៅ និងបានអញ្ជើញមកពីរដ្ឋនានា នៃសហរដ្ឋអាមេរិក នៅសណ្ឋាគារ Hyatt Regency។

សម្តេចបានជំរាបជូនប្រជាពលរដ្ឋរួមជាតិថា ការរួបរួមសាមគ្គីគ្នា គោរព និងស្រឡាញ់រាប់អានគ្នារបស់បងប្អូនខ្មែរនៅទូទាំងពិភពលោក ដោយមិនប្រកាន់និន្នាការនយោបាយ មានសារៈសំខាន់ណាស់ ក្នុងការធ្វើអោយខ្មែរគង់វង្ស រីកចម្រើន ដែលផ្ទុយពីការបង្កជម្លោះ បែកបាក់គ្នា នាំមកនូវការបាត់បង់ទឹកដី និងបរទេសជេរដៀលត្មេះ។ សម្តេចបានរំលឹកថា ពេលធ្វើដំណើរចេញពីចំណតអាកាសយានដ្ឋានអន្តរជាតិទីក្រុង Palm Spring មកកាន់ទីក្រុង Rancho Mirage រដ្ឋកាលីហ្វ័រញ៉ា សហរដ្ឋអាមេរិក, សម្តេចមិនបានឃើញមានបាតុករបិទផ្លូវ រារាំងដំណើររបស់សម្តេចទេ។

សម្តេចតេជោ បានចាត់ទុកថា ទំនាក់ទំនងរវាងកម្ពុជា និងអាមេរិកនាពេលបច្ចុប្បន្ន ជាទំនាក់ទំនងល្អមួយដែលមិនធ្លាប់មានពីមុនមក បើទោះបីជាមានបញ្ហាខ្លះៗ កើតមានរវាងប្រទេសទាំងពីរ កាលពីអតីតកាលក៏ពិតមែន។ ទំហំពាណិជ្ជកម្មរវាងប្រទេសទាំងពីរ មានរហូតដល់ជាង ៣ ពាន់លានដុល្លារសហរដ្ឋអាមេរិក ដែលផ្ទុយពីមុន មានមិនដល់រយលានផង។ “កម្ពុជានៅតែចង់ឲ្យមានទំហំពាណិជ្ជកម្មពីកម្ពុជា ទៅទីផ្សារអាមេរិក កាន់តែមានទំហំធំឡើងៗ” សម្តេចតេជោ បញ្ជាក់។

សម្តេចតេជោវាយតម្លៃថា ទំនាក់ទំនងល្អរវាងសហរដ្ឋអាមេរិក ជាមួយបណ្តាប្រទេសសមាជិកអាស៊ានដទៃទៀតជាការរួមចំណែកដល់ការបង្កើនទំនាក់ទំនងនៃបណ្តាប្រទេស ក្នុងតំបន់អាស៊ីប៉ាស៊ីហ្វិកទាំងមូលផងដែរ និងថា ការដែលកម្ពុជាចូលជាសមាជិកអាស៊ានធ្វើអោយទទួលបាននូវអត្ថន័យ និងអត្ថប្រយោជន៍ធំខ្លាំងណាស់...Read More

ធនធានមនុស្សក្លាយជាអាទិភាពទី ១, ហ្វេសប៊ុកបង្កើនល្បឿនដោះស្រាយកង្វល់ប្រជាពលរដ្ឋ

ថ្ងៃ ១១ កុម្ភៈ ឆ្នាំ ២០១៦ ថ្លែងសង្កថាសម្ពោធសាកលវិទ្យាល័យហេងសំរិនត្បូងឃ្មុំ សម្ដេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា ការវិនិយោគរបស់រដ្ឋ និងឯកជន លើវិស័យអប់រំ ដោយរុញច្រានសាលារៀនឱ្យទៅកៀកនឹងមូលដ្ឋានរបស់ប្រជាពលរដ្ឋ ជួយអោយប្រទេសកាត់បន្ថយបាននូវគម្លាតខាងខួរក្បាល។ សម្តេចអះអាងថា ការបណ្ដុះបណ្ដាលធនធានមនុស្សបានក្លាយ ទៅជាប្រធានបទគន្លឹះនៃការអភិវឌ្ឍរបស់កម្ពុជា ដែលកាត់បន្ថយគម្លាតផ្ទៃក្នុងខ្លួនឯងផង និងក៏កាត់បន្ថយគម្លាតអភិវឌ្ឍន៍ជាមួយប្រទេសដទៃថែមទៀតផង។ “អាទិភាព ៤ គឺ មនុស្ស, ទឹក, ផ្លូវ ភ្លើង ត្រូវតែដើរស្របគ្នា និងនៅតែជាអាទិភាពដែលយើងត្រូវដោះស្រាយ” សម្តេចតេជោបញ្ជាក់ និងកត់សម្គាល់ថា ការពង្រាយសាលាទៅជិតសិស្ស បានជួយអោយសិស្សមានលទ្ធភាពរៀនចប់ថ្នាក់ទី ៩ ហើយក៏បង្កឱកាសអោយយុវនារីនៅមូលដ្ឋាន អាចបន្តការសិក្សាបានដែរ។

ស្តីពី E-Government ឬរដ្ឋាភិបាលអេឡិកត្រូនិក ហើយក៏ជាការឆ្លើយតបទៅនឹងក្រុមអ្នកវិភាគ ដែលរិះគន់ថា ការដែលសម្ដេចប្រើហ្វេសប៊ុក ក្នុងការដោះស្រាយបញ្ហាជូនប្រជាពលរដ្ឋបានធ្វើឱ្យបាត់ប្រព័ន្ធការងាររបស់ក្រសួង ស្ថាប័ន រដ្ឋ, សម្ដេចទាញបំភ្លឺថា ការប្រើហ្វេសប៊ុកមិនចោលប្រព័ន្ធការងារដែលធ្លាប់មានពីមុនទេ ក៏ប៉ុន្តែវាបានបង្កើន និងពន្លឿនប្រសិទ្ធិភាពដោះស្រាយកង្វល់របស់ប្រជាពលរដ្ឋ។ “ខ្ញុំសូមផ្តាំត្រឡប់ទៅវិញ ខ្ញុំអត់ចោលប្រព័ន្ធការងារដែលធ្លាប់មានពីមុនទេ។ ខ្ញុំគ្រាន់តែបង្កើនល្បឿនឲ្យមន្ត្រីរបស់យើងគ្រប់ទីកន្លែង ដោះស្រាយការងារឲ្យបានលឿនបំផុតសម្រាប់ប្រជាពលរដ្ឋ” សម្តេចបញ្ជាក់៕

ទៅមុខថយក្រោយ