ការដកស្រង់ប្រសាសន៍សម្តេចតេជោ ថ្លែងក្នុងពិធីសម្ពោធគម្រោងដំណាក់កាលទីបី ជាជំនួយជប៉ុន ការពារទីក្រុងភ្នំពេញពីទឹកជំនន់ និងកែលម្អប្រព័ន្ធប្រឡាយ/លូ

សុន្ទរកថា-ការអធិប្បាយ

ខ្ញុំព្រះករុណាខ្ញុំ សូមក្រាបថ្វាយបង្គំ សម្តេចព្រះសង្ឃនាយក សម្តេចព្រះថេរានុថេរៈ គ្រប់ព្រះអង្គជាទីសក្ការៈ! ឯកឧត្តម គូម៉ាម៉ារុ រូជី (KUMAMARU Yuji) ឯកអគ្គរដ្ឋទូតនៃប្រទេសជប៉ុន! ឯកឧត្តម អាដាស៊ី អ៊ីតស៊ូ (ADACHI Itsu) ប្រធានទីភ្នាក់ងារសហប្រតិបត្តិការនៃប្រទេសជប៉ុន JICA ប្រចាំព្រះរាជាណាចក្រ​កម្ពុជា! ឯកឧត្តម លោកជំទាវ អស់លោក លោកស្រី បងប្អូនជនរួមជាតិជាទីគោរពស្រឡាញ់របស់ខ្ញុំព្រះករុណាខ្ញុំ!

ការវិភាគពីការផ្អាកពិធីបុណ្យអុំទូក ជាការប្រមាថ មិនអាចទទួលយកបាន

តេជោ តាមរយៈសារព័ត៌មាន

ថ្ងៃ ៥ វិច្ឆិកា ២០១៥ ជាអធិបតីនៃពិធីសម្ពោធគម្រោងការពារទឹកជំនន់ និងប្រព័ន្ធប្រឡាយ/លូ​ ក្រោមជំ​នួយ​ឥ​តសំ​ណងនៃប្រទេស​ជប៉ុន​ ដំណាក់កាលទី ៣ សម្តេចតេជោ ហ៊ុន សែន បញ្ជាក់ជាថ្មីថាកំពស់ទឹក ទន្លេមេគង្គ ដែលត្រូវបានព្យាករណ៍ថានឹងមានកំពស់ត្រឹមតែ ៤,២០ ម៉ែត្រ ធៀបទៅតាមធម្មតា ជុំវិញ ៧ ម៉ែត្រ គឺជាហេតុផលចម្បងក្នុងការផ្អាកពិធីបុណ្យអុំទូកនៅឆ្នាំនេះ។ សម្តេចតេជោ បានចាត់ទុកការធ្វើ​អត្ថា​ធិប្បាយដោយមជ្ឈដ្ឋានតាំងខ្លួនជាអ្នកវិភាគ និងប្រឆាំងថា ការផ្អាកពិធីបុណ្យអុំទូក មកពីមានការព្រួយបា​រម្ភ​ពីការធ្វើបាតុកម្មប្រឆាំងរបស់បក្សសង្គ្រោះជាតិ ជាការប្រមាថដ៏ព្រហើន មិនអាចទទួលយកបាន។

សម្តេចតេជោសង្ឃឹមថា នឹងមានគម្រោងជប៉ុនទី ៤ សម្រាប់ភ្នំពេញ

តេជោ តាមរយៈសារព័ត៌មាន

ថ្ងៃ ៥ វិច្ឆិកា ២០១៥ ដោយសង្កត់ធ្ងន់ទៅលើសារសំខាន់នៃជំនួយរបស់ប្រទេសជប៉ុន ចំពោះគម្រោងទំ​នប់ការពារក្រុងភ្នំពេញពីទឹកជំនន់ និងការរៀបចំប្រព័ន្ធប្រឡាយ/លូ សម្តេចតេជោ បានរំលឹកអំពីការប្រ​ឈមបីរបស់ទីក្រុង គឺទឹកជំនន់ សំរាម និងចរាចរណ៍។ ពាក់ព័ន្ធនឹងទឹកជំនន់ពីទន្លេ និងប្រភពនានា សម្តេចតេជោបានរំលឹកពី​ការរួមចំណែកនៃគម្រោងក្នុងដំណាក់កាលទីមួយ និងទីពីរ របស់ប្រទេសជប៉ុន ដើម្បីបញ្ជៀសទីក្រុងភ្នំពេញពីការជន់លិច។ ចំពោះការជន់លិចទីក្រុងដោយទឹកភ្លៀង សម្តេចតេជោ បាន​ទាញអារម្មណ៍អ្នកចូលរួមថា ករណីដែលមានភ្លៀងធ្លាក់ក្នុងកម្រិតខ្ពស់ ប្រព័ន្ធលូ នឹងមិនអាចរំដោះទឹក បានទាន់ពេលទេ ហើយករណីនេះកើតមាននៅច្រើនប្រទេស។