បច្ចុប្បន្នភាពកម្ពុជា

រាជរដ្ឋាភិបាលដាក់ផែនការឲ្យពន្ធដារប្រមូលចំណូល ឲ្យបាន១៧០០លានដុល្លារ ក្នុងឆ្នាំ២០១៧ និងពី១៩០០លានដុល្លារ ទៅ២០០០លានដុល្លារ ឆ្នាំ២០១៨

FN ៖ លោក គង់ វិបុល ប្រតិភូរាជរដ្ឋាភិបាលទទួលបន្ទុក ជាអគ្គនាយក អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានថ្លែងបញ្ជាក់ថា រាជរដ្ឋាភិបាលកម្ពុជា បានដាក់ចេញនូវផែនការឲ្យ អគ្គនាយកដ្ឋានពន្ធដារ ប្រមូលចំណូលពន្ធ ឲ្យបានតាមច្បាប់ ថវិកាដែលបានកំណត់ ដោយឆ្នាំ២០១៧នេះ ធ្វើយ៉ាងណាប្រមូលចំណូលពន្ធឲ្យបាន ក្នុងរង្វង់១,៧១៥លានដុល្លារ ហើយនៅឆ្នាំ២០១៨ មានផែនការប្រមូលចំណូលពន្ធឲ្យបាន ពី១,៩០០លានដុល្លារទៅ២,០០០លានដុល្លារ។

បើតាមលោក គង់ វិបុល ចំណូលពន្ធរបស់កម្ពុជា រយៈពេល៥ឆ្នាំចុងក្រោយនេះ បានកើនឡើងជាបន្តបន្ទាប់ ក្នុងអត្រាជាមធ្យម ២០% ក្នុង១ឆ្នាំ ជាក់ស្តែងនៅឆ្នាំ២០១២ ចំណូលពន្ធមានត្រឹមតែ៧០០លានដុល្លារតែប៉ុណ្ណោះ ប៉ុន្តែនៅឆ្នាំ២០១៧នេះ គឺត្រូវប្រមូលឲ្យបាន ១៧០០លានដុល្លារ ដែលបានកើនឡើង១ពាន់លានដុល្លារ។

ការថ្លែងបញ្ជាក់យ៉ាងដូច្នេះ របស់លោក គង់ វិបុល ធ្វើឡើងក្នុងឱកាសដែលលោក អញ្ជើញជាអធិបតីភាព ក្នុងសិក្ខាសាលាដ៏ធំប្រចាំឆ្នាំ ស្តីពីបច្ចុប្បន្នភាព នៃការកែទម្រង់ប្រព័ន្ធពន្ធដារកម្ពុជា និងកាតព្វកិច្ចសារពើពន្ធនានា ពិសេសពន្ធលើប្រាក់ចំណូល ដែលមានការចូលរួម ពីលោកឧកញ៉ា លោក លោកស្រី តំណាង សមាគម ពាណិជ្ជករនានា និងតំណាងសហគ្រាស អ្នកជាប់ពន្ធធំសរុបចំនួនជាង ១០០០ សហគ្រាស នៅឯសណ្ឋាគារសូហ្វីតែល ភូគីត្រាភ្នំពេញ។

លោក គង់ វិបុល បានថ្លែងយ៉ាងដូច្នេះថា «ខ្ញុំសូមជម្រាបថា នៅឆ្នាំ២០១៧នេះ គឺថវិកា (ប្រមូលចំណូលពន្ធ) ត្រូវឡើងពីឆ្នាំ២០១៦ ចំនួន២០% ដែលក្នុងរង្វង់១,៧១៥លានដុល្លារ បើប្រៀបធៀបពីឆ្នាំ២០១២ យើងបានតែ ៧០០លានដុល្លារ អីចឹងក្នុងរយៈពេល៤-៥ឆ្នាំចុងក្រោយនេះ គឺ កើនឡើងក្នុងរង្វង់២០% បើគិតទៅពី៧០០លានដុល្លារ មក១,៧០០លានដុល្លារ វាកើនឡើងជាង១ពាន់លាន។ ….ដើម្បីរកបាន១,៧០០លានដុល្លារ ហើយក្នុងឆ្នាំ២០១៨ ខាងមុខនេះ...Read More

ក្រសួងមហាផ្ទៃចេញសេចក្តីជូនដំណឹងថា សមាជវិសាមញ្ញជ្រើសរើសប្រធាន និងអនុប្រធានថ្មីរបស់គណបក្សសង្រ្គោះជាតិ​ ខុសច្បាប់

FN ៖ ក្រសួងមហាផ្ទៃបានចេញសេចក្តីជូនដំណឹងដ៏សំខាន់មួយដោយប្រកាសថា សមាជវិសាមញ្ញជ្រើស រើសប្រធាន និងអនុប្រធានថ្មី របស់គណបក្សសង្រ្គោះជាតិ កាលពីថ្ងៃទី០២ ខែមីនាកន្លងទៅគឺខុសច្បាប់ នេះបើយោងតាមសេចក្តីប្រកាស ដែលបណ្តាញព័ត៌មាន Fresh News ទើបទទួលបានមុននេះបន្តិច នាព្រឹកថ្ងៃទី២៣ ខែមីនា ឆ្នាំ២០១៧នេះ។

នៅក្នុងសេចក្តីប្រកាសរបស់ក្រសួងមហាផ្ទៃ ដែលចេញថ្ងៃទី២២ ខែមីនា ឆ្នាំ២០១៧ ចុះហត្ថលេខាដោយសម្តេចក្រឡាហោម ស ខេង បានបញ្ជាក់យ៉ាងដូច្នេះថា៖​ «បើផ្អែកតាមលក្ខន្តិកៈរបស់គណបក្សដែលបានតម្កល់ទុកនៅក្រសួងមហាផ្ទៃ ចុះថ្ងៃទី១០ ខែឧសភា ឆ្នាំ២០១៣ សមាជវិសាមញ្ញបោះឆ្នោតជ្រើសតាំងលោក កឹម សុខា ជាប្រធាន និងលោក ប៉ុល ហំម លោកស្រី មូរ សុខហួរ លោក អេង ឆៃអ៊ាង ជាអនុប្រធាននៃគណបក្សសង្រ្គោះជាតិ គឺបានអនុវត្តផ្ទុយនឹងប្រការ៤៧ ត្រេទី២ នៃលក្ខន្តិកៈគណបក្សដោយអាណត្តិនៅសល់មានរយៈពេលតិចជាង១៨ខែ គិតត្រឹមកាលបិរច្ឆេទដែលលោក សម រង្ស៊ី បានលាលែងចេញពីតំណែងជាប្រធានគណបក្សនៅថ្ងៃទី១១ ខែកុម្ភៈ ឆ្នាំ២០១៧»។

លើសពីនោះទៀត សេចក្តីប្រកាសរបស់ក្រសួងមហាផ្ទៃ ក៏បានស្នើឲ្យគណបក្សសង្រ្គោះជាតិ ដូរពាក្យស្លោករបស់ខ្លួន ព្រោះសារ នយោបាយរបស់គណបក្សសង្រ្គោះជាតិ «ដូរមេឃុំបម្រើបក្ស ដាក់មេឃុំបម្រើរាស្រ្ត» មានខ្លឹមសារផ្ទុយនឹងស្មារតីរដ្ឋធម្មនុញ្ញឆ្នាំ១៩៩៣ ច្បាប់ស្តីពីគណបក្សនយោបាយ ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ និងច្បាប់ស្តីពីការគ្រប់គ្រងរដ្ឋបាលឃុំ សង្កាត់ ពិសេសរបបប្រជាធិបតេយ្យសេរីពហុបក្សនៅកម្ពុជា និងគោលការណ៍នៃប្រព័ន្ធបោះឆ្នោតសមាមាត្រ៕

អ្នកជំនាញជប៉ុន និងអាជ្ញាធរជាតិអប្សរា ពិភាក្សាបញ្ហាបច្ចេកទេស សម្រាប់ការអភិរក្ស និងជួសជុលស្ពានហាលប្រាសាទអង្គរវត្ត

FN ៖ ស្ពានហាលផ្លូវ ចូលខាងលិចប្រាសាទអង្គរវត្ត កំពុងត្រូវបានជួសជុលឡើងវិញ ដោយអាជ្ញាធរជាតិអប្សរា សហការជាមួយសាកលវិទ្យាល័យសូហ្វីយ៉ា ប្រទេសជប៉ុន។

ដើម្បីឱ្យកិច្ចការជួសជុលនេះ ស្របតាមអនុសាសន៍ ណែនាំរបស់គណៈកម្មាធិការ ICC-Angkor សាកលវិទ្យាល័យសូហ្វីយ៉ា បានបើកកិច្ចពិភាក្សាជាបន្តបន្ទាប់ពី បណ្តាអ្នកជំនាញផ្សេងៗជាច្រើន។ ដោយឡែកនៅថ្ងៃទី១៧ ខែមីនា ឆ្នាំ២០១៧មានកិច្ចពិភាក្សាមួយបានរៀបចំ ឡើងនៅសាកលវិទ្យាល័យសូហ្វីយ៉ា នាទីក្រុងតូក្យូប្រទេសជប៉ុន។

កិច្ចពិភាក្សានេះ មានការចូលរួមពីលោកសាស្រ្តាចារ្យ យូស៊ីអាគី អ៊ីហ្សីសាវ៉ា ប្រធានមជ្ឈមណ្ឌលអាស៊ីសិក្សាស្រាវជ្រាវ និងបណ្តុះបណ្តាលធនធានមនុស្ស នៃសាកលវិទ្យាសូហ្វីយ៉ា លោក លី វណ្ណា ប្រធាននាយកដ្ឋានអភិរក្ស ប្រាសាទក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា និងមន្រ្តីជំនាញដែលជាអ្នកចូលរួមផ្ទាល់ ក្នុងកិច្ចការជួសជុលស្ពានហាលនេះ។ ដោយឡែកអ្នកជំនាញជប៉ុនជាច្រើនរូប ដែលមានជំនាញពាក់ព័ន្ធផ្សេងៗ ត្រូវបានអញ្ជើញដោយសាកលវិទ្យាល័យសូហ្វីយ៉ា ដើម្បីចូលរួមផ្តល់យោបល់បន្ថែមទៀត លើកិច្ចការជួលជុលស្ពានហាលនេះ ឱ្យសម្រេចបានជោគជ័យនាពេលខាងមុខ។

លោក លី វណ្ណា ក្នុងនាមអាជ្ញាធរជាតិអប្សរា បានថ្លែងអំណរគុណ ចំពោះសាកលវិទ្យាល័យសូហ្វីយ៉ា និងអ្នកជំនាញទាំងអស់ ដែលមកពីសាកលវិទ្យាល័យ និងស្ថាប័នពាក់ព័ន្ធផ្សេង នៅប្រទេសជប៉ុនដែលបានផ្តល់ យោបល់ជាជំនួយផ្នែកបច្ចេកទេស ដ៏សំខាន់ក្នុងពេលនេះ។

អាជ្ញាធរជាតិអប្សរា នឹងទទួលយកយោបល់ដ៏ល្អៗ ទាំងនោះដាក់ឆ្លងទៅអ្នកជំនាញអន្តរជាតិ ដើម្បីពិនិត្យផ្តល់យោបល់ បន្ថែមទៀត សំដៅធ្វើយ៉ាងណាឱ្យកិច្ចការ ជួសជុលនេះទទួលបានផ្លែផ្កាល្អ រក្សាបាននូវស្ថានភាពដើម ហើយស្របតាមលក្ខខណ្ឌផ្សេងៗ ដែលបានកំណត់ដោយគណៈកម្មាធិការបេតិកភណ្ឌពិភពលោក៕

លោក ហ៊ាន សាហ៊ីប៖ វិស័យឯកជនជាក្បាលម៉ាស៊ីនអូសកំណើនសេដ្ឋកិច្ច និងរួមចំណែកបង្កើនប្រភពទុនវិនិយោគ

FN ៖ លោកបណ្ឌិត ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានគូសរំលេចថា វិស័យឯកជនបានតួនាយ៉ាងសំខាន់ក្នុងការអូសកំណើនសេដ្ឋកិច្ចជាតិ ព្រមទាំងរួមចំណែកបង្កើនប្រភពទុនវិនិយោគ និងបង្កើនការងារជូនប្រជាពលរដ្ឋ។ ក្រៅពីនោះ វិស័យឯកជន ក៏បានរួមចំណែកបង្កើនប្រភពចំណូលថវិកាជាតិ តាមរយៈការបង្កើតតម្រូវការក្នុងស្រុក និង ការបង់ពន្ធជូនរដ្ឋជាដើម។

លោក ហ៊ាន សាហ៊ីប ថ្លែងដូច្នេះក្នុងពេលរូបលោកអញ្ជើញជាអធិបតី​ ក្នុងពិធីចុះហត្ថលេខាលើអនុស្សារណៈយោគយល់ នៃកិច្ចសហប្រតិបត្តិការរវាងក្រសួងសេដ្ឋកិច្ច និងហិរញ្ញវត្ថុជាមួយក្រុមហ៊ុនភេសជ្ជៈកម្ពុជា កូកា-កូឡា នាព្រឹកថ្ងៃទី២២ ខែមីនា ឆ្នាំ២០១៧នេះ។ ការចុះហត្ថលេខាពង្រឹងកិច្ចសហប្រតិបត្តិការនេះ ធ្វើឡើងក្នុងបំណងពង្រឹងសមត្ថភាព លើកកម្ពស់ការយល់ដឹងពាក់ព័ន្ធវិស័យសេដ្ឋកិច្ច និង ហិរញ្ញវត្ថុ និង ការអភិវឌ្ឍសេដ្ឋកិច្ចកម្ពុជា។

លោក ហ៊ាន សាហ៊ីប បានហៅកិច្ចសហប្រតិបត្តិការនេះ ពិតជាមានសារៈសំខាន់សម្រាប់ក្រសួងសេដ្ឋកិច្ច និងហិរញ្ញវត្ថុក្នុងការផ្សព្វផ្សាយ និង ផ្តល់ព័ត៌មានទៅកាន់វិស័យឯកជន ព្រមទាំងទទួលបាននូវទិន្នន័យចាំបាច់ពីវិស័យឯកជនវិញ ដើម្បីធ្វើការសិក្សាស្រាវជ្រាវ និង រៀបចំគោលនយោបាយថ្មីៗប្រកបដោយប្រសិទ្ធភាព និងដោះស្រាយបាននូវក្តីកង្វល់ ឬ សំណូមពររបស់វិស័យឯកជន។

លោករដ្ឋលេខាធិការបានបន្ថែមថា កិច្ចសហប្រតិបត្តិការសេដ្ឋកិច្ចរវាងរដ្ឋ និង វិស័យឯកជនខាងលើនេះ នឹងជួយធ្វើឱ្យរាជរដ្ឋាភិបាលបានយល់ដឹងបន្ថែមអំពីការលំបាក បញ្ហាប្រឈម ក្តីកង្វល់ ឬ សំណូមពររបស់វិស័យឯកជន ដែលជាធាតុចូលដ៏សំខាន់សម្រាប់រាជរដ្ឋាភិបាលក្នុងការរៀបចំគោលនយោបាយ និង ដាក់ចេញនូវវិធានការចាំបាច់នានា ឱ្យអាចឆ្លើយតបបានទៅនឹងការរីកចម្រើន និងការវិវត្តថ្មីៗរបស់សង្គម-សេដ្ឋកិច្ច ទាំងក្នុងបច្ចប្បន្ន និង អនាគត។

«វិស័យឯកជនជាក្បាលម៉ាស៊ីនអូសកំណើនសេដ្ឋកិច្ច និង បានចូលរួមចំណែកក្នុងការបង្កើនប្រភពទុនវិនិយោគ ការងារធ្វើ និង ចំណូលថវិកាជាតិ ជាក់ស្តែងឆ្នាំ២០១៦នេះ លំហូរទុនវិនិយោគផ្ទាល់ពីបរទេសសរុបមានប្រមាណ ២,០០០លានដុល្លារអាមេរិក កើនឡើងខ្ពស់ជាងឆ្នាំ២០១៥ ដែលមានប្រមាណ ១,៧០០លានដុល្លារអាមេរិក។ ជាមួយនេះ ទំហំទុនវិនិយោគសរុបលើឧស្សាហកម្មភេសជ្ជៈ ក៏មានការកើនឡើង ដែលជាសញ្ញាវិជ្ជមានមួយនៃការរីកលូតលាស់របស់វិស័យឧស្សាហកម្មមិនមែនកាត់ដេរ ដោយបានឆ្លើយតបនឹងគោលនយោបាយអភិវឌ្ឍវិស័យឧស្សាហកម្មកម្ពុជា ២០១៥-២០២៥»។ លោកបណ្ឌិត...Read More

កម្ពុជាស្វែងរកការចុះអនុស្សរណៈ ជាមួយទីម័រខាងកើត ដើម្បីពង្រឹងទំនាក់ទំនងពាណិជ្ជកម្ម

FN ៖ នៅសណ្ឋាគារសុខាអង្គរ ខេត្តសៀមរាប នាព្រលប់ថ្ងៃទី២១ ខែមីនា ឆ្នាំ២០១៧ រដ្ឋមន្ត្រីក្រសួងពាណិជ្ជកម្មរបស់កម្ពុជា លោក ប៉ាន សូរស័ក្តិ បានស្នើឲ្យប្រទេសទីម័រខាងកើតចុះអនុស្សរណៈ (MoU) ជាមួយសភាពាណិជ្ជកម្មកម្ពុជា នៅក្នុងខែឧសភាខាងមុខនេះ ដើម្បីជំរុញកិច្ចសហប្រតិបត្តិការវិស័យឯកជន និងពង្រឹងទំនាក់ទំនងពាណិជ្ជកម្មរវាងប្រទេសទាំងពីរ។

លោក ប៉ាន សូរស័ក្តិ បានលើកឡើងដូចនេះ ក្នុងខណៈដែលលោកបានជួបពិភាក្សាទ្វេភាគីជាមួយលោក អ៉ីស្តានីសឡូ អាឡិចហ្សូ ដាស៊ីលវ៉ា (Estanislau Alexo Da Silva) រដ្ឋមន្ត្រីក្រសួងសេដ្ឋកិច្ច កសិកម្ម និងនេសា ទនៃប្រទេសទីម័រខាងកើត ដែលបានសុំឲ្យកម្ពុជា ចែករំលែកបទពិសោធន៍លើការចូលជាសមាជិកនៃអង្គការពាណិជ្ជកម្មពិភពលោក (WTO) ការធ្វើពិពិធកម្មនាំចេញផលិតផលកសិកម្ម និងការអភិវឌ្ឍវិស័យទេសចរណ៍។

លោក ប៉ាន សូរស័ក្តិ បានបន្តថា ប្រទេសទីម័រខាងកើត បានព្រមព្រៀងទិញអង្ករពីកម្ពុជាចំនួន ២០ម៉ឺនតោន ក្នុងមួយឆ្នាំ ប៉ុន្តែប្រទេសទាំងពីរពុំទាន់បានចុះ MoU ជាមួយគ្នានៅឡើយ ហើយការមាន MoU រវាងសភាពាណិជ្ជកម្មនៃប្រទេសទាំងពីរ នឹងជួយសម្រួលដល់ការផ្លាស់ប្តូរបទពិសោធន៍ និងពង្រឹងសមត្ថភាពនាំចេញរបស់វិស័យឯកជន ព្រមទាំងការអភិវឌ្ឍ និងផ្សព្វផ្សាយឧស្សាហកម្មទេសចរណ៍ថែមទៀត។

ជាការឆ្លើយតបលោក អ៉ីស្តានីសឡូ អាឡិចហ្សូ ដាស៊ីលវ៉ា បានសន្យានឹងនាំយកសំណើនេះ ទៅពិភាក្សាជាមួយប្រមុខរាជរដ្ឋាភិបាលទីម័រខាងកើត ដើម្បីពន្លឿនការចុះអនុស្សរណៈជាមួយកម្ពុជា ឲ្យបានលឿនតាមដែលអាចធ្វើបាន។

លើសពីនេះលោក អ៉ីស្តានីសឡូ អាឡិចហ្សូ ដាស៊ីលវ៉ា ក៏បានថ្លែងអំណរគុណយ៉ាងជ្រាលជ្រៅ ចំពោះក្រសួងពាណិជ្ជកម្ម និងរាជរដ្ឋាភិបាលកម្ពុជា ដែលបានចែករំលែកបទពិសោធន៍ល្អៗ និងជួយគាំទ្រប្រទេសទីម័រខាងកើត ក្នុងការចូលជាសមាជិកសមាគមប្រជាជាតិអាស៊ីអាគ្នេយ៍ ឬអាស៊ាន និងសមាជិកអង្គការ WTO៕

ឧបនាយករដ្ឋមន្ត្រី ទៀ បាញ់៖ មានអ្នកខ្លះមិនដែលទទួលស្គាល់ ការរីកចម្រើនដ៏ពិតប្រាកដរបស់កម្ពុជានោះទេ

FN ៖ ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ នៅព្រឹកថ្ងៃទី២២ ខែមីនា ឆ្នាំ២០១៧នេះ បានលើកឡើងថា ជនមួយចំ​នួនមិនដែលទទួលស្គាល់ នូវការរីក ចម្រើនដ៏ពិតប្រាកដរបស់ប្រទេសកម្ពុជានោះទេ ទោះបីជារាជរដ្ឋាភិបាលខិតខំប្រឹងប្រែងយ៉ាងណាក៏ដោយ ហើយពួកគេបែរជារិះគន់ថាកម្ពុជាអត់គោរពសិទ្ធិមនុស្ស ហើយសម្លាប់ប្រជាធិបតេយ្យវិញ។

ការលើកឡើងរបស់ ឧបនាយករដ្ឋមន្ត្រី ទៀ បាញ់ បានធ្វើឡើងនៅក្នុងពិធីសម្ពោធសមិទ្ធផល «គម្រោងការបង្កើតមជ្ឈមណ្ឌលហ្វឹកហ្វឺនអាកាសចរស៊ីវិលនៅកម្ពុជា» ក្រោមកិច្ចសហប្រតិបត្តិការ រវាងរដ្ឋាភិបាលនៃប្រទេសកម្ពុជា និងរដ្ឋាភិបាលនៃប្រទេសកូរ៉េ នៅទីស្នាក់ការរបស់ អាកាសចរណ៍ស៊ីវិល នាថ្ងៃទី២២ ខែមីនា ឆ្នាំ២០១៧នេះ។

ឧបនាយករដ្ឋមន្ត្រីបានលើកឡើងយ៉ាងដូច្នោះថា​​ «ខ្ញុំមានឆ្ងល់មួយ មានអ្នកខ្លះបដិសេធ ហើយក៏មើលមិនឃើញចំពោះភាពរីកចម្រើនរបស់កម្ពុជាទេ បែរជារកគ្រប់វិធីទាំងអស់ ទៅប្រមែលប្រមូលនៅភាពអសកម្ម វៃប្រហាររាជរដ្ឋាភិបាល វៃប្រហាការរីកចម្រើន គ្រប់ផ្នែកទាំងអស់ជាបន្តបន្ទប់ទៅវិញ»។

លោកបានបន្ថែមថា «អត់ដែលទទួលស្គាល់ការរីកចម្រើនដ៏ពិតប្រាកដរបស់កម្ពុជានោះទេ នេះជារឿងមួយ និងរឿងមួយទៀត បែរជាឃើញណាស់ ឃើញខ្លាំង ខ្លាចមែនទែនថា កម្ពុជាអត់គោរពសិទ្ធិមនុស្ស និងកម្ពុជាគឺកំពុងតែសម្លាប់ប្រជាធិបតេយ្យ ទៅណាទៅន័យវិញ ដែលហួសពីធាតុពិតនូវ អ្វីដែលកើតឡើង នៅប្រទេសកម្ពុជា»។

លោក ទៀ បាញ់ បានបញ្ជាក់បន្ថែមទៀតថា កម្ពុជាមិនដែល ធ្វើអ្វីហួសហេតុទេ។ កម្ពុជាបានបើកសិទ្ធិសេរីភាពគ្រប់បែបយ៉ាងទាំងអស់ ប៉ុន្ដែនៅគេចោទថា អត់គោរពសិទ្ធិ និងអត់មានប្រជាធិបតេយ្យ៕

រដ្ឋមន្រ្តីស្តីទីក្រសួងការងារ៖ ជប៉ុននឹងបណ្ដុះបណ្ដាលជំនាញជួសជុលរថយន្ដ ដល់សិក្ខាកាមកម្ពុជារយៈពេល៣ឆ្នាំ

FN ៖ រដ្ឋមន្ត្រីស្តីទីក្រសួងការងារ និងបណ្ដុះបណ្ដាលវិជ្ជាជីវៈ លោក ពេជ សោភ័ន បានថ្លែងឲ្យដឹងថា រដ្ឋាភិបាលជប៉ុនគ្រោង​ទទួលសិក្ខាកាមកម្ពុជា ទៅបណ្ដុះបណ្ដាលបច្ចេកទេសជួសជុលរថយន្ដ រយៈពេល៣ឆ្នាំ​ នៅប្រទេសរបស់ខ្លួន ប៉ុន្ដែមុននឹងទទួលសិក្ខាកាម គ្រូជប៉ុននឹងបង្រៀនសិក្ខាកាមឲ្យចេះនិយាយភាសាជប៉ុនជាមុនសិន។

លោក ពេជ សោភ័ន ថ្លែងបែបនេះធ្វើឡើងនៅក្នុងសិក្ខាសាលាស្ដីពី ការបណ្ដុះបណ្ដាលជាងរថយន្ដ រវាង​កម្ពុជា និងជប៉ុននៅថ្ងៃទី២១ ខែមីនា ឆ្នាំ២០១៧នេះ ក្រោមកិច្ចសហការរៀបចំដោយក្រសួងការងារកម្ពុជា ជាមួយក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ក្នុងគោលបំណងផ្សព្វផ្សាយ និងចែករំលែកបទពិសោធន៍ របស់ប្រទេសជប៉ុន ក្នុងការបណ្ដុះបណ្ដាលជំនាញ​ និងបច្ចេកទេសជួសជុលរថយន្ដ សំដៅរួមចំណែកដល់ការពង្រឹងការបណ្ដុះបណ្ដាលជំនាញបច្ចេកទេសជួសជុល ថែទាំរថយន្ដនៅកម្ពុជា។

រដ្ឋមន្រ្តីស្ដីទីបានថ្លែងថា «រដ្ឋាភិបាលជប៉ុនបានបញ្ជូនអ្នកស្រាវជ្រាវជប៉ុន មកកម្ពុជា ដើម្បីសិក្សាអំពីការបណ្ដុះបណ្ដាលជំនាញថែទាំ និងឈៀករថយន្ដ នៅតាមគ្រឹះស្ថានបណ្ដុះបណ្ដាល ដើម្បីបង្កើនសមត្ថភាពលើជំនាញនេះនៅកម្ពុជា»។ ជាមួយគ្នានោះ​ ជប៉ុននឹងបង្រៀនផ្នែកភាសាជប៉ុន ដល់សិក្ខាកាមកម្ពុជា នៅតាមគ្រឹះស្ថានបណ្ដុះបណ្ដាលបច្ចេកទេស មុននឹងទទួលសិស្សទៅធ្វើកម្មសិក្សា​ក្នុងប្រទេសរបស់ខ្លួនរយៈពេល៣ឆ្នាំ។

ក្នុងចំណោមគ្រឹះស្ថានបណ្ដុះបណ្ដាលបច្ចេកទេស និងវិជ្ជាជីវៈទាំង៣៩ ដែលស្ថិតក្រោមឱវាទក្រសួងការងារ មានគ្រឹះស្ថានចំនួន១២ ទទួលបានវិញ្ញាបណ្ណបត្រកម្រិតអន្ដរជាតិ លើ​បទដ្ឋានគ្រប់គ្រងប្រព័ន្ធអប់រំបណ្ដុះបណ្ដាលបច្ចេកវិទ្យា និងវិជ្ជាជីវៈ និងមានគ្រឹះស្ថានចំនួន១១ ដែលមានផ្ដល់ការបណ្ដុះបណ្ដាល​ផ្នែកមេកានិក រថយន្ដ វិស្វកម្មរថយន្ដ យន្ដសាស្រ្ដរថយន្ដ និងជួសជុលរថយន្ដ។ លោកថា «ដោយមើលឃើញពីសារៈសំខាន់នៃជំនាញនេះ រដ្ឋាភិបាលកម្ពុជា និងជប៉ុន ក៏បានព្រមព្រៀងធ្វើកិច្ចសហប្រតិបត្តិការក្នុងការផ្លាស់ប្ដូរបទពិសោធន៍អំពីជំនាញជួសជុលរថយន្ដនេះ»។

លោក ពេជ សោភ័ន បានជឿជាក់យ៉ាងមុតមាំលើរដ្ឋាភិបាលជប៉ុន ថានឹងជួយបំពេញបន្ថែមរាល់ចំណុចខ្វះខាត ក្នុងវិស័យបណ្ដុះបណ្ដាលបច្ចេកទេស និងវិជ្ជាជីវៈ ជាពិសេសផ្នែកជួសជុលរថយន្ដ ដោយក្នុងនោះ មានការបន្ថែមនូវការពង្រឹងគុណភាពគ្រូ ការផ្ដល់ជំនួយបច្ចេកទេសដល់កម្ពុជា៕

ឧបនាយករដ្ឋមន្រ្តី ម៉ែន សំអន៖ វិស័យអប់រំនៅកម្ពុជា មានការរីកចំរើនគួរឲ្យកត់សំគាល់ តែបញ្ហាប្រឈមនៅតែមាន ទាមទារឲ្យដោះស្រាយជាបន្តបន្ទាប់

FN ៖ លោកស្រី ម៉ែន សំអន ឧបនាយករដ្ឋមន្រ្តី និងជារដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងឲ្យដឹងថា យោងតាមរបាយការណ៍របស់លោក ហង់ ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា វិស័យអប់រំនៅកម្ពុជា ​មានការរីកចម្រើនគួរជាទីមោទនៈ ពោលគឺសាលា​មត្តេយ្យ​សិក្សា សា​លាចំ​ណេះ​ទូទៅ គ្រឹះស្ថានឧត្តមសិក្សា និងចំនួនសិស្ស-និស្សិតគ្រប់ភូមិសិក្សាទាំងផ្នែកសាធារណៈ និងផ្នែកឯកជន មានការរីកចម្រើនជាបន្តបន្ទាប់ គួរឱ្យកត់សម្គា​ល់​។

តែយ៉ាងនេះក្តីលោកស្រី ម៉ែន សំអនថា «បើទោះជា​ក្រសួងអប់រំ យុវជន និងកីឡាសម្រេចបានសមិទ្ធផលធំៗជាច្រើន គួរឱ្យកត់សម្គាល់ក្តី ក៏ក្រសួងនៅមានបញ្ហាប្រឈម មួយចំនួនដែលត្រូវដោះ​ស្រាយជាបន្តបន្ទាប់ និង​ជា​ប្រចាំពិសេសនៅក្នុងដំណាក់កាលកំណែទម្រង់ស៊ីជម្រៅ រយៈពេលបីឆ្នាំ ចុងក្រោយនេះ»។ ការប្រឈមទាំងនោះរួមមា​ន គុណភាពអប់រំ គុណភាពគ្រូ តុល្យភាពរវាងថ្នាក់រៀន និងចំនួនសិស្សដែ​ចេះតែកើនឡើង ពីមួយឆ្នាំទៅមួយឆ្នាំ និងភាពស៊ីសង្វាក់គ្នារវាង​ការអប់រំ ការបណ្តុះបណ្តាល និងទីផ្សារការងារ។​

ជាមួយគ្នានោះលោកស្រី ម៉ែន សំអន បានឲ្យដឹងទៀតថា រាជរដ្ឋាភិបាល​ បាននិងកំពុងខិតខំប្រឹងប្រែង យ៉ាងសកម្ម​ក្នុងកា​រ​កសា​ងហេដ្ឋា​រចនា​សម្ព័ន្ធរូបវ័ន្ត អប់រំ និងការបង្កើត សាលារៀនឲ្យបានច្រើនថែមទៀ​ត ដែលជាការវិនិយោគរយៈពេលវែង ដ៏សំខាន់សម្រាប់ប្រជាពលរដ្ឋទាំងអស់ សំដៅ រួមចំណែកដល់ការកាត់បន្ថយភាពក្រីក្រ និងលុបបំបាត់នូវវដ្តនៃភាពក្រីក្រ តាមរយៈការផ្ដល់ឱកាសទទួលបាន សេវាអប់រំ និងចំណេះដឹង ដល់ប្រជាជ​នទូទៅទាំងអស់គ្នា។

កន្លងមកនេះសាលារៀន ត្រូវបានសាងសង់គ្រប់ច្រកល្ហ​ក ​រហូតដល់ភូមិដាច់ស្រយាល​ ក្នុងគោលដៅបង្ខិតសាលារៀន ឱ្យទៅជិតលំ​នៅឋាន​​របស់ប្រជាពលរដ្ឋ ដើម្បីភាពងាយស្រួលថែមទៀត ដល់កូនចៅប្រជាជន ក្នុងការសិក្សាជាពិសេស សម្រាប់សិស្សនារី។ លោកស្រី ម៉ែន សំអន បានថ្លែងបែបនេះ ខណៈលោកស្រីចូលរួមនៅក្នុងពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០១៥-២០១៦ និងលើកទិសដៅសម្រាប់ឆ្នាំសិក្សា ២០១៦-២០១៧...Read More

រដ្ឋមន្រ្តីក្រសួងបរិស្ថាន អះអាងថា នឹងប្រែក្លាយតំបន់ការពារធម្មជាតិ ឲ្យទៅជាតំបន់ដែលមាន​ការអភិវឌ្ឍផ្នែក​ទេចរណ៍​ធម្មជាតិ

FN ៖ លោក សាយ សំអាល់ រដ្ឋមន្ត្រីក្រសួងបរិស្ថាន បានអះអាងឲ្យដឹងនៅព្រឹកថ្ងៃទី២១ ខែមីនា ឆ្នាំ២០១៧នេះថា ក្រសួងបរិស្ថាន នឹងប្រែក្លាយ តំបន់ការពារធម្មជាតិឲ្យទៅជាតំបន់មួយ ដែលមានការអភិវឌ្ឍផ្នែកទេចរណ៍ធម្មជាតិចូលរួម ក្នុងការលើកស្ទួយជីវភាពប្រជាសហគមន៍ នៅជុំវិញតំបន់ការពារធម្មជាតិទាំងអស់ឲ្យបានល្អប្រសើរ។

ការអះអាងយ៉ាងដូច្នោះ បានធ្វើឡើងនៅក្នុង វេទិកាស្តីពី «ភាពរស់រវើករបស់ប្រជាជនយើង បេតិកភណ្ឌវប្បធម៌​ជាអត្តសញ្ញាណ​របស់យើង បរិស្ថានជាអនាគតរបស់យើង»ដែលរៀបចំរួមគ្នារវាងក្រសួងបរិស្ថាន និងក្រសួងទេសចរណ៍ ក្រោមអធិបតីភាព លោក សាយ សំអាល់ រដ្ឋមន្ត្រីក្រសួងបរិស្ថាន និងលោក ថោង ខុន ​រដ្ឋមន្ត្រីក្រសួងទេសចរណ៍។

លោក សាយ សំអាល់ បានថ្លែងយ៉ាងដូច្នោះថា «យើងនឹងប្រែក្លាយតំបន់ការពារធម្មជាតិទៅជាតំបន់មួយ ដែលមានការ​អភិវឌ្ឍ​ផ្នែក​ទេចរណ៍ធម្មជាតិ ចូលរួមក្នុងការលើកស្ទួយជីវភាពប្រជាសហគមន៍ នៅជុំវិញតំបន់ការពារធម្មជាតិ ទាំងអស់ឲ្យបានល្អ​ប្រសើរតាមរយៈការបង្កើតតំបន់ទេសចរណ៍ធម្មជាតិនានា បង្កើតមុខរបរ បង្កើនចំណូល និងបង្កើនការអប់រំបណ្តុះបណ្តាល​ធនធាន មនុស្សនៅតំបន់នោះ ដើម្បីឲ្យបងប្អូន ចេះគ្រប់គ្រងផល ដែលមកបានពីវិស័យទេសចរណ៍ ឲ្យកាន់តែមាន​ប្រសិទ្ធភាព បន្ថែមទៀតនិងធ្វើឲ្យការងារអភិរក្សតំបន់ការពារធម្មជាតិ ទាំងនោះឲ្យកាន់តែពេញលេញថែមទៀត»។

លោកបានបន្ថែមទៀតថា «យើងគួរបង្កើត ឲ្យមានសាលារៀននៅតាមតំបន់ទាំងនោះ ឲ្យបានច្រើនបន្ថែមទៀត ដើម្បីផ្តល់ឱកាស ដល់កូនៗប្រជាពលរដ្ឋនៅជុំវិញតំបន់ការពារធម្មជាតិ មានលទ្ធភាពគ្រប់គ្រាន់ ក្នុងការសិក្សា ហើយលោកចង់ឲ្យកូនអ្នកស្រុកទាំងនោះ បានសិក្សាឲ្យបានខ្ពស់»។

លោក ថោង ខុន រដ្ឋមន្ត្រីក្រសួងទេសចរណ៍ បានគាំទ្រចំពោះគំនិតផ្តួចផ្តើម របស់ក្រសួងបរិស្ថាន និង​បានឯកភាពជាមួយ​លោករដ្ឋមន្ត្រីក្រសួងបរិស្ថានដែលថាបច្ចុប្បន្ននេះ ប្រជាពលរដ្ឋដែលមានជីវភាពមធ្យមមាន ចំនួនច្រើន ហើយអ្វីដែលសំខាន់គឺប្រជាពលរដ្ឋត្រូវការសេវាពីរ សំខាន់គឺធ្វើកីឡាដើម្បីសុខភាព និងការដើរកម្សាន្ត ដែលទាមទារ ឲ្យមានកន្លែងសម្រាប់ធ្វើទេសចរណ៍។

គួរបញ្ជា្កក់ថា នៅក្នុងវេទិកាស្តីពី «ការការពារនិងគ្រប់គ្រងធនធានធម្មជាតិ រៀបចំឡើងកាលពីថ្ងៃទី២២ ខែសីហា ឆ្នាំ២០១៦ រាជរដ្ឋាភិបាលបានជំរុញឲ្យក្រសួងបរិស្ថានរៀបចំគម្រោងអភិវឌ្ឍន៍សហគមន៍តំបន់ការពារធម្ម ជាតិដើម្បីលើកកម្ពស់ជីវភាព រស់នៅរបស់ប្រជាសហគមន៍ក៏ដូចជាការកាត់បន្ថយការពឹងអាស្រ័យលើផល និងអនុផលព្រៃឈើ និងការបរបាញ់សត្វព្រៃ»៕

ឧត្តមសេនីយ៍ឯក ហ៊ុន ម៉ាណែត៖ ការបរិច្ចាគ​ឈាមរបស់កងទ័ព​ជូនប្រជាជន បានឆ្លុះបញ្ចាំង​ឃើញថា កងទ័ពប្រសូត្រ​ចេញពីប្រជាជន និងធ្វើអ្វីៗដើម្បីប្រជាជន

FN ៖ ឧត្តមសេនីយ៍ឯក ហ៊ុន ម៉ាណែត ប្រធាននាយកដ្ឋានពិសេស និងជាមេបញ្ជាការដ្ឋានកម្លាំងពិសេសប្រឆាំងភេរវកម្ម ក្នុងពិធីបរិច្ចាគដោយស្ម័គ្រចិត្តនៅថ្ងៃទី២១ ខែមិនា ឆ្នាំ២០១៧នេះ បានថ្លែងថា ការស្ម័គ្រចិត្តបរិច្ចាគឈាមជូនប្រជាជន ដោយ​កាយវិការមនុស្សធម៌របស់កងទ័ព បានឆ្លុះបញ្ចាំងឱ្យឃើញថា កងទ័ពប្រសូត្រចេញពីប្រជាជន និងធ្វើអ្វីៗដើម្បី​ប្រជាជន។

ពិធីបរិច្ចាគឈាមខាងលើ ប្រារព្ធឡើងក្រោមប្រធានបទ «ឈាមរបស់យើង គឺជាឱសថដ៏ស័ក្តិសិទ្ធ សម្រាប់សង្គ្រោះជីវិត​មនុស្ស» នៅមជ្ឈមណ្ឌលជាតិផ្តល់ឈាម រាជធានីភ្នំពេញ ដែលមានការចូលរួមបរិច្ចាគឈាម ពីកម្លាំងយោធានៃបញ្ជា​ការដ្ឋានកម្លាំងពិសេសប្រឆាំងភេរវកម្ម ជាង៣៥០នាក់។

លោកឧត្តមសេនីយ៍ឯកបានលើកឡើងថា «ការស្ម័គ្រចិត្តបរិច្ចាគឈាម ដោយកាយវិការមនុស្សធម៌របស់យើង ថ្ងៃនេះគឺជាការ​ឆ្លុះបញ្ចាំងឱ្យឃើញថា កងទ័ពប្រសូត្រចេញពីប្រជាជន និងធ្វើអ្វីៗគ្រប់បែបយ៉ាងដើម្បីប្រជាជន»។

តាមរយៈកម្មវិធីការបរិច្ចាគឈាមនេះ លោកឧត្តមសេនីយ៍មេបញ្ជាការសង្ឃឹមថា នាយទាហាន នាយទាហានរង និងពល​ទាហាន​ទាំងអស់ នឹងបានយល់កាន់តែច្បាស់ អំពីអត្ថប្រយោជន៍ និងសារៈសំខាន់ នៃការផ្តល់ឈាមដែលអ្នកទាំងអស់គ្នា អាចធ្វើបានក្នុងនាមជាមនុស្សជាតិ ជាពលរដ្ឋរួមជាតិសាស្រ្ត និងជាកងយោធពលខេមរភូមិន្ទ ដើម្បីជាតិ និងប្រជាជន។

លោកបន្តថា «ការបរិច្ចាគឈាម គឺជាការចែករំលែកផ្នែកមនុស្សធម៌ ដើម្បីសង្គោះជីវិតមនុស្ស និងជាកាដូនៃសេចក្តី​ស្រលាញ់ ហើយកាដូមួយនេះ គឺបានហូរចេញពីបេះដូងយ៉ាងពិតប្រាកដ ជូនចំពោះជនរួមជាតិខ្មែរទាំងអស់គ្នា»។

សូមបញ្ជាក់ថា បញ្ជាការដ្ឋានកម្លាំងពិសេសប្រឆាំងភេរវកម្ម បានទទួលរៀបចំការបរិច្ចាគឈាមនេះ បានចំនួន៤លើក រួចមកហើយ ហើយនេះជាលើកទី៥ហើយ៕

សហព័ន្ធស្រូវអង្ករកម្ពុជា៖ អឺរ៉ុបនឹងហាមការនាំចូលអង្ករ ដែលមានកាកសំណល់ថ្នាំកសិកម្ម TRICYCLAZOLE លើស ០.០១​មីលីក្រាម​ក្នុង​១គីឡូក្រាម ​ចាប់​ពីដើម​ខែកក្កដា ឆ្នាំ២០១៧

FN ៖ នៅថ្ងៃទី២១ ខែមីនា ឆ្នាំ២០១៧នេះ សហព័ន្ធស្រូវអង្ករកម្ពុជា (CRF) និង គម្រោង​ខ្សែរ​សង្វាក់កសិកម្មកម្ពុជា (CAVAC) បានរៀបចំសិក្ខាសាលា​ពិគ្រោះ​យោបល់ស្តីពី ការប្រើប្រាស់ថ្នាំគីមីកសិកម្ម ទ្រីហ្ស៊ីក្លាហ្សូល (TRICYCLAZOLE) នៅក្នុង​ការដាំដុះស្រូវ ដើម្បីត្រៀមរកដំណោះស្រាយថ្មី សម្រាប់​និរន្តរ​ភាព​កសិកម្មដំណាំ​ស្រូវនិងការនាំចេញ​អង្ករទៅ​​កាន់ទីផ្សារអឺរ៉ុប។

សហព័ន្ធស្រូវអង្ករកម្ពុជា បានឲ្យដឹងថា សហភាពអឺរ៉ុបនឹងបញ្ឈប់រាល់ការនាំចូលអង្ករដែលមានកាកសំណល់ ទ្រីហ្ស៊ីក្លាហ្សូល (TRICYCLAZOLE) ដែលមានកម្រិតលើស ០.០១​មីលីក្រាម (ដែលពីមុនកម្រិតមិនលើស០.១មីលីក្រាម ក្នុង១គីឡូក្រាម) ចាប់​ពីដើម​ខែ​កក្កដា​ឆ្នាំ​២០១៧។ កាកសំណល់ថ្នាំកសិកម្ម ទ្រីហ្ស៊ីក្លាហ្សូល (TRICYCLAZOLE) ជាថ្នាំមានប្រសិទ្ធភាពបំផុតក្នុងការសម្លាប់ជម្ងឺប្លាស់ (Blast) ក្នុងដំណាំស្រូវ ហើយ ក៏ជាថ្នាំដែលមានតម្លៃទាប​សម្រាប់ការប្រើប្រាស់ដែរ។

សហព័ន្ធស្រូវអង្ករកម្ពុជា បានឲ្យដឹងទៀតថា សិក្ខាសាលារួមគ្នានេះ​ ដោយមានការចូលរួមពីមន្ត្រី ពាក់ព័ន្ធជាច្រើន រួមមាន តំណាងពីសហភាពអឺរ៉ុប ក្រសួងកសិកម្មរុក្ខាប្រម៉ាញ់ និង នេសាទ តំណាង​ក្រសួង​​ពាណិជ្ជកម្ម ក្រុមហ៊ុននាំចេញអង្ករ ម្ចាស់រោងម៉ាស៊ីនកិនស្រូវ និង តំណាង​ក្រុមហ៊ុនលក់ជីកសិកម្មជាច្រើនទៀត ត្រូវបាន​កំណត់រក​ដំណោះ​ស្រាយ​សម​ស្របដើម្បីបញ្ជៀសផល់ប៉ះពាល់កិត្តិយសទីផ្សារអង្ករកម្ពុជា។

កិច្ចពិភាក្សាជាង៣ម៉ោងនៅរសៀលនេះ បានលើកឡើងនូវចំណុច​ជាច្រើននិង ​ឧបសគ្គជាច្រើនកើតចេញពីការប្រើប្រាស់ ថ្នាំផ្សិត ទ្រីហ្ស៊ីក្លាហ្សូល (TRICYCLAZOLE)​ដែលពិភព​លោកកំពុងតែ​ប្រុងប្រយ័ត្ន​ខ្ពស់ ដោយសារ​ការបារម្ភ​លើផលប៉ះពាល់​សុខភាព។

បន្ទាប់ពីការពិភាក្សាយ៉ាងផុលផុស មន្ត្រីជំនាញមកពីក្រសួងកសិកម្ម រុក្ខាប្រម៉ាញ់ និង នេសាទ បានលើកទឹកចិត្តឲ្យក្រុមហ៊ុន នាំចេញ​និងរោងម៉ាស៊ីនកិន​ស្រូវនៅ​ក្នុងស្រុកអនុវត្តកសិកម្មតាមកិច្ចសន្យា ដែលងាយស្រួលដល់ការគ្រប់គ្រង និង ជៀស​វាងបានការប្រប្រាស់ ថ្នាំផ្សិត ទ្រីហ្ស៊ីក្លាហ្សូល (TRICYCLAZOLE) នាំឲ្យ​ប៉ះពាល់ទីផ្សារនាំចេញ ក្នុងករណីទិញពីប្រភព មិនច្បាស់លាស់ រួចកិនកែច្នៃ ហើយនាំចេញទៅកាន់ទីផ្សារអឺរ៉ុបដោយមានផ្ទុកកាកសំណល់នោះ។

លោក នង វាសនា អនុប្រធានសហព័ន្ធស្រូវអង្ករកម្ពុជា និង ជាតំណាង​សហព័ន្ធស្រូវអង្ករកម្ពុជា ស្នើឲ្យជួបប្រជុំជាថ្មី និងឲ្យបានឆាប់ ដើម្បី​ដោះស្រាយ​បញ្ហា​ប្រឈមទាំងឡាយដែលកើតចេញពីការប្រើប្រាស់ថ្នាំផ្សិត ទ្រីហ្ស៊ីក្លាហ្សូល (TRICYCLAZOLE)។

លោក...Read More

រដ្ឋមន្រ្តីអូស្រ្ដាលី៖ រដ្ឋាភិបាលអូស្រ្តាលី នឹងបន្តផ្ដល់ជំនួយមកកម្ពុជា នៅលើវិស័យបោសសំអាតមីន

FN ៖ លោកស្រី Concetta Fierravanti-Wells សមាជិកព្រឹទ្ធសភា និងជារដ្ឋមន្រ្តីទទួលបន្ទុកអភិវឌ្ឍអន្តរជាតិ និងតំបន់ប៉ាស៊ីហ្វិករបស់អូស្រ្តាលី បានបញ្ជាក់ឲ្យដឹងថា រដ្ឋាភិបាលអូស្រ្តាលី នឹងនៅតែបន្តផ្ដល់ជំនួយមកប្រទេសកម្ពុជា នៅលើវិស័យបោសសំអាតមីន បន្តទៅទៀត។

ការបញ្ជាក់បែបនេះ របស់រដ្ឋមន្រ្តីអូស្រ្តាលី បានធ្វើឡើងខណៈលោកស្រី ជួបពិភាក្សាការងារជាមួយ លោកទេសរដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការ អន្តរជាតិកម្ពុជា ក្នុងឱកាសលោកស្រី មកទស្សនកិច្ចនៅកម្ពុជា កាលពីចុងសប្ដាហ៍ កន្លងទៅនេះ។

លោកស្រី Concetta Fierravanti-Wells បានវាយតម្លៃខ្ពស់ ចំពោះការខិតខំរបស់ រាជរដ្ឋាភិបាលកម្ពុជានៅលើវិស័យការបោសសំអាតគ្រាប់មីននេះ ដែលទទួលបានលទ្ធផលដ៏ល្អប្រសើរ។

លោក ទេសរដ្ឋមន្រ្តី ប្រាក់ សុខុន ក៏បានជម្រាបជូនលោកស្រី អំពីការខិតខំរបស់រាជរដ្ឋាភិបាលកម្ពុជា និងលទ្ធផលដែលទទួល បានក្នុងការកាត់បន្ថយ ជនរងគ្រោះ ដោយសារគ្រាប់មីនពីចំនួនជាង ៤០០០នាក់ ក្នុងឆ្នាំ១៩៩៦ និងបានថយចុះជាបន្តបន្ទាប់ និងរហូតដល់ឆ្នាំ២០១៦កន្លងមកនេះ មានចំនួននៅសល់តិចជាង១០០នាក់។

លោកទេសរដ្ឋមន្រ្តី ក៏បានសម្ដែងអំណរគុណចំពោះ រដ្ឋាភិបាលអូស្រ្តាលី ដែលបានបន្តផ្ដល់ជំនួយដល់កម្ពុជា លើវិស័យនេះផងដែរ៕