សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញថ្លែងក្នុងកិច្ចប្រជុំពេញអង្គគណៈរដ្ឋមន្រ្តី

ប្រជុំលើរបៀបវារៈ ៣

ថ្ងៃនេះគណៈរដ្ឋមន្រ្តីរបស់បានដំណើរការប្រជុំពេញអង្គ ដើម្បីឆ្លងនូវរបៀបវារៈ (១) សេចក្ដីព្រៀងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ (២) សេចក្ដីព្រៀងច្បាប់ស្ដីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០២០ (៣) បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីការអនុម័តពីស្ថាប័ននីតិបញ្ញត្តិ លើសេចក្ដីព្រៀងច្បាប់ស្ដីពីការអនុម័តយល់ព្រមលើពិធីសារអាស៊ាន ស្ដីពីការពង្រឹងយន្តការដោះស្រាយវិវាទ។ ដូចមុនៗដែរ បញ្ហាផ្សេងៗនេះ មិនមានការពិភាក្សាទាក់ទិនជាមួយនឹងការអនុម័តលើពិធីសារអាស៊ាននេះទេ។ ខ្ញុំសុំគណៈរដ្ឋមន្រ្តីចុះហត្ថលេខាបញ្ជូនទៅសភាតែម្ដង។ ក្នុង
សប្ដាហ៍នេះ គឺមានកិច្ចការច្រើន។ អាទិត្យក្រោយនេះ ជាមួយនឹងការប្រជុំសភា ដើម្បីឆ្លងនូវការធ្វើវិសោធនកម្មរដ្ឋធម្មនុញ្ញ ការបោះឆ្នោតបំពេញបន្ថែមសមាជិករាជរដ្ឋាភិបាល យើងនឹងមានការប្រជុំអាស៊ានចំនួន ៣ ថ្ងៃ ដែលពេលនោះកម្ពុជានឹងទទួលញញួរជាប្រធានអាស៊ានផងដែរ។ បើតាមដឹង ញញួរនេះបានដឹកមកដល់ទីក្រុងភ្នំពេញហើយ ព្រោះមិនអាចបញ្ជូនតាមអនឡាញបានទេ។ ត្រូវតែបញ្ជូនមកមុន (ដើម្បីប្រុងប្រៀប)ក្នុងភាពជាប្រធានអាស៊ានរបស់កម្ពុជាឆ្នាំ ២០២២។

ដំណើររៀនរស់នៅជាមួយកូវីដ-១៩ … រៀបចំកម្មវិធីដែលបានលុបចោលពីមុនៗ

ចូលដល់ខែវិច្ឆិកា យើងក៏មានកិច្ចការបន្តទៀត។ ខ្ញុំក៏សូមជម្រាបថា ដោយសារការត្រៀមបម្រុងរបស់យើងក្នុងដំណើររៀនរស់នៅជាមួយកូវីដ-១៩ យើងត្រូវធ្វើកិច្ចការផ្ទាល់ ដូចជាការប្រជុំរបស់យើងនេះ។ លទ្ធភាពនៃការ(រៀបចំ)ប្រជុំទៅបាន គឺយើងប្រជុំផ្ទាល់ ហើយលទ្ធភាពដែលយើងប្រជុំមិនបាន គឺយើងប្រជុំតាម Zoom។ ក្នុងអាទិត្យនេះ ខ្ញុំប្រជុំតាម Zoom ពីរដង ជាមួយអភិបាលខេត្ត/រាជធានី និងគណៈកម្មការប្រឆាំងកូវីដ-១៩ ដើម្បីពិភាក្សាដោះស្រាយបញ្ហាមួយចំនួន។ ឯកិច្ចការបន្តគឺ (ជាការ)ចាប់ផ្ដើមដំបូងរបស់ខ្ញុំ គឺសុំឲ្យមានការរៀបចំការសម្ពោធក្រសួងរៀបចំដែនដី និងនគរូបនីយកម្ម ដែលកំណត់យកថ្ងៃទី ៨ ខែវិច្ឆិកា ដើម្បីចាប់ផ្ដើមឡើងវិញឲ្យមានដំណើរការ។ បើយើងនៅតែក្នុងរូង គឺក្នុងពេលដែលយើងឲ្យសិស្សសាលាចូលរៀន ដូចជាមិនល្អមើល ហើយវាមិនត្រូវនឹងសង្វាក់នៃការងារទៀតផង។ បន្ទាប់ទៅត្រូវពិនិត្យមើលនូវកម្មវិធីមួយចំនួនទៀត ដែលយើងបានលុបចោល ដូចជាការសម្ពោធស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ការសម្ពោធសមិទ្ធផលនៅខេត្តព្រះសីហនុ ដែលយើងបានធ្វើយ៉ាងធំ ហើយអស់ថវិកាយ៉ាងច្រើន … កម្មវិធីដែលយើងចោលមួយចំនួនកន្លងទៅនេះ គឺយើងអាចរៀបចំឡើងវិញ ដើម្បីឲ្យដំណើរការការងារធម្មតា ជាមួយនឹងការប្រកាសរបស់ឯកឧត្ដម ហង់ ជួនណារ៉ុន ថា ចាប់ពីខែវិច្ឆិកានេះទៅ គឺសាលានឹងបើកជាទូទៅតែម្ដង។ បើយើងមិនបើកជាទូទៅទេ ការស្លាប់ដោយសារសេដ្ឋកិច្ចប្រហែលជាពិបាកជាងការស្លាប់ដោយសារកូវីដ-១៩ទៅទៀត …។

ពិនិត្យមើលលទ្ធភាពធ្វើគោលការណ៍បដិការជាមួយនឹងថៃលើទេសចរ

ខ្ញុំក៏សូមឲ្យឯកឧត្ដម ថោង ខុន ពិនិត្យមើល។ ខ្ញុំទទួលបានបញ្ជីពី រដ្ឋលេខាធិការក្រសួងទេសចរណ៍ សុចិត្រា ថាខាងថៃបានដាក់ចេញនូវបញ្ជីមួយមាន ៤៦ ប្រទេស ក្នុងនោះ (មាន)ប្រទេសអាស៊ាន ៣ គឺកម្ពុជា សិង្ហបុរី និងម៉ាឡេស៊ី ដែលអាចចេញចូលប្រទេសថៃបាន។ ប្រសិនបើដូច្នេះមែន គឺអាចនឹងចាប់យកនូវវិធានការបដិការជាមួយនឹងថៃតែម្ដង។ ហេតុអីបានត្រូវធ្វើអញ្ចឹង? ខ្ញុំសូមលើកជាយោបល់បន្តិច ដើម្បីឲ្យធ្វើការពិចារណា។ ប្រទេសខ្លះអត់មានទំនាក់ទំនងផ្លូវអាកាសជាមួយយើងទេ។ ប្រទេសខ្លះនោះ(មិនអាចទៅមកបាន) ក៏ដោយសារយើងខ្លួនឯងជាអ្នកបិទដែរ ព្រោះតែពេលនោះឆ្លងខ្លាំងពេក។ តែកាលណាមកពីម៉ាឡេស៊ី ឥណ្ឌូនេស៊ី ហ្វីលីពីន គឺមានឆ្លងច្រើន។ ឥឡូវការហោះហើររបស់យើងមានពីសិង្ហបុរី ចិន និងកូរ៉េ។ អញ្ចឹង បើសិនជាថៃចាប់ផ្តើមអនុវត្ត(គោលនយោបាយនេះ) យើងអាចផ្តើមមានគោលការណ៍បដិការជាមួយនឹងថៃ។ យើងទៅថៃគេឲ្យធ្វើចត្តាឡីស័ក។ ថៃមកយើងក៏ត្រូវធ្វើចត្តាឡីស័ក។ អញ្ចឹង អាចចាប់ផ្ដើម​បើកការហោះហើរ ដោយឧបមាថា៖ ទេសចរនៅថៃទទួល គឺមកដល់ថៃ អាចមកដល់កម្ពុជា ក្នុងពេលដែលយើងមានគោលការណ៍រួម VISA មួយប្រើបាន ២ ប្រទេស។ អញ្ចឹងអាចថាទំនាញទេសចរថៃ អ្នកវិនិយោគថៃមកកាន់កម្ពុជាផង និងទេសចរពីប្រទេសដទៃដែលបានមកប្រទេសថៃ អាចឆ្លងមកទស្សនកិច្ចនៅប្រទេសកម្ពុជា។ អញ្ចឹងពិចារណាមើលអំពីបញ្ហាហ្នឹង ដើម្បីចាប់យកឱកាសដែលយើងមាន។

ពិនិត្យលទ្ធភាពបើកផ្លូវអាកាសឡើងវិញ ជាមួយម៉ាឡេស៊ី ឥណ្ឌូនេស៊ី និងហ្វីលីពីន

ក៏ត្រូវពិនិត្យមើលអំពីលទ្ធភាពនៃការបើកវិញនូវផ្លូវអាកាសជាមួយនឹងគួឡាឡាំពួរ ហ្សាកាតា ឬចំណុចណាមួយនៅឥណ្ឌូនេស៊ី និងហ្វីលីពីនមកចំពោះកម្ពុជាវិញផងដែរ។ យើងបានធ្វើការគ្រប់គ្រងល្អហើយសម្រាប់ព្រលានយន្តហោះរបស់យើង ហើយយើងក៏បានកាត់បន្ថយចំនួនពេលវេលានៃការធ្វើចត្តាឡីស័ក ដែលអាចជាផ្នែកនៃការទាក់ទាញ ហើយនឹងឈានទៅដល់ការរៀបចំបើកឡើងវិញនូវទេសចរណ៍សុវត្ថិភាព និងទេសចរណ៍វ៉ាក់សាំង។ នេះគ្រាន់តែជាការគិតគូរ ដើម្បីឲ្យយើងមានចក្ខុវិស័យសម្រាប់ដំណើរការសេដ្ឋកិច្ចដែលយើងត្រូវពិភាក្សាថ្ងៃនេះ។

បទពិសោធន៍ក្រោយភ្ជុំបិណ្ឌ ខ្ញុំបានមើលឃើញហើយ។ (យើង)អនុញ្ញាតឲ្យដើរលេង ដល់ដើរលេងរួចហើយ អត់មានផ្ទុះអីក្តុងក្តាំង។ បានសេចក្តីថា កូវីដ-១៩ វាអត់រើបម្រះ។ ដូច្នេះក៏ជាបទពិសោធន៍មួយឲ្យ​យើង ដើម្បីឈានទៅបើកសាលារៀនឡើងវិញ ដើម្បីឈានទៅបើកអាជីវកម្មឡើងវិញ ព្រោះបញ្ហាប៉ះពាល់របស់យើងគឺនិយាយពីកសិកម្ម និងឧស្សាហកម្ម ដំណើរការពេញបន្ទុកតែម្តង ផ្នែក ២ នេះ។ ប៉ុន្តែ ផ្នែកសេវាគឺជាផ្នែកប្រាក់ចំណូល និងការងាររបស់ប្រជាពលរដ្ឋរបស់យើងត្រូវថមថយ ដោយការទទួលប៉ះពាល់ពីការរឹតត្បិតសម្រាប់ប្រឆាំង កូវីដ-១៩។

កម្ពុជាចាក់វ៉ាក់សាំងបាន ៨៥%

… វ៉ាក់សាំងបានចាក់នៅប្រទេសជាច្រើន ហើយជាពិសេសនៅកម្ពុជាយើង អត្រាគ្របដណ្តប់រហូតដល់ទៅ ៨៥% បើយើងគិតក្នុងចំនួនប្រជាជន ១៦ លាននាក់។ ខ្ញុំទទួលរបាយការណ៍ពីឯកឧត្តម ប្រាក់ សុខុន ថានៅថៃដូចជាចាក់បានដល់ទៅ ៧២ លាននាក់។ ខ្ញុំមិនច្បាស់ទេ ព្រោះឃើញគាត់វាយឲ្យខ្ញុំ។ បើ ៧២ លាននាក់ លើសពីចំនួនប្រជាជនថៃទៀត។ អញ្ចឹងច្បាស់ជាទៅដោយប្រជាជនខ្មែរយើង ពលករខ្មែរយើងនៅក្នុងប្រទេសថៃ។ ឥឡូវយើងរកមនុស្សអាយុ ១៨ ឡើង​លើ ១០ លាននាក់ចាក់អត់បានទេ ក្នុងពេលដែលស្ថិតិជំរឿនរបស់យើងមានទៅដល់ ១០ លាន ៨ សែននាក់ជាង។ សួរថាមនុស្សហ្នឹងនៅឯ​ណា? មនុស្សហ្នឹងកំពុងនៅថៃ កំពុងនៅកូរ៉េខាងត្បូង កំពុងនៅប្រទេសក្រៅ។ អញ្ចឹងទេបានជាខ្ញុំនៅតែនិយាយថា គឺត្រូវយកអត្រាដែលយើងចាក់ក្នុងប្រទេសយកមកគិតជាមួយនឹងប្រជាជន ១៦ លាននាក់ ប៉ុន្តែ Worldometers ដាក់យើង ១៧ លាននាក់ជាងបាត់ទៅហើយ នៅក្នុងពេលដែលស្ថិតិរបស់យើងគឺចំនួនរបស់យើងគឺ ១៦ លាន ៨ សែននាក់។

អ្វីដែលគួរឆ្ងល់នៅត្រង់ថា ចំនួន(នៃការចាក់)វ៉ាក់សាំងក្មេងពីអាយុ ៦ ទៅ ១២ ឆ្នាំ ឥឡូវចាក់បានច្រើន ក្នុងពេលដែលអាយុពី ១២ ទៅដល់ ១៦ ឆ្នាំ(ចាក់បានតិចជាង) … អ្នកដែលអាយុពី ១៨ ឆ្នាំឡើង យើងចាក់បាន ៩៩,៦៧ ភាគរយ។ នេះគិតតែត្រឹម ១០ លាន នាក់។ ដល់ទៅក្មេងអាយុពី ១២ ទៅ ១៨ ឆ្នាំ ចាក់បាន ១ ៩៦៩ ៩៣១ នាក់ យើងចាក់បាន ៩០,៥៣ ភាគរយ។ ដល់ទៅក្មេងអាយុ ៦ ឆ្នាំដល់ ១២ ឆ្នាំយើងចាក់ ៩៩,៩១ ភាគរយ វាជារឿងគួរឲ្យចំឡែក។ អញ្ចឹងសួរថា ក្មេងដែលអាយុ ១២ ដល់ ១៨ ឆ្នាំទៅណាបាត់? … ក្រុមហ្នឹងអាចទៅជាមួយឪពុកម្តាយ ក្រុមគ្រួសាររបស់គេទៅធ្វើការនៅក្នុងប្រទេសថៃដែរ។ ប្រហែលជាជួនកាលក្មេងនេះ បែរជាលើសតួលេខស្ថិតិទៅទៀត ឥឡូវគឺនៅខ្វះតែ ៩ ភាគរយទៀតគ្រប់ ១០០ ភាគរយ ហើយមិនទាន់អស់ក្មេងដែលត្រូវចាក់។

ឃើញឆ្លងកន្លែងណា យកតែអ្នកឆ្លងទៅព្យាបាល មិនបិទកន្លែងនោះទៀតទេ

សម្រាប់យើងគឺថា អត្រាវ៉ាក់សាំងគ្របដណ្តប់ពេលនេះគឺ ៨៥,២៧ ភាគរយ ដែលជាចំនួនមួយច្រើនក្នុងចំណោមប្រទេសដែលបានចាក់វ៉ាក់សាំងគ្របដណ្តប់ច្រើន។ យើងល្មមដល់ពេលដែលយើងត្រូវដោះស្រាយបញ្ហារយៈពេលវែង។ អ្វីដែលជាការខាតបង់ធ្ងន់ធ្ងររបស់យើងធំជាងគេគឺបញ្ហាវិស័យអប់រំ ក្មេងៗអត់បានរៀន មនុស្សអត់បានរៀន ការបណ្តុះបណ្តាលធនធានមនុស្សដែលជាគោលដៅចំបងធំរបស់យើងគឺមានបញ្ហា។ អញ្ចឹងបានជាចាប់ពីពេលនេះទៅ ដំណើរការរបស់យើង ឧទាហរណ៍ថា៖ រោងចក្រមួយមានអ្នកឆ្លង ២ ទៅ ៣ នាក់។ អញ្ចឹងយកតែ ២ – ៣ នាក់នោះ ទៅសំរាកពេទ្យបានហើយ កុំបិទរោងចក្រទាំងមូល​។ ពីមុនឲ្យតែមានឆ្លងតាមរោងចក្រគឺបិទរោងចក្រ។ ផ្សារមានអ្នកលក់ដូរឆ្លងក្នុងផ្សារ យើងបិទផ្សារទាំងមូល។ ឥឡូវយើងមិនធ្វើអញ្ចឹងទៀតទេ។ យើងយកតែអ្នកដែលមានវិជ្ជមានទៅសំរាកពេទ្យទៅ រួចហើយបាញ់សម្លាប់មេរោគហើយនាំគ្នាលក់ទៀតទៅ។ សាលារៀនក៏ដូចគ្នា។ កូនសិស្សណាឆ្លងយើងយកទៅព្យាបាលទៅ។ អ្នកមិនឆ្លងនៅបន្ត ព្រោះវ៉ាក់សាំងមានគ្រប់ហើយ។

អ្នកណាមានការសង្ស័យ សូមធ្វើតេស្តដោយខ្លួនឯង

ការធ្វើតេស្តក៏ដូចគ្នាដែរ។ ពីមុនយើងបង្ខំឲ្យប្រជាជនធ្វើតេស្ត ព្រោះពេលហ្នឹងយើងពុំមានវ៉ាក់សាំងទេ។ យើងត្រូវរុករក ១៤ ថ្ងៃទៅខាងក្រោយ។ នៅពេលដែលឃើញអ្នកហ្នឹងអវិជ្ជមាន ត្រូវបកក្រោយ ១៤ ថ្ងៃ។ ១៤ ថ្ងៃទៅឯណាខ្លះ? ត្រូវស្រាវជ្រាវទាំងអស់។ ឥឡូវនេះ មិនបាច់ធ្វើអញ្ចឹងទេ។ ពីមុនក្នុងភូមិហ្នឹងកើត ៣ នាក់ យើងធ្វើចត្តាឡីស័កមួយភូមិតែម្តង។ ឥឡូវ យើងប្រគល់ភារកិច្ចឲ្យបុគ្គលម្នាក់ៗ ក្នុងក្រុមគ្រួសារ ចេះទទួលខុសត្រូវខ្លួនឯង។ បើឃើញថាមានបញ្ហាមិនស្រួល គឺមករកការធ្វើតេស្ត។ យើងមិនម្ចាស់ការទៅធ្វើតេស្តទៀតទេ (ដោយ)បិទភូមិធ្វើតេស្ត ឬបិទរោងចក្រធ្វើតេស្ត។ អ្នកណាមានការសង្ស័យ គេអាចសូមមក ធ្វើតេស្ត។ ការធ្វើតេស្តនេះទៀតសោត  បើឃើញថាវិជ្ជមានប៉ុន្តែអាការៈធម្មតា ជូនថ្នាំគាត់ឱ្យទៅសម្រាកព្យាបាលនៅផ្ទះ។ ប៉ុន្តែ បើសិនមានអាការៈលក្ខណៈជាការឈឺចាំយើងជូនគាត់ទៅមន្ទីរពេទ្យ។

បញ្ឈប់យកសំណាកលើសាកសពក្រៅមន្ទីរពេទ្យ/ក្នុងមន្ទីរពេទ្យ ក្រៅក្របខណ្ឌ កូវីដ-១៩

ក្រសួងសុខាភិបាលបានប្រកាសពីម្សិលហើយ បញ្ឈប់យកសំណាកទៅលើសាកសពដែលស្លាប់នៅក្រៅមន្ទីរពេទ្យ ឬនៅក្នុងមន្ទីរពេទ្យ ប៉ុន្តែស្លាប់នៅក្រៅក្របខណ្ឌកូវីដ-១៩។ បើមិនអញ្ចឹងទេ ស្លាប់នៅតាមផ្ទះក៏យើងទៅធ្វើតេស្ត ដល់ធ្វើតេស្តទៅចេញ កូវីដ-១៩ ទាំងអស់។ អញ្ចឹង អ្នកស្លាប់ធុនណាក៏ស្លាប់ដោយសារកូវីដ-១៩ ទាំងអស់ ព្រោះអាប្រដាប់ rapid test ហ្នឹង គេធ្វើដើម្បីអី? គេមិនមែនធ្វើតេស្តថាអាហ្នឹងទឹកនោមផ្អែម ធ្វើតេស្តអាហ្នឹងមកពីជំងឺស្អីសរសៃប្រសាទ ឬជំងឺស្អីទេ អាហ្នឹងគឺថាធ្វើតេស្តដើម្បីរកកូវីដ-១៩ … សាកសពស្លាប់ អាយុគាត់ ៩០​ ឆ្នាំ ហើយនាំគ្នាទៅធ្វើតេស្តទៀត … អញ្ចឹង ត្រូវបែងចែករវាងអ្នកស្លាប់ដោយកូវីដ-១៩ ពិតប្រាកដ និងអ្នកស្លាប់ដោយមូលហេតុផ្សេង … នេះយើងក៏ពិសោធន៍បណ្តើរៗ ក្នុងការគ្រប់គ្រងរបស់យើង។ ជាទូទៅយើងគ្រប់គ្រងបានល្អ ហើយតាមបណ្តាខេត្តក៏បានប្រជុំជាមួយខ្ញុំ។ យើងស្តាប់គ្នាពីរបៀបគ្រប់គ្រង ចាត់ចែង ដោះស្រាយបញ្ហាតាំងពីករណីសាកសព។

ថ្ងៃនេះ យើងផ្តើមការងាររបស់យើងដោយផ្ទាល់។ ថ្ងៃ ២៥ (តុលា)ហ្នឹង សភា​ប្រជុំអនុម័តទាំងវិសោធនកម្មរដ្ឋធម្មនុញ្ញ ហើយនិងការបោះឆ្នោតជ្រើសរើសសមាជិករដ្ឋាភិបាល។ អញ្ចឹង ខ្ញុំនឹងទៅសភា … ឥឡូវក៏យើងធ្វើការផ្ទាល់ ចាប់ផ្តើមអនុវត្តការធ្វើការផ្ទាល់នៅគ្រប់ក្របខណ្ឌ។ កន្លែងណាសង្ស័យ មានការធ្វើ rapid test អីជាដើម ធ្វើទៅ។ កន្លែងណាត្រូវធ្វើ PCR អាហ្នឹងយើងមិនហាមឃាត់ទេ ដើម្បីការការពារខ្លួន ក្រុមគ្រួសារនីមួយៗ ឬស្ថាប័ននីមួយៗ ដើម្បីធានាសុវត្ថិភាពនៅក្នុងទីកន្លែងដែលខ្លួនធ្វើការ។ នាំគ្នាធ្វើ rapid test ហ្នឹងទៅ។

ឥឡូវ ជាបុគ្គលម្នាក់ៗចេះធ្វើ។ គ្រាន់តែខ្ញុំ មិនហ៊ានធ្វើរុកច្រមុះខ្លួនឯងទេ។ ណាស់តែគេអ្នករុក គេរុកចង់ដាច់ច្រមុះហើយ។ ដល់ទៅរុកខ្លួនឯងក៏វាមិនចេះរុក។ អញ្ចឹងមានតែរកគេមករុក។ ខ្ញុំអត់រុកអា rapid test ទេ ខ្ញុំរុកយកទៅធ្វើ PCR របស់ខ្ញុំ។ បើយើងចេះតែដើររកអាហ្នឹងវាចេះតែឃើញ។ ឥឡូវ យើងមើលឥណ្ឌូនេស៊ី ធ្លាក់ពី ១២ ម៉ឺននាក់ជាង មកនៅតែប៉ុន្មានរយ ចង់ ១០ ថ្ងៃប្លាយហើយ … ម្សិលមិញ ម្សិលម្ង៉ៃអី ចុះមកនៅ ៦០០ នាក់ ទៅ ៧០០ នាក់។ ប៉ុន្តែ នៅពេលជាមួយគ្នាទៅឡើងនៅសាំងហ្គាពួរ ម្សិលមិញឆ្លងជាង ៣ ០០០ នាក់ ស្លាប់ ១៨ នាក់។ ព្រឹកមិញនេះ ឃើញឆ្លងជាង ៣ ០០០ នាក់ ស្លាប់ ១៦ នាក់ …។

ដរាបណាមិនទាន់មានសុវត្ថិភាពនៅប្រទេសណាមួយទេ គឺយើងក៏មិនទាន់មានសុវត្ថិភាពដែរ។ ក៏ប៉ុន្តែនៅពេលមានការបើកសេដ្ឋកិច្ចនៅប្រទេសថៃ បើកទេសចរណ៍នៅប្រទេសថៃ ដែល(ថៃបាន)ដាក់កម្ពុជាទៅ(ក្នុងក្រុមប្រទេសចូល)ដោយមិនធ្វើចត្តាឡីស័ក គឺវាមានតែត្រូវធ្វើបដិការត្រឡប់ទៅវិញហើយ។ បើថាខ្មែរយើងទៅប្រទេសថៃដោយមិនធ្វើចត្តាឡីស័ក យើងក៏ត្រូវឱ្យថៃមកយើងក៏អត់ធ្វើចត្តាឡីស័កដូចគ្នា។ អាហ្នឹងឈរលើគោលការណ៍បដិការ។ នេះគឺជាការចាប់ផ្តើមរបស់ខ្ញុំ។ ឥឡូវសូមអញ្ជើញ ឯកឧត្តម អូន ព័ន្ធមុនីរត្ន័ មកឧទ្ទេសនាមពីសេចក្តីព្រៀងច្បាប់ស្តីពីហិរញ្ញវត្ថុសម្រាប់ការគ្រប់គ្រង៕