ប្រសាសន៍ និងការអធិប្បាយតាមហ្វេសប៊ុក ស្តីពី ទស្សនកិច្ចខេត្ត ត្បូងឃ្មុំ កំពង់ចាម ព្រះវិហារ ឧត្តរមានជ័យ និងខេត្តសៀមរាម (ថ្ងៃទី ២៣ ដល់ ២៧ សីហា ២០១៦)

សម្ដេច​តេ​ជោ អញ្ជើញធ្វើដំណើរត្រឡប់មកភ្នំពេញវិញ, ថ្ងៃទី ២៧ សីហា ២០១៦

បន្ទាប់ពីបានធ្វើដំណើរក្នុងចម្ងាយផ្លូវប្រមាណ ៩០០ គីឡូម៉ែត្រ ឆ្លងកាត់ខេត្តត្បូងឃ្មុំ កំពង់ចាម កំពង់ធំ ព្រះវិហារ ឧត្តរមានជ័យ សៀមរាប ពេលនេះ ខ្ញុំត្រឡប់មកដល់ទីក្រុងភ្នំពេញដោយសុវត្ថិភាពវិញហើយ។ សូមអរគុណចំពោះអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ព្រះសង្ឃ ប្រជាពលរដ្ឋ លោកគ្រូ អ្នកគ្រូ ពិសេស កុមារ និងយុវជនដែលជាសិស្សានុសិស្ស ដែលបានទទួលខ្ញុំព្រះករុណាខ្ញុំ ដ៏រាក់​ទាក់ បង្ហាញពីក្តីស្រឡាញ់រាប់អាន និងជឿទុកចិត្តមកលើការដឹកនាំរបស់ខ្ញុំព្រះករុណាខ្ញុំ។ ហត់នឿយ​កាយ​តែ​​សប្បាយ​ចិត្ត ពិតជាមានន័យខ្លាំងណាស់សំរាប់ខ្ញុំ៕

សម្ដេច​តេជោ​ អញ្ជើញជួបលោកគ្រូអ្នកគ្រូ និងសិស្សានុសិស្សនៅ សាលាបឋមសិក្សាមោង, សៀមរាប, ថ្ងៃទី ២៧ សីហា ២០១៦

រសៀលថ្ងៃទី ២៧ សីហា ក្នុងពេលធ្វើដំណើរពីខេត្តឧត្តរមានជ័យមកកាន់ខេត្តសៀមរាប សម្តេចតេជោ ហ៊ុន សែន បានអញ្ជើញចុះសួរសុខទុក្ខលោកគ្រូ អ្នកគ្រូ និងក្មួយៗ សិស្សានុសិស្សនៅ សាលាប​ឋម​សិក្សា​មោង ស្ថិត​ក្នុងភូមិមោង ឃុំមោង ស្រុកស្រីស្នំ ខេត្តសៀមរាប។ តបតាមសំណូមពររបស់លោកគ្រូអ្នកគ្រូ និង​ក្មួយៗ សម្តេចតេជោ ហ៊ុន សែន និងសប្បុរសជន​បានផ្តល់​ជូនអាគារទីចាត់ការថ្មី ១ ខ្នង មាន ៣ បន្ទប់ ព្រមទាំងចាក់បេតុងផ្លូវចូលសាលា និងធ្វើរបង​ជូនសាលា​ផង​ដែរ។ សម្តេចតេជោ ចង់ឃើញកូន​ខ្មែរ​មាន​ឱ​កាស​រៀនសូត្រគ្រប់ៗគ្នា ចាប់តាំងពីទីក្រុងរហូតដល់​ជន​បទ។ សូមក្មួយៗ ចៅៗ ខិតខំរៀនសូត្រ ហើយ​ចៀស​​អោយឆ្ងាយពីអំពើអបាយមុខទាំងឡាយ ដើម្បី​អនាគត​ល្អ៕

សម្ដេចតេជោ​អញ្ជើញជួបលោកគ្រូអ្នកគ្រូ និងសិស្សានុសិស្សនៅសាលាបឋមសិក្សា ហ៊ុន សែន ព្រៃធំ, ឧត្តរមានជ័យ, ថ្ងៃទី ២៧ សីហា ២០១៦

នៅរសៀលថ្ងៃទី ២៧ ខែសីហា នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអញ្ជើញ​ចុះ​សួរ​សុខទុក្ខ លោកគ្រូអ្នកគ្រូ និងកូនក្មួយសិស្សានុសិស្ស នៅសាលាបឋមសិក្សា ហ៊ុន សែន ព្រៃធំ ស្ថិត​ក្នុង​ភូមិ​ព្រៃ​ធំ ឃុំចុងកាល់ ស្រុកចុងកាល់ ខេត្តឧត្តរមានជ័យ។ ក្រោយពីបានពិភាក្សាជាមួយលោកគ្រូ អ្នកគ្រូ និង​ក្មួយៗ សិស្សានុសិស្ស និងពិនិត្យ​លើសំណង់អាគារ​ចាស់ៗ រួចហើយ សម្តេចតេជោ ហ៊ុន សែន និង​សប្បុ​រស​ជនបានផ្តល់ជូនអាគារសិក្សា ១ ខ្នង ១២ បន្ទប់​ ទីចាត់​ការ ១ ខ្នង ៣ បន្ទប់។ ទន្ទឹមនោះ គឺកសាងរបង​ព័ទ្ធ​ជុំវិញសាលា ជីកអណ្តូងទឹកស្អាត រៀបចំតារាង​បាល់ទាត់ បាល់ទះ និងចាក់ផ្លូវបេតុងចូលសាលា និង​ក្លោង​ទ្វារថ្មី។ សម្តេចតេជោ ខំកសាងសាលា ដើម្បីក្មួយៗ ចៅៗ ​មានសាលាសិក្សារៀន​សូត្រ​តាំង​ពី​ទី​ក្រុង​រហូតដល់ទីជនបទ៕

សម្ដេចតេជោអញ្ជើញ ជួបលោកគ្រូអ្នកគ្រូ និងសិស្សានុសិស្សនៅសាលាបឋមសិក្សាចុងកាល់, ឧត្តរ​មាន​ជ័យ, ថ្ងៃទី ២៧ សីហា ២០១៦

រសៀលថ្ងៃទី ២៧ ខែសីហា ក្នុងពេលអញ្ជើញធ្វើដំណើរពីខេត្តឧត្តរមានជ័យ មកកាន់ខេត្តសៀមរាប សម្តេច​តេជោ ហ៊ុន សែន បានអញ្ជើញចុះសួរសុខទុក្ខ និងឧបត្ថម្ភថវិកាមួយចំនួនប្រគេន​ព្រះសង្ឃគង់​នៅ​វត្តជ័យ​ឧត្តម​ចុងកាល់ ស្ថិតក្នុងខេត្តឧត្តរមានជ័យ។ បន្ទាប់មក សម្តេចតេជោ ក៏បានអញ្ចើញ​សួរសុខទុក្ខ​លោក​គ្រូ​អ្នក​គ្រូ ក្មួយៗ សិស្សានុសិស្ស នៅ​សាលា​បឋមសិក្សាចុងកាល់ ស្ថិតក្នុងភូមិចុងកាល់ ឃុំចុងកាល់ ស្រុក​ចុង​​កាល់ ខេត្តឧត្តរមានជ័យ។ មើលឃើញពីកង្វះខាត និងសេចក្តីត្រូវការសាលារៀន សម្តេចតេជោ ហ៊ុន សែន និងសប្បុរស​ជនបានផ្តល់អាគារសិក្សាថ្មី ១ ខ្នង កំពស់ ២ ជាន់ ១២ បន្ទប់ ធ្វើតារាង​បាល់​ទាត់​បាល់​ទះ ចាក់ផ្លូវបេតុង​ចូលសាលា ធ្វើរបង និងក្លោងទ្វារថ្មី ហើយបង្កើតចេញជាអនុវិទ្យាល័យផងដែរ។ កុមារ​កម្ពុជា​នឹងកាន់តែមានឱកាស​បានចូលសិក្សា​រៀនសូត្រកាន់តែធំទូលំទូលាយ៕

សម្ដេចតេជោអញ្ជើញជួបសិស្សានុសិស្ស នៅវិទ្យាល័យ ហ៊ុន សែន ចុងកាល់, ឧត្តរមានជ័យ, ថ្ងៃទី ២៧ សីហា ២០១៦

រសៀលថ្ងៃទី ២៧ ខែ សីហា សម្តេចតេជោ ហ៊ុន សែន ក៏បានអញ្ជើញចុះសួរសុខទុក្ខ(សិស្សា​នុសិស្ស)​នៅ​វិទ្យា​ល័យ ហ៊ុន សែន ចុងកាល់ ដែលស្ថិតនៅក្នុងភូមិចំប៉ាមាស ឃុំចុងកាល់ ស្រុកចុងកាល់ ខេត្តឧត្តរ​មាន​ជ័យ។ មើលឃើញពីតម្រូវការនៃការសិក្សារបស់ក្មួយៗ សម្តេចតេជោ ហ៊ុន សែន និងសប្បុរសជនផ្តល់ជូន​អា​គារសិក្សា ១ ខ្នង កំពស់ ៣ ជាន់ មាន ១៨ បន្ទប់ និងទីចាត់ការ ១ ខ្នង មាន ៣ បន្ទប់ ហើយធ្វើរបង​ព័ទ្ធ​ជុំ​វិញសាលា និងរៀបចំតារាងបាល់ទាត់ បាល់ទះ ហើយចាក់ផ្លូវបេតុង​ចូលទៅ​កាន់សាលាទៀតផង។ មាន​សម្តេចតេជោ ហ៊ុន សែន គឺមានសន្តិភាព និងមានសាលារៀនគ្រប់​ទីកន្លែង​ សម្រាប់​កូន​ខ្មែរបាន​សិក្សា​គ្រប់ៗ​គ្នា៕

សម្ដេចតេជោអញ្ជើញជួបសិស្សានុសិស្សនៅសាលាបឋមសិក្សាពង្រ, ឧត្តរមានជ័យ, ថ្ងៃទី ២៧ សីហា ២០១៦

បន្ទាប់ពីបានអញ្ជើញចុះជួបសំណេះសំណាលជាមួយលោកគ្រូ អ្នកគ្រូនៅអនុវិទ្យាល័យពង្រ រួចមក សម្តេច​តេជោ ហ៊ុន សែន បានអញ្ជើញចុះជាបន្តនៅសាលាបឋមសិក្សាពង្រ ក្នុងភូមិពង្រ ឃុំពង្រ ស្រុកចុងកាល់ ខេត្ត​ឧត្តរ​មានជ័យ។ សម្តេចតេជោ ហ៊ុន សែន បានឧបត្ថម្ភថវិកាមួយចំនួន​ដល់សិស្សសាលា​ទាំង​អស់ ​ដែលកំ​ពុង​សិក្សានៅទីនេះផងដែរ។ ដើម្បីអនាគតល្អ សូមក្មួយៗ ចៅៗ សិស្សានុសិស្សខិតខំសិក្សា និង​ចៀស​​អោយ​ឆ្ងាយពីអំពើអបាយមុខ និង​គ្រឿងញៀនផ្សេងៗ៕

សម្ដេចតេជោអញ្ជើញជួបលោកគ្រូអ្នកគ្រូ និងសិស្សានុសិស្សនៅ អនុវិទ្យាល័យពង្រ, ឧត្តរមានជ័យ, ថ្ងៃទី ២៧ សីហា ២០១៦

បន្ទាប់ពីបានពិសារអាហារថ្ងៃត្រង់ ក្រោយពេលជួបសំណេះសំណាលជាមួយមន្រ្តីរាជការ និងកងកម្លាំង​ប្រ​ដាប់​អាវុធខេត្តឧត្តរមានជ័យរួចហើយ សម្តេចតេជោ ហ៊ុន សែន បានអញ្ជើញ​ចុះសួរសុខទុក្ខ​លោកគ្រូ អ្នក​គ្រូ ព្រមទាំងក្មួយៗសិស្សានុសិស្សនៅ អនុវិទ្យាល័យពង្រ ស្ថិតនៅក្នុង ភូមិពង្រ ឃុំពង្រ ស្រុកចុងកាល់ ខេត្ត​ឧត្តរមានជ័យ។ សម្តេចតេជោ ហ៊ុន សែន និងសប្បុរសជន​សម្រេច​ផ្តល់ជូនអាគារសិក្សាថ្មី ១ ខ្នង កំ​ពស់ ២ ជាន់ ១២ បន្ទប់ និងទីចាត់ការ ១ ខ្នងមាន ៣ បន្ទប់។ ទន្ទឹម​នឹង​នេះ នឹងមានចាក់ផ្លូវបេតុង​ចូល​សា​លា ធ្វើរបងសាលា និងងក្លោងទ្វារថ្មីទៀតផង ដើម្បីកូនក្មួយមាន​អាគារ​សិក្សាល្អសមរម្យ ទាំងសម្រាប់ពេល​បច្ចុប្បន្ន និងទៅអនាគត៕

សម្ដេចតេជោអញ្ជើញ​ជួបសំណេះសំណាលជាមួយមន្រ្តីរាជការ និងកងកម្លាំងប្រដាប់អាវុធ, ឧត្តរមានជ័យ, ថ្ងៃទី ២៧ សីហា ២០១៦

ព្រឹកថ្ងៃទី ២៧ ខែសីហា បន្ទាប់ពីបានចុះសួរសុខទុក្ខបងប្អូនអាជីវករក្នុងផ្សារសំរោង ខេត្ត​ឧត្ដរមាន​ជ័យ​រួច​មក សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញ​ជួប​សំណេះសំ​ណាល​ជាមួយមន្រ្តីរាជការ ក្រុមប្រឹក្សាឃុំ សង្កាត់ ក្រុង ស្រុក ខេត្ត និងកងកម្លាំង​ប្រដាប់អាវុធ​ក្នុង​ខេត្ត​ឧត្ដរ​មាន​ជ័យ។ ក្រោយពីបានពិភាក្សាជាមួយអាជ្ញាធរខេត្ត សម្ដេចតេជោ ហ៊ុន សែន បានណែនាំដល់​អាជ្ញា​ធរ​ខេត្ត និងកងកម្លាំងគ្រប់ប្រភេទត្រូវយកចិត្តទុកដាក់ការពារធនធានព្រៃឈើ ការឆ្លងដែនខុសច្បាប់ ការកាប់​ទន្ទ្រាន​យកដីខុសច្បាប់។ សម្ដេចតេជោ បានបញ្ជាក់ប្រាប់អាជ្ញាធរខេត្ត ត្រូវធ្វើការផ្សព្វផ្សាយ​សារាចរ​ណែ​នាំ​ផ្សារ ដែល​ទើបតែនឹងចេញថ្មីៗ អោយបានទូលំទូលាយ ជាពិសេសត្រូវចម្លងសារាចរនេះ ចែកជូនអាជីវ​ករ​​តាម​​ផ្សារ​នីមួយៗ អោយបានដឹងច្បាស់គ្រប់ៗគ្នា។

សម្តេចតេជោ បានរំលឹកដល់មន្រ្តីទាំងអស់ត្រូវយកចិត្តទុកដាក់រក្សាសន្តិសុខ សណ្ដាប់ធ្នាប់សង្គម រួមមាន​ការបង្ក្រាបបទល្មើសផ្សេងៗ ការជួញដូរគ្រឿងញៀន ដើម្បីផ្តល់ភាពកក់ក្តៅ និងធានាដល់សុវត្ថិភាព នៃការ​រស់នៅ និងការប្រកបរបរការងារផ្សេងៗ របស់ប្រជាពលរដ្ឋ។ ទន្ទឹមនឹងនេះ ត្រូវយកចិត្តទុកដាក់​ក្នុងការ​ផ្តល់​សេវាសាធារណៈ រួមមានសេវាតម្រូវការចាំបាច់ទាំងឡាយ និងសេវាសំណូមពរនានា ជូនប្រជាពលរដ្ឋ​អោយ​បានលឿន និងមានប្រសិទ្ធិភាព។ មន្ត្រីត្រូវគិតថា ខ្លួនជាអ្នកបម្រើប្រជាពលរដ្ឋ ហើយត្រូវខិតខំ​បំបាត់​អោយ​អស់នូវភាពអសកម្មនានា និងចៀសអោយឆ្ងាយពីវប្បធម៌ប្ដីស័ក្កិ ៣ ប្រពន្ធស័ក្កិ ៤។ កងកម្លាំង​ប្រដាប់អាវុធ នគរបាល និងមន្រ្តីពាក់ព័ន្ធទាំងអស់ ត្រូវចូលរួមសហការ ដើម្បីប្រមូលពន្ធ និងជំរុញ​ដល់​ការ​ប្រមូលពន្ធអោយកាន់តែមានប្រសិទ្ធិភាព ដើម្បីពង្រឹងចំណូលថវិកាជាតិ។ អាជ្ញាធរត្រូវ​យកចិត្តទុកដាក់​ដោះ​ស្រាយបញ្ហាជម្លោះដីធ្លីជូនប្រជាពលរដ្ឋអោយបានរហ័ស។ អាជ្ញាធរខេត្ត និងកងកម្លាំង​ប្រដាប់អាវុធ​គ្រប់ប្រភេទទាំងកម្ពុជា និងថៃ ត្រូវចេះសហការគ្នា សម្រួលនៅតាមតំបន់ព្រំដែន ដើម្បីការពារ និងទប់ស្កាត់​ បទល្មើសផ្សេងៗ។

សម្តេចតេជោ បានកោតសរសើរមន្ត្រីគ្រប់ជាន់ថ្នាក់ ដែលបានរួមសហការគ្នា អភិវឌ្ឍខេត្តឧត្ដរមានជ័យ អោយ​កាន់តែរីកលូតលាស់ទៅមុខ។ កិច្ចការដែលអាច​សម្រេចទៅបាន​ដោយ​ជោគជ័យ គឺអាស្រ័យ​ដោយ​មាន​ការចូលរួមពីគ្រប់មជ្ឈដ្ឋានទាំងអស់ ប្រកបដោយមនសិការ និងឆន្ទៈល្អ មោះមុត ព្រមទាំងទទួល​ខុស​ត្រូវ​​ខ្ពស់ក្នុងការបម្រើប្រជាពលរដ្ឋ និងប្រទេសជាតិទាំងមូល៕

សម្ដេចតេជោអញ្ជើញ ជួបអាជីវករផ្សារសំរោង, ឧត្តរមានជ័យ, ថ្ងៃទី ២៧ សីហា ២០១៦

ថ្ងៃទី ២៧ ខែសីហា ឆ្នាំ ២០១៦ បន្ទាប់ពីបានអញ្ជើញចុះសួរសុខទុក្ខកូនក្មួយនៅ វិទ្យាល័យ ហ៊ុន សែន ឧត្តរមានជ័យ រួចមក សម្តេចតេជោ ហ៊ុន សែន បានអញ្ជើញ​ចុះសួរសុខទុក្ខ​ប្រជាពលរដ្ឋ និងអាជីវករ​នៅ “ផ្សារសំរោង” ស្ថិតក្នុងក្រុងសំរោង ខេត្តឧត្តរមានជ័យ។ ប្រជាពលរដ្ឋ និងអាជីវករ​សប្បាយរីក​រាយ​ខ្លាំង​ណាស់ នៅពេលបានឃើញវត្តមានសម្តេចតេជោ អញ្ជើញ​ចុះ​ផ្ទាល់មកដល់ទីផ្សារតែម្តង។ នេះជាឱកាស​ដែល​សម្តេចតេជោ បានឃើញ និងបានស្តាប់ឮផ្ទាល់​ពី​ប្រជា​ពលរដ្ឋ អំពីកង្វល់ និងបញ្ហាប្រឈមមួយចំនួន​ដែល​ប្រជាពលរដ្ឋត្រូវការដំណោះស្រាយ។

សម្តេចតេជោ បានបញ្ជាក់ជូន​បងប្អូនអាជីវករលក់ដូរអោយបានជ្រាបអំពីការលក់ដូរនៅផ្សាររដ្ឋ គឺបងប្អូន​លក់​ដូរ​មួយជីវិត(ត)កូនចៅ ប៉ុន្តែ​ត្រូវទទួលខុសត្រូវចំពោះការបង់ពន្ធ និងភាស៊ីជាដើម។ សូមបងប្អូន ចម្លង​សារាចរដែល​ចុះ​ហត្ថ​លេខាដោយសម្តេចតេជោ កាលពីថ្ងៃទី ១៥ ខែសីហា ឆ្នាំ ២០១៦ ស្តីពីការគ្រប់គ្រង​ផ្សារគ្រប់ប្រភេទ​នៅ​ទូទាំងប្រទេស។ សម្តេចតេជោ នឹងបន្តជួយដោះស្រាយបញ្ហា​ប្រឈមនានា​ជូនបងប្អូន​អាជីវ​ករនៅទូទាំងប្រទេស ក្នុងការប្រកបការងារលក់ដូរកាន់តែមានភាពងាយស្រួល ដើម្បីប្រជាពលរដ្ឋមាន​ជីវភាពរស់នៅ​កាន់តែ​ល្អ​ប្រសើរឡើង៕

សម្ដេចតេជោអញ្ជើញ​ជួបសិស្សានុសិស្សនៃ វិទ្យាល័យ ហ៊ុន សែន ឧត្តរមានជ័យ, ឧត្តរមានជ័យ, ថ្ងៃទី ២៧ សីហា ២០១៦

នៅថ្ងៃទី ២៧ ខែសីហា ព្រឹកមិញនេះ មុននឹងអញ្ជើញជួបសំណេះសំណាលជាមួយមន្ត្រីរាជការ និងកង​កម្លាំង​ប្រដាប់អាវុធក្នុងខេត្តឧត្តរមានជ័យ សម្តេចតេជោ ហ៊ុន សែន នាយករដ្ឋមន្ត្រី​នៃព្រះរាជា​ណាច​ក្រ​កម្ពុជា បានអញ្ជើញមកជួបសំណេះសំណាលជាមួយក្មួយៗសិស្សានុសិស្សនៃ វិទ្យាល័យ ហ៊ុន សែន ឧត្តរ​មានជ័យ ស្ថិតនៅសង្កាត់សំរោង ក្រុងសំរោង ខេត្តឧត្តរមានជ័យ។

សមិទ្ធផលអាគារសិក្សាទាំងអស់នៅក្នុងវិទ្យាល័យនេះ គឺសុទ្ធសឹងជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធ ប៊ុន រ៉ានី ហ៊ុន សែន ដែលបាន និងកំពុង​បម្រើ​ដល់វិស័យអប់រំ​យ៉ាង​សំខាន់​នៅ​ក្នុង​ខេត្តនេះ។ ដើម្បីបំពេញបន្ថែមនូវការខ្វះខាតក្នុងវិទ្យាល័យនេះ សម្តេចតេជោ ហ៊ុន សែន បានសម្រេច​តាម​សំណូមពរលោកនាយកសាលា គឺជួយជុសជុលអាគារចាស់ៗឡើងវិញ ដាក់លូផ្លូវចូលបីកង់ ដើម្បី​ងាយ​ស្រួលដល់ទឹកហូរពេលមានភ្លៀងធ្លាក់ និងរៀបចំជាសួនច្បារលំអរពីលើ ព្រមទាំងផ្តល់ជូន​តារាង​បាល់ទាត់​ស្មៅសិប្បនិម្មិត និងធ្វើរបងថ្មីព័ទ្ធជុំវិញសាលាផងដែរ៕

ក្នុងដំណើរទៅខេត្តឧត្តរមានជ័យ សម្ដេចតេជោចុះជួបជាមួយព្រះសង្ឃនៅតាមបណ្ដាវត្តមួយចំនួន និង ប្រជា​ពលរដ្ឋ, ថ្ងៃទី ២៦ សីហា ២០១៦

នៅថ្ងៃទី ២៦ ខែសីហា ២០១៦ ក្នុងពេលអញ្ជើញធ្វើដំណើរពីខេត្តព្រះវិហារ មកកាន់ខេត្តឧត្តរមានជ័យ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្រៅពីអញ្ជើញចូលជួបសំណេះសំ​ណាល​ជាមួយលោកគ្រូ សិស្សានុសិស្ស ព្រមទាំងជួយកសាងនូវសមិទ្ធផលនានា ជូនដល់សាលារៀន​ជា​ច្រើននៅក្នុងខេត្តឧត្ដរមានជ័យ សម្ដេចតេជោ ហ៊ុន សែន ក៏បានជួបជាមួយ​ព្រះសង្ឃនៅតាម​បណ្ដា​វត្ត​មួយ​ចំនួន និងប្រជាពលរដ្ឋ៖

១. ជួបជាមួយ ព្រះសង្ឃ ប្រជាពលរដ្ឋ និងចូលវត្តប្រាសាទសន្តិភាព ហៅវត្តទំនប់ដាច់ ស្ថិតនៅ​ក្នុង​ភូមិ​ទួលពង្រ ឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ។ សម្ដេចតេជោ​បានជួយ​កសាងបង្ហើយ​ព្រះវិហារ ១ ខ្នង ដែលបច្ចុប្បន្ននេះ ទើបតែកសាងបានប្រហែលជា ១០%។

២. វត្តសាមគ្គីសុខសាន្ត ប្រាសាទមានជ័យ ហៅវត្តស្រែល្អ ស្ថិតនៅក្នុងភូមិស្រែល្អ ឃុំបាក់អន្លូង ស្រុក​ត្រពាំងប្រាសាទ ខេត្តឧត្តមានជ័យ។ ជួយកសាងសាលាបឋមសិក្សាពុទ្ធិក ១ ខ្នង ៣ បន្ទប់ និងផ្តល់ថវិកា​មួយចំនួនដើម្បីកសាងព្រះវិហារ។

៣. ជួបសំណេះសំណាលជាមួយប្រជាពលរដ្ឋ នៅស្រះទឹកកាកបាទក្រហមកម្ពុជា។

៤. វត្តប្រាសាទ សីមាអូរអង្រែ សម្ដេចបានប្រគេនបច្ច័យជូន ៥ លានរៀល។

៥. វត្តសុវណ្ណរុក្ខាវ័ន្ត (អូរផាល) ភូមិឈូកមាស ឃុំកូនក្រៀល ស្រុកសំរោង ខេត្តឧត្ដរមានជ័យ ប្រគេន​បច្ច័យ ១០ លានរៀល ជួយកសាងសាលាឆាន់។

បន្ទាប់ទៅ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញចុះ​សំណេះ​សំ​ណាលសួរសុខទុក្ខ ក្មួយៗ ចៅៗ សិស្សានុសិស្ស និងពិនិត្យអាគារសិក្សានៅ៖

១. សាលាបឋមសិក្សាមរតកតេជោសែន ស្ថិតនៅក្នុងភូមិស្វាយ ឃុំរំដោះស្រែ ស្រុកជាំក្សាន្ត ខេត្ត​ព្រះ​វិហារ។ សម្ដេចតេជោ បានផ្តល់ជូនអាគារសិក្សា ១ ខ្នង ២ ជាន់ ស្មើនឹង ១២ បន្ទប់ ទីចាត់ការ ១ ខ្នង ស្មើនឹង ៣ បន្ទប់ ជួសជុលអាគារចាស់ៗ ចាក់ផ្លូវបេតុងចូលសាលា ធ្វើក្លោងទ្វារថ្មី និងប្រើប្រាស់មួយ​ផ្នែក​បង្កើតទៅជាអនុវិទ្យាល័យ។

២. សាលាបឋមសិក្សា សម្តេច ហ៊ុន សែន ស្រអែម ស្ថិតនៅក្នុងភូមិស្រអែម ឃុំស្រអែម ស្រុកជាំក្សាន្ត ខេត្តព្រះវិហារ។ សម្ដេចតេជោ បានផ្តល់ជូនអាគារសិក្សា ១ ខ្នង ២ ជាន់ ស្មើនឹង ១២ បន្ទប់ ធ្វើទីចាត់ការ ១ ខ្នង ស្មើនឹង ៣ បន្ទប់ និងចាក់ផ្លូវបេតុងចូលសាលា។

៣. វិទ្យាល័យ ជាំក្សាន្ត ស្ថិតនៅភូមិរំដោះស្រែ ឃុំរំដោះស្រែ ស្រុកជាំក្សាន្ត ខេត្តព្រះវិហារ។ សម្ដេចតេជោ បានផ្តល់ជូនអាគារសិក្សា ១ ខ្នង ៣ ជាន់ ស្មើនឹង ១៨ បន្ទប់ និងធ្វើទីចាត់ការ ១ ខ្នង ស្មើនឹង ៣ បន្ទប់។

៤. សាលាបឋមសិក្សា ហ៊ុន សែន ជ័យនិវត្តន៍ ស្ថិតនៅក្នុងភូមិទួលពង្រ ឃុំទំនប់ដាច់ ស្រុក​ត្រពាំង​ប្រាសាទ ខេត្តឧត្តរមានជ័យ។ សម្ដេចតេជោបានផ្តល់ជូនអាគារសិក្សា ១ ខ្នង ៣ ជាន់ ស្មើនឹង ១៨ បន្ទប់ សាងសង់ទីចាត់ការ ១ ខ្នង ស្មើនឹង ៣ បន្ទប់ ជួសជុលអាគារចាស់ៗ ចាក់ផ្លូវបេតុងចូលសាលា ធ្វើ​ក្លោង​ទ្វារថ្មី និងបង្កើតជាអនុវិទ្យាល័យ។

៥. សាលាបឋមសិក្សាបាក់អន្លូង ស្ថិតនៅក្នុងភូមិ សំបូរ ឃុំបាក់អន្លូង ស្រុកត្រពាំងប្រាសាទ។ សម្ដេច​តេជោបានផ្តល់ជូនអាគារសិក្សា ១ ខ្នង ២ ជាន់ ១២ បន្ទប់ ធ្វើទីចាត់ការ ១ ខ្នង ស្មើនឹង ៣ បន្ទប់ និងចាក់​ផ្លូវ​បេតុងចូលសាលា។

៦. វិទ្យាល័យ ហ៊ុន សែន ត្រពាំងប្រាសាទ ស្ថិតក្នុងភូមិ ទួលតាសេក ឃុំត្រពាំងប្រាសាទ ស្រុក​ត្រពាំង​ប្រាសាទ ខេត្តឧត្តរមានជ័យ។ សម្ដេចតេជោផ្តល់ជូនអាគារសិក្សា ១ ខ្នង ២ ជាន់ ១២ បន្ទប់ ទីចាត់ការ ១ ខ្នង ៣ បន្ទប់ បន្ទប់ស្នាក់នៅរបស់សិស្ស ១ ខ្នង ២ ជាន់ ២០ បន្ទប់ ធ្វើផ្លូវបេតុងចូលសាលា។ ចំណែក​ខាងអនុវិទ្យាល័យ ហ៊ុន សែន ត្រពាំងប្រាសាទ ដែលស្ថិតនៅជាមួយគ្នានេះ ផ្តល់ជូន អាគារ ១ ខ្នង ២ ជាន់ ១២ បន្ទប់ ទីចាត់ការ ១ ខ្នង ៣ បន្ទប់។

៧. សាលាបឋមសិក្សាគ្រួសារយ៉េត ស្ថិតក្នុងភូមិ សែនសម ឃុំអូរស្វាយ ស្រុកត្រពាំងប្រាសាទ ខេត្ត​ឧត្តរមានជ័យ។ សម្ដេចតេជោបានផ្តល់ជូនអាគារសិក្សា ១ ខ្នង ៣ ជាន់ ១៨ បន្ទប់ ទីចាត់ការ ១ ខ្នង ៣ បន្ទប់ រៀបចំផ្លូវបេតុងចូលសាលា ធ្វើតារាងបាល់ទះ បាល់បោះ ធ្វើក្លោងទ្វារថ្មី និងរបងព័ទ្ធជុំវិញ។

៨. សាលាបឋមសិក្សា និងអនុវិទ្យាល័យអូរស្វាយ ស្ថិតនៅក្នុងភូមិឈើទាលជ្រុំ ឃុំអូរស្វាយ ស្រុក​ត្រពាំង​ប្រាសាទ ខេត្តឧត្តរមានជ័យ។ សម្ដេចតេជោផ្តល់ជូនអាគារសិក្សា ១ ខ្នង ២ ជាន់ ១២ បន្ទប់ និងទីចាត់ការ ១ ខ្នង ស្មើនឹង ៣ បន្ទប់ ធ្វើតារាងបាល់បោះ និងបាល់ទះ ធ្វើក្លោងទ្វារ និងរបងព័ទ្ធជុំវិញ ចាក់​បេតុង​ផ្លូវ​ចូលសាលា។

៩. សាលាបឋមសិក្សាថ្នល់បំបែក ស្ថិតនៅក្នុងភូមិថ្នល់បំបែក ឃុំផ្អាវ ស្រុកត្រពាំងប្រាសាទ ខេត្ត​ឧត្តរមានជ័យ។ ផ្តល់ជូនអាគារសិក្សា ១ ខ្នង ២ ជាន់ ស្មើនឹង ១២ បន្ទប់ ទីចាត់ការ ១ ខ្នង ៣ បន្ទប់ ចាក់​ផ្លូវបេតុងចូលសាលា ធ្វើក្លោងទ្វារ និងរបងព័ទ្ធជុំវិញអណ្តូងទឹក។

១០. សាលាបឋមសិក្សាពពេល ស្ថិតនៅក្នុងភូមិពពេល ឃុំផ្អាវ ស្រុកត្រពាំងប្រាសាទ ខេត្តឧត្តរមាន​ជ័យ។ ផ្តល់ជូនអាគារសិក្សា ១ ខ្នង ស្មើនឹង ៦ បន្ទប់ ទីចាត់ការ ១ ខ្នង ៣ បន្ទប់ អណ្តូងទឹក ធ្វើផ្លូវ​ចាក់​បេតុង និងរបងព័ទ្ធជុំវិញ។

១១. សាលាបឋមសិក្សាទួលថ្មី ស្ថិតក្នុងភូមិថ្លាត ឃុំថ្លាត ស្រុកអន្លង់វែង ខេត្តឧត្តរមានជ័យ។ ផ្តល់ជូន​អាគារ ១ ខ្នង ២ ជាន់ ១២ បន្ទប់ ទីចាត់ការ ១ ខ្នង ៣ បន្ទប់ ស្រះទឹក ធ្វើរបងព័ទ្ធជុំវិញសាលា ចាក់ផ្លូវ​បេតុងចូលសាលា។

១២. វិទ្យាល័យអន្លង់វែង ស្ថិតនៅក្នុងភូមិថ្នល់កែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ។ ផ្តល់​ជូនអាគារសិក្សា ១ ខ្នង ៣ ជាន់ ៣០ បន្ទប់ ជុសជុលតារាងបាល់ទះ និងធ្វើរបង។ ចំណែកផ្នែក​បឋម​សិក្សា​វិញ ផ្តល់ជូនអាគារសិក្សា ១ ខ្នង ២ ជាន់ ២០ បន្ទប់ និងទីចាត់ការ ១ ស្មើនឹង ៣ បន្ទប់។

១៣. សាលាបឋមសិក្សា ហ៊ុន សែន អូរអង្រែ ភូមិទួលប្រាសាទ ឃុំត្រពាំងត្រាវ ស្រុកអន្លង់វែង ផ្ដល់​ជូន​អគារសិក្សា ១ ខ្នង ២ ជាន់ ១២ បន្ទប់, ធ្វើរបង ស្រះទឹក, ទីចាត់ការ ១ ខ្នង ៣ បន្ទប់, ចាក់បេតុងផ្លូវចូល។

១៤. សាលាបឋមសិក្សាសាមគ្គី អូរស្រមរ ស្ថិតក្នុងភូមិអូរស្រមរ ឃុំត្រពាំងតាវ ស្រុកអន្លង់វែង បង្កើតជា​អនុវិទ្យាល័យ ផ្ដល់អគារ ១ ខ្នង ២ ជាន់ ១២ បន្ទប់ ទីចាត់ការ ១ ខ្នង ៣ បន្ទប់, របងព័ទ្ធជុំវិញ, តារាង​បាល់ទះ, បាល់បោះ, ចាក់បេតុងផ្លូវចូល។

១៥. សាលាបឋមសិក្សា ត្រពាំងតាវ ស្ថិតក្នុងភូមិត្រពាំងតាវ, ឃុំត្រពាំងតាវ ស្រុកអន្លង់វែង ខេត្ត​ឧត្ដរ​មាន​ជ័យ, ផ្ដល់ជូនទីចាត់ការ ១ ខ្នង ៣ បន្ទប់, ជីកស្រះធំមួយ, ធ្វើរបងព័ទ្ធជុំវិញ, ចាក់បេតុងផ្លូវចូល៕

១៦. សាលាបឋមសិក្សាទួលស្វាយ ស្ថិតនៅក្នុងភូមិទួលស្វាយ ឃុំត្រពាំងតាវ ស្រុកអន្លងវែង ផ្ដល់ជូន អគារ​សិក្សា ១ ខ្នង ៣ ជាន់ ១៨ បន្ទប់ និងបឋមសិក្សា ១ ខ្នង ២ ជាន់ ១២ បន្ទប់ , សង់ទីចាត់ការ ១ ខ្នង, កន្លែងស្នាក់នៅគ្រូ ១០ បន្ទប់៕

១៧. អនុវិទ្យាល័យសំរោង ស្ថិតនៅក្នុង ក្រុងសំរោង ខេត្តឧត្ដរមានជ័យ សម្ដេចផ្ដល់ជូនអគារសិក្សា ១ ខ្នង ៣ ជាន់ ៣០ បន្ទប់ បង្កើតជាវិទ្យាល័យ, ធ្វើទីចាត់ការ ១ ខ្នង ៣ បន្ទប់៕

សម្ដេចតេជោអញ្ជើញចុះជួបសំណេះសំណាលជាមួយបងប្អូនកងទ័ពនៅទីបញ្ជាការកងពលធំអន្តរាគមន៍លេខ ៣, ព្រះវិហារ, ថ្ងៃទី ២៦ សីហា ២០១៦

រសៀលថ្ងៃទី ២៦ ខែ សីហា ឆ្នាំ ២០១៦ បន្ទាប់ពីបានចុះសួរសុខទុក្ខសិស្សានុសិស្ស លោកគ្រូ អ្នកគ្រូ នៅ​សា​លាបឋមសិក្សាមរតកតេជោ សម្ដេចតេជោ អញ្ជើញជួបសំណេះសំណាលបងប្អូនកងទ័ព​នៅទី​បញ្ជា​ការ​កង​ពលធំ​អន្តរាគមន៍​លេខ​ ៣។ សម្ដេចតេជោបានសង្កត់ធ្ងន់ពីតួនាទីរបស់យោធា ត្រូវរក្សា​អធិប​តេយ្យដែន​ដី អនុវត្តច្បាប់ ពង្រឹងនីតិរដ្ឋ និងបានណែនាំដល់កងកម្លាំងទាំងអស់ រក្សាទំនាក់ទំនងអោយល្អ​រវាងកង​កម្លាំង​ជាប់ព្រំដែននៃប្រទេសជាប់ព្រំដែន ជាពិសេស ប្រទេស​ថៃ ដោយបង្កើតជាកម្មវិធីកីឡាមិត្តភាព​រវាង​កង​ទ័ពកម្ពុជា និងកងទ័ពថៃ ដើម្បីពង្រឹងមិត្តភាព កិច្ច​សហ​ប្រតិបត្តិការរវាងគ្នា និងគ្នា។

កងពលធំអន្តរាគមន៍លេខ ៣ ត្រូវចូលរួមការពារសណ្ដាប់ធ្នាប់ និងអន្តរាគមន៍​ជួយខេត្តនៅពេលដែល​មាន​ការ​ស្នើសុំអន្តរាគមន៍ពីខាងខេត្តក្នុងតំបន់។ កងកម្លាំងទាំងអស់ ត្រូវតែយកចិត្ត​ទុកហ្វឹកហ្វឺនគ្រប់ពេលវេលា ទាំងកាយសម្បទា យុទ្ធវិធី និងបច្ចេកវិទ្យាព័ត៌មាន លើសពីនេះទៅទៀត ត្រូវ​យកចិត្តទុកដាក់ថែរក្សា​សម្ភារៈ​បំ​ពាក់ផ្សេងៗ ដូចជា អាវុធជាដើម។ ក្រៅពីការងារជំនាញ កងកម្លាំង​ត្រូវចេះ​បង្កបង្កើនផលនៅក្នុងអង្គភាព ក៏ដូចជានៅក្នុងគ្រួសារ ដើម្បីពង្រឹងជីវភាពរស់នៅកងទ័ព​អោយកាន់តែ​ប្រសើរឡើង ជាពិសេសថ្នាក់ដឹកនាំ​អង្គ​ភាព​ត្រូវ​ធានាផ្គត់ផ្គង់ភស្តុភារ អោយបានគ្រប់គ្រាន់ ដល់យោធា​តាមគោលរបបយោធាដែលរាជរដ្ឋា​ភិ​បា​លផ្ដល់ជូន។ ទន្ទឹមនឹងនេះដែរ ឯកឧត្ដម ស្រី ឌឹក មេបញ្ជាការ​កង​ពលធំអន្តរាគមន៍លេខ ៣ បានធ្វើការ​ប្ដេជ្ញា​ចិត្តយ៉ាងដាច់ខាត ត្រូវការពារមាតុភូមិ ប្រជាជន ព្រះមហាក្សត្រ រដ្ឋធម្មនុញ ជាពិសេស គឺរាជរដ្ឋាភិ​បាល​កម្ពុជា ដែលកំពុងដឹកនាំដោយសម្ដេចអគ្គមហាសេនាបតីតេជោ ហ៊ុន សែន ដែលបានប្រសូត្រពី​ឆន្ទៈ​ពិត​ប្រាកដរបស់ប្រជាពលរដ្ឋ ព្រមទាំងប្រឆាំងដាច់ខាត រាល់ការ​ប៉ុនប៉ងផ្ដួលរំលំរាជរដ្ឋាភិបាលស្របច្បាប់ ទោះជាតាមរូបភាពណាក៏ដោយ និងប្ដេជ្ញាដាច់ខាតមិន​អោយ​មានបដិវដ្ដន៍ពណ៌ដាច់ខាត។

សម្តេចតេជោ ហ៊ុន សែន បានកោតសរសើរផងដែរដល់កងកម្លាំងទាំងអស់ ចំណុះកងពលធំ​អន្តរាគមន៍​លេខ ៣ ដែលយកចិត្តទុកដាក់គោរពអនុវត្តនូវតួនាទី ក្នុងការការពារបូរណភាពទឹកដី និងចូល​សហការល្អ​ជា​មួយអាជ្ញាធរក្នុងតំបន់ ក្នុងការបម្រើប្រជាពលរដ្ឋអោយបានល្អប្រសើរ៕

សម្ដេចតេជោកំពុងឆ្ពោះទៅកាន់ទីបញ្ជាការកងពលធំលេខ ៣, ព្រះវិហារ, ថ្ងៃទី ២៦ សីហា ២០១៦

ពេលនេះ ខ្ញុំកំពុងបន្តដំណើរឆ្ពោះទៅកាន់ទីបញ្ជាការកងពលធំលេខ ៣ ដែលនៅ​មិនឆ្ងាយ​ពី​ប្រាសាទ​ព្រះ​វិហារ។ ខ្ញុំនឹង​ជួបសំណេះសំណាលសួរសុខទុក្ខកងកម្លាំងប្រដាប់អាវុធ នៃបណ្តាអង្គភាពដែលបាននិង​កំ​ពុង​ឈរជើង​ការពារទឹកដីតាមបណ្តោយព្រំដែនកម្ពុជា-ថៃ ពិសេសនៅទិសប្រាសាទព្រះវិហារ។ តាមការ​គ្រោង​ទុក ខ្ញុំនឹងបន្តដំណើរទៅកាន់ខេត្តឧត្តរមានជ័យ ដើម្បីពិនិត្យមើលសមិទ្ធផលសង្គមជាតិ ដែល​យើង​បាន​រួមគ្នាកសាង និងដោះស្រាយបញ្ហាប្រឈមដែលនៅសេសសល់ ដូចដែលខ្ញុំបានធ្វើជាមួយ​ខេត្តនានា​កន្លង​មក។ ដំណើរក្នុងសប្តាហ៍នេះ ផ្លូវឆ្ងាយ និងការងារច្រើន។ សុំអធ្យាស្រ័យពីបងប្អូនជនរួមជាតិ ដែលខ្ញុំ​មិន​​បានចុះ​សួរទុក រាប់ទាំងអាជីវករដែលលក់ដូរនៅតាមផ្សារនៃខេត្តត្បូងឃ្មុំ ខេត្តកំពង់ចាម ខេត្តកំពង់ធំ និង​នៅ​ទី​រួម​ខេត្តព្រះវិហារផងដែរ៕

សម្ដេចតេជោអញ្ជើញចុះជួបសំណេះសំណាលជាមួយមន្រ្តីរាជការ កងកម្លាំងប្រដាប់អាវុធ, ព្រះវិហារ, ថ្ងៃទី ២៥ សីហា ២០១៦

រសៀលថ្ងៃទី ២៥ ខែសីហា សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បាន​អញ្ជើញជួបសំណេះសំណាលជាមួយមន្រ្តីរាជការក្រុមប្រឹក្សាឃុំ សង្កាត់ ក្រុង ស្រុក ខេត្ត និងកង​កម្លាំង​ប្រ​ដាប់​អាវុធក្នុងខេត្តព្រះវិហារ។ ក្នុងកិច្ចប្រជុំល្ងាចថ្ងៃនេះ ក្រោយពីបានពិភាក្សាជាមួយអាជ្ញាធរខេត្ត សម្ដេច​តេជោ បាន​សម្រេចកាត់ដីចំនួន ៨០,៥៣ ហិកតា នៃដីសរុបចំនួន ១៥២ ហិកតានៃដីព្រលានយន្តហោះ​ ស្ថិត​ក្នុង​ភូមិហ្មសែត សង្កាត់ប៉ាល់ហាល ក្រុងព្រះវិហារ ជូនប្រជាពលរដ្ឋចំនួន ១២៧ គ្រួសារ ដែលកំពុង​រស់នៅ​ទីនោះយូរមកហើយ។ ដីដែលនៅសល់ចំនួន ៧១,១៧ ហិកតា គឺប្រគល់ជូនអាជ្ញាធរ​ខេត្ត​ ដើម្បីធ្វើ​ការ​អភិវឌ្ឍ ដូចជាសាកលវិទ្យាល័យនៅលើដីនេះ។ ដោយខេត្តព្រះវិហារជាខេត្តដែលមាន​កម្លាំងចម្រុះរួមគ្នា​ច្រើន ដូច្នេះអាជ្ញាធរខេត្ត និងកងកម្លាំងទាំងអស់ ត្រូវសហការគ្នាអោយបានល្អក្នុងការងារបម្រើប្រជាពលរដ្ឋ បង្រ្កាបបទល្មើសផ្សេងៗ។ សម្ដេចតេជោបានសង្កត់ធ្ងន់ថា អាជ្ញាធរខេត្ត និងកងកម្លាំង​ទាំងអស់​ត្រូវ​ទប់​ស្កាត់​ក្រុមឈ្មួញកាប់ឈើអោយខានតែបាន ជាពិសេសត្រូវចាប់អោយបានមេក្លោងធំៗ។ កន្លងមក បទ​ល្មើស​ព្រៃឈើត្រូវបានកើតឡើង​នៅតំបន់មួយចំនួន ដែលគ្រប់គ្រង​ដោយយោធា។ សូមមេទ័ពមួយចំនួន​ពិនិត្យ​មើលឡើងវិញ។ សម្ដេចតេជោ ហ៊ុន សែន ក៏បានលើកឡើងដែរពីបញ្ហាពាក់ព័ន្ធនឹងផ្សារ គឺអាជ្ញាធរ​ខេត្ត​​ត្រូវធ្វើការផ្សព្វផ្សាយ​ សារាចរណែនាំផ្សារដែលទើបតែនឹងចេញថ្មីៗអោយបានទូលំទូលាយ ជាពិសេស​ត្រូវចម្លង​សារាចរនេះ​ ចែក​ជូន​អាជីវករតាមផ្សារនីមួយៗបន្ថែមទៀត។

សម្តេចតេជោ បានរំលឹកដល់មន្ត្រីទាំងអស់ត្រូវយកចិត្តទុកដាក់រក្សាសន្តិសុខ សណ្ដាប់ធ្នាប់សង្គម និង​ការ​បង្ក្រាបនូវបទល្មើសផ្សេងៗ ការជួញដូរគ្រឿងញៀន ដើម្បីផ្តល់ភាពកក់ក្តៅ និងធានាដល់​សុវត្ថិភាព​នៃការ​រស់​នៅ និងការប្រកបរបរការងារផ្សេងៗរបស់ប្រជាពលរដ្ឋ។ ទន្ទឹមនឹងនេះ ត្រូវយកចិត្តទុកដាក់ ការផ្តល់នូវ​សេវា​សាធារណៈ រួមមានសេវាតម្រូវការចាំបាច់ទាំងឡាយ និងសេវាសំណូមពរនានា ជូនប្រជាពលរដ្ឋ​អោយ​បានលឿន និងមានប្រសិទ្ធិភាព ដោយមន្ត្រីត្រូវគិតថា ខ្លួនជាអ្នកបម្រើប្រជាពលរដ្ឋ ហើយត្រូវ​ខិតខំ​បំបាត់​អោយអស់នូវភាពអសកម្មនានា។ កងកម្លាំងប្រដាប់អាវុធ នគរបាល និងមន្រ្តីពាក់ព័ន្ធទាំងអស់ ត្រូវ​ចូល​រួមសហការប្រមូលពន្ធអោយមានប្រសិទ្ធិភាពខ្ពស់។ អាជ្ញាធរត្រូវយកចិត្តទុកដាក់ការពារតំបន់ការពារ តំបន់អភិរក្ស និងតំបន់ទេសចរណ៍ ដូចជាតំបន់ព្រះវិហារជាដើម ព្រមទាំងយកចិត្ត​ទុកដាក់ដោះស្រាយ​បញ្ហា​ជម្លោះដីធ្លីជូនប្រជាពលរដ្ឋអោយបានលឿន និងមានប្រសិទ្ធិភាពខ្ពស់។ សម្តេចតេជោ ហ៊ុន សែន បាន​កោតសរសើរផងដែរដល់មន្ត្រីគ្រប់ជាន់ថ្នាក់ដែលបានរួមសហការគ្នាអភិវឌ្ឍខេត្តព្រះវិហារ អោយកាន់​តែ​រីកលូតលាស់ទៅមុខ។ កិច្ចការដែលសម្រេចទៅបានដោយជោគជ័យ គឺអាស្រ័យដោយមាន​ការ​ចូល​រួម​ពី​គ្រប់​មជ្ឈដ្ឋានទាំងអស់ប្រកបដោយមនសិការ និងឆន្ទៈល្អមោះមុត និងការ​ទទួលខុសត្រូវខ្ពស់ ក្នុង​ការ​បម្រើ​ប្រ​ជាពលរដ្ឋ និងប្រទេសជាតិ៕

សម្ដេចតេជោអញ្ជើញ​ជួបសិស្សានុសិស្សនៅសាលាបឋមសិក្សា និងវិទ្យាល័យ ត្បែងមានជ័យ, ព្រះវិ​ហារ, ថ្ងៃទី ២៥ សីហា ២០១៦

ព្រឹកថ្ងៃទី ២៥ ខែសីហា ដដែល ក្នុងពេលធ្វើដំណើរមកកាន់ខេត្តព្រះវិហារ សម្តេចតេជោ ហ៊ុន សែន បាន​បន្ត​ដំណើរអញ្ជើញចុះសួរសុខទុក្ខក្មួយៗ ចៅៗ សិស្សានុសិស្ស​នៅសាលា​បឋមសិក្សាមួយទៀត​ដែល​មាន​ឈ្មោះថា សាលាបឋមសិក្សាត្បែងមានជ័យ ដែលស្ថិតនៅក្នុងភូមិអណ្តូង​ពោធិ៍ សង្កាត់កំពង់ប្រណាក ក្រុង​ព្រះវិហារ ។ សម្តេចតេជោ ហ៊ុន សែន និងសប្បុរសជនបានសម្រេចផ្តល់ជូនអាគារសិក្សាថ្មី ១ ខ្នង ៣ ជាន់ ស្មើនឹង ១៨ បន្ទប់បន្ថែមទៀត។ សាងសង់ទីចាត់ការ ១ ខ្នង ៣ បន្ទប់ ចាក់ផ្លូវ​បេតុង​ដើរ​ចូល​សាលា ធ្វើតារាងបាល់ ១ និងធ្វើក្លោងទ្វារសាលាថ្មីផងដែរ។ សម្តេចតេជោ ហ៊ុន សែន នឹងបន្តសាងសង់​សាលា​រៀន​នៅ​ទូទាំងប្រទេស ដើម្បីអោយកូនខ្មែរមានឱកាសបានចូលរៀនទាំងអស់គ្នា។

ជាបន្ទាប់ សម្តេចតេជោ ហ៊ុន សែន បានអញ្ជើញ​ជួបក្មួយៗ ​សិស្សា​នុ​សិស្ស​នៅវិទ្យាល័យត្បែងមានជ័យ ​នៅ​ក្នុងភូមិ អណ្តូងពោធិ៍ សង្កាត់កំពង់ប្រណាក ក្រុងព្រះវិហារ។ សម្តេចតេជោ ហ៊ុន សែន និងសប្បុរស​ជន​បាន​ធ្វើ​អំណោយ​អាគារសិក្សាថ្មីបន្ថែម ១ ខ្នង កំពស់ ៣ ជាន់ ស្មើនឹង ៣០ បន្ទប់ និងជុស​ជុល​អា​គារ​ចាស់ៗ ធ្វើរបងព័ទ្ធ​ជុំវិញ ចាក់ផ្លូវបេតុងចូលសាលា និងសាងសង់ទីចាត់ការ ១ ខ្នង ៣ បន្ទប់ទៀតផង។ នៅ​ក្នុងឱកាសនោះ តាមសំណូមពរពីលោកគ្រូនាយកសាលាអនុវិទ្យាល័យ ហ៊ុន សែន ត្បែង ក្នុងខេត្តព្រះ​វិហារ​នេះផងដែរ ដែលសម្តេចតេជោមិនបានអញ្ជើញចូលទៅមើលដោយផ្ទាល់ តែបាន​សម្រេច​ផ្តល់​ជូននូវ​អា​គារសិក្សា ១ ខ្នង ៣ ជាន់ ស្មើនឹង ១៨ បន្ទប់ផងដែរ។

សូមអរគុណ លោកគ្រូ អ្នកគ្រូ ដែលបានយកចិត្តទុកដាក់ពង្រឹងគុណភាព​អប់រំ​អោយកាន់តែមាន​ប្រសិទ្ធិ​ភាព​ល្អប្រសើរ នៅតាមបណ្តាខេត្តនានា សម្តេចតេជោ ហ៊ុន សែន នឹងបន្ត​កសាង​សាលារៀនជាច្រើន​ថែម​ទៀត ចាប់តាំងពីទីក្រុងរហូតដល់ជនបទ ដើម្បីផ្តល់ឱកាសដល់ក្មួយៗចៅៗបានសិក្សាគ្រប់ៗគ្នា៕

សម្ដេចតេជោអញ្ជើញជួបគរុសិស្សនៃសាលាគរុកោសល្យ និងវិក្រឹតការ, ព្រះវិហារ, ថ្ងៃទី ២៥ សីហា ២០១៦

ថ្ងៃទី ២៥ សីហា បន្ទាប់ពីបានជួបសិស្សានុសិស្សនៃអនុវិទ្យាល័យ និងសាលាបឋម​សិក្សាហ្មសែតរួចមក សម្តេចតេជោ ហ៊ុន សែន ក៏បានអញ្ជើញ​បន្តដំណើរ​ចុះជួបសួរសុខ​ទុក្ខក្មួយៗ គរុសិស្សនៃសាលា​គរុកោ​សល្យ និងវិក្រឹតការខេត្តព្រះវិហារជាបន្តទៀត។ សម្តេច​តេជោ ហ៊ុន សែន ព្រមទាំងសប្បុរសជន បាន​ធ្វើ​អំ​ណោយអាគារសិក្សាថ្មី ១ ខ្នង កំពស់ ៣ ជាន់ ស្មើនឹង ១៨ បន្ទប់ និងសាងសង់កន្លែង​ស្នាក់​សម្រាប់​គរុ​សិស្ស​នៅទីនេះចំនួន ២ ជាន់ ស្មើនឹង ១០ បន្ទប់ និងផ្តល់ជូននូវ​ដំណើរកម្សាន្ត​បែបកម្មសិក្សា​ដល់​គរុសិស្ស និងលោកគ្រូអ្នកគ្រូទៅលេងក្រុងព្រះសីហនុទៀតផង៕

សម្ដេចតេជោអញ្ជើញ​ជួបសិស្សានុសិស្សនៅអនុវិទ្យាល័យ និងបឋមសិក្សាហ្មសែត, ព្រះវិហារ​, ថ្ងៃទី ២៥ សីហា ២០១៦

សម្តេចតេជោ ហ៊ុន សែន បានអញ្ជើញជួបសួរសុខ​ទុក្ខ​លោក​គ្រូ​ អ្នកគ្រូ និងកូនក្មួយចៅៗ​សិស្សានុ​សិស្ស​នៃអនុវិទ្យាល័យ និងបឋមសិក្សាហ្មសែត ស្ថិតនៅក្នុង​ភូមិ​អូរ​ខ្លែងព័រ សង្កាត់ប៉ាលហាល ក្រុងព្រះវិហារ។ សម្តេចតេជោ ពេញចិត្តចំពោះក្មួយៗ និងចៅៗទាំងអស់ ដែល​បានខិតខំប្រឹងប្រែងសិក្សារៀនសូត្រ​ហើយរួម​ជា​មួយសប្បុរសជន សម្តេចតេជោ បានផ្តល់ជូនសាលាបឋមសិក្សាថ្មី ១ ខ្នង ៣ ជាន់ ស្មើនឹង ១៨ បន្ទប់ ផ្តល់ជូនទីចាត់ការ ១ ខ្នង ៣ បន្ទប់ ជួសជុលអាចាស់ៗឡើងវិញ ធ្វើរបងព័ទ្ធជុំវិញ ធ្វើ​ក្លោងទ្វារថ្មី សង់​បង្គន់​អនា​ម័យ អណ្តូងទឹក ចាក់បេតុងផ្លូវដើរ ព្រមទាំងផ្តល់ថវិកា ៥ លាន និង ២ ពាន់​ដុល្លារ សម្រាប់សិស្សានុ​សិស្ស​ត្រៀមរៀបចំចូលរួមប្រកួតកីឡាបាល់ទាត់ ​សម្តេចតេជោ នាពេលខាងមុខផង​ដែរ …៕

សម្ដេចតេជោអញ្ជើញចុះជួបសិស្សានុសិស្សនៅសាលាបឋមសិក្សាអូរទ្រលោក, ព្រះវិហារ, ថ្ងៃទី ២៥ សីហា ២០១៦

បន្ទាប់ពីបានអញ្ជើញជួបសំណេះសំណាលជាមួយបងប្អូនអាជីវករ នៅផ្សារទន្លេម្រេចរួចមក នៅព្រឹក​ថ្ងៃ​ដដែល សម្តេចតេជោបានអញ្ជើញជួបកូនក្មួយចៅៗ សិស្សានុសិស្ស​នៃសាលាបឋម​សិក្សាអូរទ្រលោក ក្នុង​ភូមិ​អូរទ្រលោក ឃុំរមទម ស្រុករវៀង ខេត្តព្រះវិហារ ដើម្បីពិនិត្យស្ថានភាព​អាគារសិក្សាចាស់ៗ និងស្វែង​យល់​អំពី​សុខទុក្ខ និងស្ថានភាពសិក្សារបស់កូនក្មួយ និងចៅៗនៅទីនេះ។ សម្តេចតេជោ ហ៊ុន សែន រួម​ទាំង​​សប្បុរសជន បានផ្តល់ជូននូវអាគារសិក្សាថ្មី ១ ខ្នង កំពស់ ២ ជាន់ ស្មើនឹង ១២ បន្ទប់ និងទីចាត់ការ ១ ស្មើនឹង ៣ បន្ទប់ ព្រមទាំងជួសជុលអាគារចាស់ៗ និងធ្វើក្លោងទ្វារ ជីកអណ្ដូងទឹកស្នប់ ២ ធ្វើបន្ទប់ទឹក និង​​ធ្វើ​របងព័ទ្ធជុំវិញសាលា ហើយចាក់ដី​បំពេញផ្លូវដើរ​ក្នុងបរិវេណសាលា ដើម្បីកូនក្មួយមាន​ភាពងាយ​ស្រួល​​​ក្នុង​ការសិក្សាទាំងក្នុងរដូវវស្សា និងប្រាំង។ ផ្នែកមួយនៃសាលានេះ គឺនឹងរៀបចំបង្កើត​ទៅជាអនុ​វិទ្យា​ល័យ​​ទៀតផង ដើម្បីសម្រួលកុំអោយក្មួយ និងចៅៗ ធ្វើដំណើរទៅសិក្សានៅកន្លែងឆ្ងាយរាប់សិបគីឡូម៉ែត្រ ពីទី​កន្លែងដែលចៅៗ និងកូនក្មួយរស់នៅ …៕

សម្ដេចតេជោអញ្ជើញជួបអាជីវករផ្សារសហគមន៍បឹងទន្លេម្រេច, ព្រះវិហារ, ថ្ងៃទី ២៥ សីហា ២០១៦

អញ្ជើញធ្វើដំណើរចេញពីខេត្តកំពង់ចាម ឆ្ពោះមកកាន់ខេត្តព្រះវិហារ នៅថ្ងៃទី ២៥ ខែ សីហា សម្តេចតេជោ ហ៊ុន សែន បានអញ្ជើញជួបសួរ​សុខ​ទុក្ខ និងសំណេះសំណាលជាមួយបងប្អូនប្រជាពលរដ្ឋ អាជីវករនៃផ្សារ​បឹង​ទន្លេម្រេច ដែលស្ថិតនៅក្នុងភូមិអូរពោធិ៍ ឃុំរមណីយ ស្រុករវៀង ខេត្តព្រះវិហារ។ ផ្សារបឹងទន្លេម្រេច​ត្រូវ​បាន​បង្កើតឡើង ដើម្បី​ផ្តល់​ឱកាសអោយបងប្អូនប្រជាពលរដ្ឋមានមុខរបរលក់ដូរ ក្នុងពេលដែលមានកម្មករ កម្មការនីជាច្រើនពាន់នាក់​ទៀត កំពុងធ្វើការងារនៅក្នុងតំបន់អភិវឌ្ឍន៍នេះ។ សម្តេចតេជោ បាន​ទទួល​ទាន​គុយ​ទាវសាច់គោ​យ៉ាងឆ្ងាញ់ពិសារ​នៅផ្សារនេះ ជាមួយបងប្អូនកម្មករ កម្មការនី និងបានសំណេះសំណាល​សួរ​សុខទុក្ខអំពីជីវភាពរស់នៅ និងការប្រកបការងារ​របស់បងប្អូននៅក្នុងតំបន់អភិវឌ្ឍន៍ខាងលើនេះ ប្រកប​ដោយ​ភាពរីករាយស្និទ្ធស្នាលក្រៃលែង៕

សម្ដេចតេជោ ក្នុងដំណើរឆ្ពោះមកកាន់ខេត្តព្រះវិហារ, ថ្ងៃទី ២៥ សីហា ២០១៦

ពេលនេះ ខ្ញុំកំពុងធ្វើដំណើរចេញពីខេត្តកំពង់ចាម ឆ្ពោះមកកាន់ខេត្តព្រះវិហារ ដែលបានចេញ​ដំណើរ​តាំងពី​ម៉ោង ៥:០០ ព្រឹក ដើម្បីចុះមកពិនិត្យសមិទ្ធផលជាតិ និងជួបសួរសុខទុក្ខមន្រ្តីរាជការ កូនក្មួយ​សិស្សានុ​សិស្ស ព្រមទាំងពិនិត្យ និងដោះស្រាយបញ្ហាប្រឈមមួយចំនួនដល់ប្រជាពលរដ្ឋយើង។ ជាថ្មីម្តង​ទៀត​ខ្ញុំ​សូម​អភ័យទោស ដែលមិនបានចុះសួរសុខទុក្ខបងប្អូនអាជីវករខេត្តកំពង់ចាម។ ខ្ញុំនឹងវិលមក​ជួប​​បងប្អូន​នៅ​ពេលឆាប់ៗនេះ។ សន្តិភាពដែលយើងរកបានតាមរយៈនយោបាយឈ្នះ-ឈ្នះ អនុញ្ញាតឱ្យប្រជាជន រាប់​ទាំង​រូបខ្ញុំ​ ​ធ្វើ​ដំណើរបានទាំងយប់ដោយគ្មានការភ័យខ្លាចដូចពេលប្រទេសមាន​សង្គ្រាមនោះ​ឡើយ។ ខ្ញុំ​ពិត​ជាមានការរីករាយដោយបានពិនិត្យឃើញសកម្មភាពប្រជាជននៅក្បែរភ្លឺស្រែ​ តាមដងផ្លូវ ដែលខ្ញុំ​ឆ្លង​កាត់​រាប់ទាំងចំការកៅស៊ូនៃស្រុកចំការលើផង។ ខ្ញុំសង្ឃឹមថា ជនរួមជាតិ នឹងរួមជាមួយខ្ញុំ ដើម្បីការពារ​សន្តិ​ភាព​​សម្រាប់បន្តការអភិវឌ្ឍសេដ្ឋកិច្ចសង្គមជាបន្តទៀត៕

សម្ដេចតេជោអញ្ជើញពិនិត្យសួនច្បារច្រាំងទន្លេ និងជិះទូកទេសចរណ៍តាមទន្លមេគង្គ, កំពង់ចាម, ថ្ងៃទី ២៤ សីហា ២០១៦

បន្ទាប់ពីបានអញ្ជើញចូលអុជធូបទៀននៅចេតិយស្ថិតក្នុងវត្តបុទមរតនៈដីដុះហើយ នៅរសៀលថ្ងៃ​ដដែល សម្តេចតេជោ ហ៊ុន សែន បានជួបសំណេះសំណាលជាមួយបងប្អូនប្រជាពលរដ្ឋ និងចុះពិនិត្យ​មើល​ដំណើរ​ការ​សាងសង់សួនច្បារច្រាំងទន្លេ និងមើលពីភាពរីកចម្រើននៃសោភ័ណភាពច្រាំងទន្លេមេគង្គ។ បន្ទាប់​មក សម្តេចតេជោ បានអញ្ជើញជិះទូកទេសចរណ៍​ស្រូបយកខ្យល់បរិសុទ្ធ បន្ធូរ​អារម្មណ៍​ពី​ទន្លេ​ ក្រោយពីបានបំ​ពេញ​កិច្ចការអស់មួយថ្ងៃកន្លងមក។ មានបងប្អូន​ប្រជាពលរដ្ឋជាច្រើន​កកកុញ​បានចូលរួម​ទទួលស្វាគមន៍​សម្តេចតេជោ ដែលបានបង្ហាញអោយឃើញពីសេចក្តីគោរពស្រឡាញ់ និង​ទំនាក់​ទំនង​ល្អ​រវាងប្រជាពលរដ្ឋ និងនាយករដ្ឋមន្រ្តី។

ក្នុងរយៈពេលប៉ុន្មានឆ្នាំចុងក្រោយនេះ ខេត្តកំពង់ចាមពិតជាមានការរីកចម្រើនយ៉ាងឆាប់រហ័ស ទាំងហេដ្ឋា​រចនា​សម្ព័ន្ធ និងសួនច្បារលំអរសោភ័ណភាពទីរួមខេត្តដែលមើលទៅគួរជាទីទាក់ទាញ ជា​ពិសេសតាម​រយៈ​សេវាទូកទេសចរណ៍នេះ បានទាក់ទាញដល់ភ្ញៀវទេសចរជាតិ និងអន្តរជាតិ ជារៀងរាល់​ថ្ងៃ ដែលបាន​ផ្តល់​នូវការងារ និងប្រាក់ចំណូលដល់បងប្អូនប្រជាពលរដ្ឋ និងក្មួយៗយុវជនខ្មែរផងដែរ។ សម្តេចតេជោ សូម​ការ​អធ្យាស្រ័យពី​បងប្អូនអាជីវករនៅផ្សារកំពង់ចាម និងផ្សារដទៃៗទៀត ដែល​សម្តេចមិនអាចចូល​សួរសុខទុក្ខបាន ដោយត្រូវដោះស្រាយកិច្ចការសំខាន់ និងចាំបាច់មួយ​ចំនួនជាបន្ទាន់​។ សម្តេចតេជោ​នឹង​អញ្ជើញ​វិលត្រឡប់មកលេងបងប្អូន នៅក្នុងឱកាស​ប្រណាំងទូកង​ក្នុង​រដូវបុណ្យអុំទូកឆ្នាំនេះ៕

សម្ដេចតេជោអញ្ជើញអុចធូបគោរពប្រណិប័ត ចេតិយជីដូនជីតាខាងម្ដាយ, កំពង់ចាម, ថ្ងៃទី ២៤ សីហា ២០១៦

រសៀលថ្ងៃទី ២៤ ខែ សីហា នៅទីរួមខេត្តកំពង់ចាម សម្តេចតេជោ ហ៊ុន សែន បាន​អញ្ជើញ​ទៅ​អុជ​ធូប​គោ​រព​ប្រណិប័ត ចេតិយ ជីដូនជីតាសាច់សារលោហិតខាងម្តាយរបស់សម្តេចតេជោ ដែល​ស្ថិត​នៅក្នុងបរិវេណ​វត្ត​ដីដុះនៃទីរួមខេត្តកំពង់ចាម។ ការអញ្ជើញមកដល់ទឹកដីកំណើតខេត្តកំពង់ចាមម្តងៗ ធ្វើអោយសម្តេច នឹក​​ឃើញអនុស្សាវរីយ៍ជាច្រើនដែលមិនអាចបំភ្លេចបានក្នុងជីវិត ទាំងពេលមុន និងក្រោយពេលសង្រ្គាម ជា​ពិសេសក្នុងពេលសម្តេចតេជោ តស៊ូរំដោះប្រទេសជាតិពីរបប ប៉ុល ពត ខ្មែរក្រហម។ នៅថ្ងៃនេះ សម្តេច​តេជោ​ក៏បានជួបជុំជាមួយបងប្អូនជីដូនមួយរបស់សម្តេចផងដែរ …៕

សម្ដេចតេជោអញ្ជើញ ជួបគណៈគ្រប់គ្រងនៃមជ្ឈមណ្ឌលគរុកោសល្យភូមិភាគ, កំពង់ចាម, ថ្ងៃទី ២៤ សីហា ២០១៦

បន្ទាប់ពីបានដោះស្រាយសំណូមពរមួយចំនួនដល់គរុសិស្សនៃសាលាគរុកោសល្យ និងវិក្រឹតការ​ខេត្ត​កំពង់​ចាមរួចហើយ សម្តេចតេជោ ហ៊ុន សែន បានអញ្ជើញជួប​គណៈគ្រប់គ្រងនៃមជ្ឈមណ្ឌល​គរុកោសល្យ​ភូមិ​ភាគ​ខេត្តកំពង់ចាមដែលមានទីតាំងនៅមិនឆ្ងាយពីគ្នា។ សម្តេចតេជោ បានពិនិត្យ​ឃើញ​អាគារដែល​សម្តេច និងសម្តេចកិត្តិព្រឹទ្ធបណ្ឌិត បានសង់ជូនកាលពីជាង ២០ ឆ្នាំមុន ដែលពេលនេះ​ មានស​ភាព​ចាស់​ទ្រុឌ​ទ្រោម ​ហើយត្រូវធ្វើការជួសជុលឡើងវិញ។ សម្តេចតេជោ និងសប្បុរសជន បានសម្រេចផ្តល់ជូន​អាគារ​សិក្សា​ថ្មី ១ ខ្នង កំពស់ ២ ជាន់ ស្មើនឹង ២៤ បន្ទប់ សម្រាប់ការស្នាក់នៅរបស់គរុសិស្ស ព្រមទាំងជួសជុល​អាគារសិក្សាទាំងអស់នៅទីនេះ អោយ​មាន​សុវត្ថិភាព … និងរៀបចំ​កសាងផ្លូវបេតុងចូលមជ្ឈមណ្ឌល​នេះ​ផងដែរ …។ ដើម្បី​លើកទឹកចិត្តដល់ក្មួយៗគរុសិស្ស សម្តេចតេជោ ហ៊ុន សែន និងសប្បុរសជន​បាន​ឧបត្ថម្ភ​ដំណើរ​កំសាន្ត​ ចុះកម្មសិក្សាដល់គរុសិស្សទាំងអស់ដែលកំពុងសិក្សានៅមជ្ឈមណ្ឌល …៕

សម្ដេចតេជោអញ្ជើញ ជួបក្រុមគរុសិស្សនៃសាលាគរុកោសល្យ និងវិក្រឹតការ, កំពង់ចាម, ថ្ងៃទី ២៤ សីហា ២០១៦

ថ្ងៃទី ២៤ ខែសីហា បន្ទាប់ពីបានជួបសួរសុខទុក្ខកុមារពិការភ្នែក និងគថ្លង់រួចមក សម្តេចតេជោ ហ៊ុន សែន បានអញ្ជើញមកជួបសំណេះសំណាលក្រុមគរុសិស្សនៃសាលាគរុកោសល្យ និងវិក្រឹតការខេត្តកំពង់ចាម ដោយ សម្តេចតេជោ ហ៊ុន សែន បានធ្វើអំណោយអាគារស្នាក់នៅចំនួន ១០ បន្ទប់ លើក្រោមសម្រាប់​គរុ​សិស្ស​នារី ស្នាក់បន្ត​ការសិក្សានៅទីនេះ និងដើម្បីអប់រំហ្វឹកហ្វឺនដល់គរុសិស្សគ្រប់ជំនាន់​អោយកាន់តែមាន​ភាព​ងាយស្រួល។ ជាការលើកទឹកចិត្តដល់ការខិតខំប្រឹងប្រែងសិក្សារបស់គរុសិស្សនៅទីនេះ សម្តេចតេជោ ហ៊ុន សែន ព្រមទាំងសប្បុរសជនក៏បានឧបត្ថម្ភដំណើរកម្សាន្ត ចុះកម្មសិក្សា​ដល់គរុសិស្សទាំងអស់ អោយ​មាន​ដំណើរ​កម្សាន្ត​នៅខេត្តសៀមរាប ក្នុងពេលឆាប់ៗនេះ …៕

សម្ដេចតេជោអញ្ជើញសួរសុខទុក្ខកុមារពិការភ្នែក និងកុមារគថ្លង់ នៃសាលាកុមារ​ពិការភ្នែក ឬកុមារគថ្លង់​កំពង់ចាម, កំពង់ចាម, ថ្ងៃទី ២៤ សីហា ២០១៦

ព្រឹកថ្ងៃទី ២៤ ខែ សីហា បន្ទាប់ពីបានជួបសំណេះសំណាលជាមួយមន្ត្រីរាជការ កងកម្លាំង​ប្រដាប់​អាវុធ​ក្នុងខេត្តកំពង់ចាមរួចមក សម្តេចតេជោ ហ៊ុន សែន អញ្ជើញចូលសំណេះសំណាលសួរសុខ​ទុក្ខកុមារ​ពិការ​ភ្នែក និងកុមារគថ្លង់​នៃសាលាកុមារពិការភ្នែក ឬកុមារគថ្លង់កំពង់ចាមនេះ។ សម្តេចតេជោ ស្រឡាញ់កុមារ​ដោយ​មិនប្រកាន់ពណ៌សម្បុរ ឬជំនឿសាសនានយោបាយឡើយ។ ទន្ទឹម​នឹង​នោះ សម្តេចតេជោ បានអំពាវ​នាវ​កុំអោយមានការរើសអើងចំពោះជនពិការរួមទាំងពលរដ្ឋ និងកុមារពិការ​ទូទៅ ព្រោះគ្មានអ្នកណាចង់​ក្លាយ​ខ្លួន​ជាជនពិការឡើយ។ សម្តេចតេជោ ហ៊ុន សែន បានរៀបចំអាហារមួយពេលយ៉ាងឆ្ងាញ់ដល់​កូន​ក្មួយៗ ចៅៗ កុមារពិការភ្នែក និងកុមារគថ្លង់ចំនួន ២៦៩ នាក់ ព្រមទាំង​ផ្តល់​​ជូន​នូវ​គ្រឿងឧបភោគបរិភោគ និង​ថវិកាមួយចំនួនដល់កម្មវិធីរបស់សាលា និងលោកគ្រូអ្នកគ្រូ​ទៀត​ផង៕

សម្ដេចតេជោអញ្ជើញ​ជួបសំណេះសំណាលជាមួយមន្ត្រីរាជការ កងកម្លាំងប្រដាប់អាវុធ, កំពង់ចាម, ថ្ងៃទី ២៤ សីហា ២០១៦

ព្រឹកថ្ងៃទី ២៤ ខែសីហា ឆ្នាំ ២០១៦ នេះ សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណា​ចក្រ​កម្ពុជា បានអញ្ជើញ​ជួប​សំណេះ​សំណាលជាមួយមន្រ្តី ក្រុមប្រឹក្សាឃុំ សង្កាត់ ក្រុង ស្រុក ខេត្ត និងកង​កម្លាំង​ប្រដាប់អាវុធក្នុង​ខេត្ត​កំពង់ចាម។ សម្ដេចតេជោ បានសម្រេចដកយកផ្លូវ​ពីធនាគារ​ពិភព​លោក ប្រ​គល់​មកអោយអាជ្ញាធរខេត្តកំពង់ចាមកសាង ដែលមាន​ប្រវែង ២០ គីឡូម៉ែត្រ នៅ​ក្នុង​ស្រុក​ស្រីសន្ធរ ខេត្ត​កំ​ពង់​ចាម។ ក្រុមជំនាញនឹងចុះសិក្សាជាបន្ទាន់ ដើម្បីកំណត់ថា ត្រូវចាក់បេតុង ឬប្រើ​កៅស៊ូ។ ហើយត្រូវធ្វើ​ជូន​ប្រជាពលរដ្ឋប្រើប្រាស់អោយហើយមុនពេលបោះឆ្នោត។ នេះជាដំណោះ​ស្រាយ​ដែល​សម្តេច តេជោ​បាន​ឆ្លើយតបទៅនឹង Comment ស្នើសុំតាមហ្វេសប៊ុករបស់ក្មួយ LE Moon …។ កន្លងមកការកសាង​ផ្លូវ​នេះ ស្ថិតនៅក្នុងគម្រោងរបស់ធនាគារពិភពលោក។ ប៉ុន្តែពេលនេះ ការកសាងនឹងប្រើប្រាស់ថវិកាជាតិតែ​ម្ដង។ ទន្ទឹមនឹងនេះដែរ សម្ដេចតេជោ បាន​សម្រេច​អោយចេញ ស.ជ.ណ កាត់ដីចេញពីសារពើពន្ធ​របស់រដ្ឋ​ចំនួន ០៣ កន្លែងក្នុងខេត្តកំពង់ចាម ជូន​ប្រជាពលរដ្ឋដែលធ្លាប់បានរស់ទីនេះយូរមកហើយ៖ ទី ១ ដីឃ្លាំង​ពា​ណិជ្ជកម្មស្រុកចំការលើ នឹងកាត់ជូន​ប្រជាពលរដ្ឋចំនួន ៦២ គ្រួសារ។ ទី ២ ដីឃ្លាំងស្រុកស្រីសន្ធរ កាត់​ជូន​ប្រជាជនចំនួន ២ គ្រួសារ និងទី ៣ ដីអតីតមណ្ឌលយុទ្ធជនពិការមន្ទីរសង្គមកិច្ច កាត់ជូនប្រជា​ជន​ចំ​នួន ២៩ គ្រួសារ។ សម្ដេចតេជោ បាន​បញ្ជាក់ច្បាស់ប្រាប់អាជ្ញាធរខេត្ត និងមន្ទីរពាក់ព័ន្ធ ត្រូវសហការ​គ្នា​ធ្វើ​ការ​ងារនេះ ព្រមទាំង​ធ្វើ​ប័ណ្ណ​កម្មសិទ្ធិជូនពួកគាត់អោយបានលឿនបំផុត។

ក្នុងកិច្ចប្រជុំនេះ ពាក់ព័ន្ធនឹងផ្សារ សម្ដេចតេជោ ហ៊ុន សែន បានណែនាំអោយអាជ្ញាធរ​ខេត្ត​ ធ្វើការ​ផ្សព្វ​ផ្សាយ​នូវសារាចរណែនាំស្តីពីផ្សារ ដែលទើបសម្រេចថ្មីៗ អោយបានទូលំទូលាយ ជាពិសេសត្រូវចម្លងសារា​ចរ​នេះ ចែកជូនអាជីវករតាមផ្សារនីមួយៗអោយបានដឹងជ្រួតជ្រាបគ្រប់គ្នា។

សម្តេចតេជោ បានរំលឹកដល់មន្រ្តីទាំងអស់ត្រូវយកចិត្តទុកដាក់រក្សាសន្តិសុខ សណ្ដាប់ធ្នាប់សង្គម រួមមាន​ការ​​បង្ក្រាប​បទល្មើសផ្សេងៗ និងការជួញដូរគ្រឿងញៀន ដើម្បីផ្តល់ភាពកក់ក្តៅ និងធានា​ដល់​សុវត្ថិ​ភាព​នៃ​ការ​រស់នៅ និងការប្រកបរបរការងារផ្សេងៗរបស់ប្រជាពលរដ្ឋ។ ទន្ទឹមនឹងនេះ ត្រូវយកចិត្ត​ទុក​ដាក់ផ្តល់នូវ​សេ​វា​សាធារណៈ រួមមានសេវាតម្រូវការចាំបាច់ទាំងឡាយ និងសេវាសំណូមពរនានា ជូន​ប្រជាពលរដ្ឋ​អោយ​បានលឿន និងមានប្រសិទ្ធភាពបំផុត។ មន្ត្រីត្រូវគិតថា ខ្លួនជាអ្នកបម្រើប្រជាពលរដ្ឋ ហើយ​ត្រូវខិតខំ​បំ​បាត់អោយអស់នូវភាពអសកម្មនានា។ កងកម្លាំងប្រដាប់អាវុធ នគរបាល និងមន្រ្តី​ពាក់​ព័ន្ធទាំងអស់ ត្រូវ​ចូល​រួមសហការដើម្បីប្រមូលពន្ធអោយមានប្រសិទ្ធិភាពខ្ពស់ ដើម្បីពង្រឹង​ចំណូល​ថវិកាជាតិ។ អាជ្ញាធរត្រូវ​យក​ចិត្តទុកដាក់ការពារតំបន់ការពារ និងតំបន់អភិរក្ស រួមមានដូចជាវត្តអង្គរ វត្តទឹកឆា ភ្នំហាន់ជ័យជាដើម ជាពិសេសត្រូវយកចិត្តទុកដាក់ដោះស្រាយបញ្ហាជម្លោះដីធ្លី​ជូនប្រជាពលរដ្ឋ​អោយបានលឿនបំផុត។

សម្តេច​តេជោ ហ៊ុន សែន កោតសរសើរមន្ត្រីគ្រប់ជាន់ថ្នាក់ដែលបានរួមសហការគ្នា អភិវឌ្ឍកំពង់ចាម​អោយកាន់តែរីកលូតលាស់ទៅមុខ។ កិច្ចការដែលសម្រេចទៅ​បានដោយជោគជ័យ គឺអាស្រ័យដោយមាន​ការ​ចូលរួម​ពីគ្រប់មជ្ឈដ្ឋានទាំងអស់ប្រកបដោយមនសិការ និងឆន្ទៈល្អមោះមុត និង​ការទទួលខុសត្រូវខ្ពស់​ក្នុង​ការបម្រើប្រជាពលរដ្ឋ និងប្រទេសជាតិដោយសុទ្ធចិត្ត៕

សម្ដេចតេជោអញ្ជើញ​ជួបសិស្សានុសិស្ស និងពិនិត្យអាគារសិក្សាចាស់ទ្រុឌទ្រោម ១ ខ្នង នៅអនុវិទ្យាល័យ បឹងកុក, កំពង់ចាម, ថ្ងៃទី ២៤ សីហា ២០១៦

ថ្ងៃទី ២៤ សីហា មុននឹងចូលជួបសំណេះសំណាលជាមួយមន្ត្រីរាជការខេត្តកំពង់ចាម សម្តេចតេជោ ហ៊ុន សែន បានអញ្ជើញចុះមកពិនិត្យអាគារសិក្សាចាស់ទ្រុឌទ្រោម ១ ខ្នង “អនុវិទ្យាល័យ​បឹងកុក” ស្ថិតនៅក្នុង​ភូមិ​ទី ១៤ សង្កាត់បឹងកុក ក្រុងកំពង់ចាម ខេត្តកំពង់ចាម ជាការឆ្លើយតបទៅនឹងសំណូមពរ comment មក​កាន់​គេហទំព័រហ្វេសប៊ុក សម្ដេចតេជោ ពីឈ្មោះ Chhym Chan thouern ដែលជា​នាយក​សា​លា​ថា ”សូមសម្តេច មេត្តា មេត្តា មេត្តា អញ្ជើញ មកពិនិត្យអាគារចាស់ ១ ខ្នង ១១ បន្ទប់ នៅអនុវិទ្យាល័យបឹងកុក ភូមិទី ១៤ សង្កាត់កំពង់ចាមផងចុះ” … សម្តេចតេជោ ហ៊ុន សែន និងសប្បុរសជន បានធ្វើ​អំណោយ​អាគារ​សិក្សា​ថ្មី ១ ខ្នង ៣ ជាន់ ១៨ បន្ទប់ ដោយវាយអាគារសាលាចាស់នេះចេញ និង​សាង​សង់​ទីចាត់ការ ១ ខ្នង ៣ បន្ទប់ និងរៀបចំអោយមានជាសាលសហសិក្សាថែមទៀតផង។ ទន្ទឹម​នឹងនោះ នឹង​មាន​រៀបចំ​អោយ​មាន​តារាងបាល់ទះ និងបាល់ទាត់សម្រាប់កូនក្មួយសិស្សានុសិស្សផងដែរ៕

សម្ដេចតេជោអញ្ជើញ ជួបក្រុមសិស្សានុសិស្សសាលាបឋមសិក្សា និងអនុវិទ្យាល័យ ល្វាលើ, កំពង់ចាម​, ថ្ងៃទី ២៣ សីហា ២០១៦

អញ្ជើញជួបសំណេះសំណាលជាមួយមន្រ្តីរាជការខេត្តត្បូងឃ្មុំ កាលពីព្រឹកមិញនេះ មានក្រុម​ក្មួយ Heng SokPhi Rak ដែលបានសរសេរ Comment សំណូមពរមកកាន់ Facebook សម្តេចតេជោ ថា (Heng SokPhi Rak “សូមគោរពលោកអ៊ំជាទីស្រលាញ់ ខ្ញុំបាទតំណាងអោយលោកគ្រូអ្នកគ្រូ និង​សិស្សានុសិស្ស​ទាំង​អស់នៃអនុវិទ្យាល័យល្វាលើ ស្រុកចំការលើ ចង់អោយលោកអ៊ំជួយអាគារសិក្សា មួយ​ខ្នង ដោយមាន​ការ​ខ្វះខាតតាំងពីឆ្នាំ ២០០៩ មកម្ល៉េះ! សព្វថ្ងៃអាគារសិក្សាមិនមានផ្ទាល់ខ្លួនទេ គឺខ្ចី​បឋមសិក្សាទាំងស្រុង ដោយស្នើសុំជាច្រើនដង តែមិនទទួលបានលទ្ធផលអ្វីទាល់តែសោះ គឺមាន​តែ​លោក​អ៊ំអាចជួយពួកយើង​ទាំង​អស់គ្នាបាន។ សូមលោកអ៊ំទទួលយកសំណើអំពីពួកយើងទាំងអស់គ្នាផង ពួកយើងនឹងសង្ឃឹម​ថា​លោក​អ៊ំ មិនធ្វើអោយពួកយើងអស់សង្ឃឹមទេ សូមជូន​ពរ​លោកអ៊ំអោយមាន​សុខភាពល្អ និងដឹកនាំប្រ​ទេស​​អោយកាន់តែរីកចម្រើន និងជាប់ឆ្នោតនៅអាណត្តិក្រោយៗទៀត!”។

រសៀលថ្ងៃដដែលនេះ សម្តេចតេជោ ហ៊ុន សែន បានសម្រេច​អញ្ជើញ​ចុះ​ជួបក្មួយៗសិស្សានុសិស្ស​នៅ​សា​លា​បថមសិក្សា និងអនុវិទ្យាល័យល្វា ស្ថិតក្នុងភូមិល្វាត្បូង ឃុំល្វាលើ ស្រុកចំការលើ ខេត្ត​កំពង់ចាម តាម​សំណូមពរ។ ការធ្វើដំណើរសៀលនេះ មានភ្លៀងធ្លាក់យ៉ាងច្រើន ទាំងពេលកំពុងធ្វើដំណើរទៅ និង​ពេល​អញ្ជើញត្រឡប់មកវិញ។ ក្រោយពីបានពិនិត្យស្ថានភាពអាគារសិក្សាចាស់ៗ ជាក់ស្តែងរួចមក និងក្រោយពី​បាន​ពិភាក្សាជាមួយ លោកគ្រូអ្នកគ្រូ និងស្តាប់យោបល់ក្មួយៗ សិស្សានុសិស្ស សម្តេចតេជោ ហ៊ុន សែន និងសប្បុរសជន បានធ្វើអំណោយអាគារសិក្សា ១ ខ្នង កំពស់ ២ ជាន់ ស្មើនឹង ១២ បន្ទប់ និងទីចាត់ការ ១ ខ្នង ៣ បន្ទប់ មាន​របងព័ទ្ធជុំវិញសាលា និងផ្តល់ម៉ាស៊ីនដេរ ១០ គ្រឿង ព្រមទាំងជួសជុសអាគារចាស់វិញ និង​កសាង​ផ្លូវលំ ១ ខ្សែប្រវែង ១៥ គីឡូម៉ែត ដើម្បីជួយសម្រួលដល់ការធ្វើដំណើររបស់កូនក្មួយ និងប្រជា​ពល​រដ្ឋ​​រស់​នៅទីនេះ …៕

សម្ដេចតេជោអញ្ជើញជួបលោកយាយម្តាយធម៌, ត្បូងឃ្មុំ, ថ្ងៃទី ២៣ សីហា ២០១៦

ថ្ងៃនេះ បន្ទាប់ពីបានជួបសំណេះសំណាល​ជាមួយ​មន្ត្រីរាជការ កងកម្លាំងប្រដាប់អាវុធក្នុងខេត្តត្បូងឃ្មុំរួចមក សម្តេចតេជោ មានភ័ព្វសំណាង​បានជួបលោក​យាយម្តាយធម៌ឈ្មោះ អ៊ី ស័រ អាយុ ៨៣ ឆ្នាំ សព្វថ្ងៃរស់​នៅ​ភូមិ តាហៀវលើ ឃុំកោងកាង ស្រុកពញ្ញាក្រែក ខេត្តត្បូងឃ្មុំ។ លោកយាយធ្លាប់បានផ្តល់ផ្ទះជូន​សម្តេច​តេជោ និងសម្តេច​កិត្តិព្រឹទ្ធបណ្ឌិត ស្នាក់អាស្រ័យ ក្រោយពីសម្តេចទាំងទ្វេ​ទើបបានរៀបការ​រួចថ្មីៗ នៅក្នុង​ជំ​នាន់ ប៉ុល ពត នាឆ្នាំ ១៩៧៦។

ចំណែកលោកយាយវិញ នៅពេលដឹងថា សម្តេចតេជោអញ្ជើញមកកាន់ខេត្តត្បូងឃ្មុំ គឺលោកយាយ​បាន​មក​អង្គុយឃ្លាំចាំនៅក្លោងទ្វារចូលមន្ទីរខេត្ត ដោយទទូចប្រាប់អ្នកយាមថាគាត់ចង់ជួបសម្តេចខ្លាំង​ណាស់។ សួរថា តើលោកយាយចង់ជួបសម្តេចមានបញ្ហាអ្វី? គាត់ឆ្លើយថា ចង់ជួបសម្តេចចុងក្រោយ ព្រោះ​សម្តេច​ធ្លាប់​មកស្នាក់នៅក្នុងផ្ទះគាត់ពីជំនាន់ ប៉ុល ពត។ អ្នកដែលបានស្តាប់សំដីលោកយាយហើយ ពុំ​មាន​អ្នក​ណា​ជឿគាត់ឡើយ។ ក្រុមការងារបានថតរូបគាត់ និងបានបញ្ជូនទៅកាន់​សម្តេចតេជោ​។ … សម្តេចតេជោ នៅចងចាំបានទាំងអស់។ ​នៅពេលនោះ សម្តេច និងសម្តេចកិត្តិព្រឹទ្ធបណ្ឌិត បានជិះរ៉ឺម៉កម៉ូតូ ហើយកង់​ម៉ូតូ​ក៏បានបែកនៅមុខផ្ទះលោកយាយ អ៊ី ស័រ។ សម្តេចតេជោបានឈប់សុំផ្ទះលោកយាយសម្រាក ១ យប់ ពិត​ប្រា​កដមែន។ សម្តេចតេជោ នៅចងចាំបានតាំងពីសំបកផ្ទះ និងគ្រែខាងក្នុងផ្ទះជាដើម ដែលនៅរក្សា​សភាព​​ដូចដើម។

សម្តេចតេជោ ហ៊ុន សែន បានអញ្ជើញមក​លេង​ផ្ទះលោកយាយ និងបានឃើញផ្ទះ និងគ្រែ ដែល​សម្តេច​ធ្លាប់​បានស្នាក់នៅ​មួយពេល ក្នុងជំនាន់ ប៉ុល ពត ជាមួយភរិយា។ សម្តេចតេជោ ហ៊ុន សែន បានសម្រេច​សង់​ផ្ទះទេវតាមួយខ្នងជូនលោកយាយ និងឧបត្ថម្ភ​ថវិកាចិញ្ចឹមលោកយាយម្តាយធម៌អស់មួយជីវិត មិន​អោយ​លោក​យាយពិបាកទៀតឡើយ។ ជាមួយគ្នា​នេះដែរ សម្តេចតេជោ ហ៊ុន សែន បានឧបត្ថម្ភថវិកា​មួយ​ចំ​នួនដល់ប្រជាពលរដ្ឋក្នុងភូមិនេះចំនួន ១០២ គ្រួសារទៀតផង៕

សម្ដេចតេជោអញ្ជើញ​ជួបសំណេះសំណាលជាមួយមន្ត្រីរាជការ កងកម្លាំងប្រដាប់អាវុធ, ត្បូងឃ្មុំ, ថ្ងៃទី ២៣ សីហា ២០១៦

ថ្ងៃទី ២៣ សីហា ឆ្នាំ ២០១៦ សម្ដេចតេជោ ហ៊ុន សែន អញ្ជើញជួបសំណេះសំណាលជាមួយ​មន្ត្រី​ក្រុម​ប្រឹក្សាឃុំ សង្កាត់ ក្រុង ស្រុក ខេត្ត និង កងកម្លាំងប្រដាប់អាវុធក្នុងខេត្តត្បូងឃ្មុំ  ដោយបានសង្កត់​ធ្ងន់​ពីការ​បញ្ឈប់​ការកាប់ព្រៃឈើខុសច្បាប់ទាំងស្រុងនៅក្នុងខេត្តត្បូងឃ្មុំ។  សម្តេចបានបញ្ជាទៅលោក​អភិបាល​ខេត្ត​ជាអ្នកទទួលខុសត្រូវ និងបញ្ជា​ផ្ទាល់​ទៅ​កម្លាំងទាំង ៣ ប្រភេទមាន ប៉ូលីស ប៉េអឹម និងទាហានខេត្ត ត្រូវអនុវត្តការងារនេះអោយបានដាច់ខាត ជាពិសេសត្រូវចាត់វិធានការចំពោះមេក្លោងធំៗ អោយបាន កុំចាប់​បាន​តែប្រជាពលរដ្ឋតូចតាច។ ខេត្ត​ត្បូងឃ្មុំ ជាខេត្តជាប់ព្រំប្រទល់វៀតណាម ដូច្នេះអាជ្ញាធរខេត្តត្រូវសហ​ការ​ជាមួយ​អាជ្ញា​ធរ​ខេត្តវៀតណាម ដើម្បី​រួមគា្នទប់ស្កាត់រាល់បទឧក្រិដ្ឋឆ្លងដែនទាំងឡាយ ជាពិសេសការ​ដឹក​ឈើខុសច្បាប់ និង​ការ​ជួញ​ដូរ​ថ្នាំ​ញៀនជាដើម។ ពាក់ព័ន្ធនឹងបញ្ហាផ្សារ អាជ្ញាធរខេត្តត្រូវធ្វើការផ្សព្វ​ផ្សាយ​នូវសារាចរណែនាំផ្សារ ដែលទើប​នឹង​ចេញថ្មីៗនេះ អោយបានទូលំទូលាយ ជាពិសេស​ត្រូវចម្លងសា​រាចរ​នេះ ចែកជូនអាជីវករតាម​ផ្សារ​នីមួយៗបន្ថែមទៀត។

សម្តេចតេជោ បានក្រើនរំលឹកដល់​មន្រ្តីទាំងអស់ត្រូវយកចិត្ត​ទុកដាក់​រក្សា​សន្តិសុខ សណ្ដាប់ធ្នាប់សង្គម ពង្រឹង​ការបង្ក្រាបបទល្មើសផ្សេងៗ ការជួញដូរគ្រឿង​ញៀន ដើម្បី​ផ្តល់​ភាពកក់ក្តៅ និងធានាដល់សុខសុវត្ថិ​ភាព​នៃការរស់នៅ និងការប្រកបរបរការងារផ្សេងៗរបស់ប្រជាពលរដ្ឋ។ ទន្ទឹមនឹងនេះ ត្រូវយកចិត្តទុកដាក់​ក្នុងការ​ផ្តល់នូវសេវាសាធារណៈ រួមមានសេវាតម្រូវការចាំបាច់ទាំងឡាយ ពិសេសការធ្វើអត្ត​សញ្ញាណ​​ប័ណ្ណ និងសេវាសំណូមពរផ្សេងៗ ជូនប្រជាពលរដ្ឋអោយបានលឿន និងមានប្រសិទ្ធិភាព។ មន្ត្រីត្រូវគិតថា ខ្លួន​ជាអ្នកបម្រើប្រជាពលរដ្ឋ ហើយត្រូវបន្ទាបខ្លួន និង​ខិតខំ​បំបាត់​អោយអស់នូវភាពអសកម្មនានា។ កង​កម្លាំង​ប្រដាប់អាវុធ នគរបាល និងមន្រ្តីពាក់ព័ន្ធទាំងអស់ ត្រូវចូល​រួម​សហការជាមួយភ្នាក់ងារគយ និងពន្ធ​ដារ ដើម្បីប្រមូលពន្ធអោយមានប្រសិទ្ធិភាព។ អាជ្ញាធរត្រូវយកចិត្ត​ទុកដាក់​ការពារធនធានធម្មជាតិ តំបន់​អភិរក្ស ព្រមទាំងដាក់ដោះស្រាយជម្លោះដីធ្លី​ជូន​ប្រជាពលរដ្ឋអោយឆាប់ ​និងមាន​ប្រសិទ្ធិ​ភាព …៕