Speech given by the Prime Minister on national and international occasions, review conference, etc. in English and in Khmer
FN ៖ ភ្លាមៗក្រោយពីទទួលបាននូវសារអបអរសាទររបស់លោក ស៊ី ជិនពីង អគ្គលេខាធិការនៃបក្សកុម្មុយនីស្តចិន និងលោក លឺ ខឺឈាង នាយករដ្ឋមន្រ្តីនៃសាធារណរដ្ឋ ប្រជាមានិតចិន ដែលបានផ្ញើសារអបអរសាទរចំពោះគណបក្សប្រជាជនកម្ពុជា ដែលទទួលបានជ័យជំនះក្នុងការបោះឆ្នោត ជ្រើសតាំងតំណាងរាស្រ្ត អាណត្តិទី៦។ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា បានផ្ញើសារថ្លែងអំណរគុណជូនចំពោះលោក ស៊ី ជិនពីង និងលោក លឺ ខឺឈាង ជាមួយលិខិតដាច់ដោយឡែកពីគ្នា។ នៅក្នុងលិខិតថ្លែងអំណរគុណលោក ស៊ី ជិនពីង បានសរសេររៀបរាប់ថា៖ «ខ្ញុំមានអារម្មណ៍រំភើបរីករាយជាខ្លាំង ដោយបានទទួលនូវសារអបអរសាទររបស់ឯកឧត្តម តែក្នុងពេលដ៏ខ្លី ក្រោយពីឃើញច្បាស់ថា គណបក្សប្រជាជនកម្ពុជាបានទទួលជ័យជំនះដ៏លើសលុបក្នុងការបោះឆ្នោតជ្រើសរើសសមាជិករដ្ឋសភា នីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨។ ខ្ញុំសូមសម្តែងនូវការអំណរគុណយ៉ាងជ្រាលជ្រៅចំពោះប្រទេសចិន ដែលមិនត្រឹមតែផ្តល់ជំនួយដល់ដំណើរការបោះឆ្នោតប៉ុណ្ណោះទេ តែថែមទាំងបានបញ្ជូនក្រុមអ្នកសង្កេតការណ៍ធំបំផុតជាងពេលមុនៗមកធ្វើជាសាក្សីក្នុងព្រឹត្តិការណ៍ដ៏សំខាន់នេះនៅប្រទេសខ្ញុំ»។ ខ្ញុំសូមបញ្ជាក់ជូនឯកឧត្តម អំពីការប្តេជ្ញាចិត្តយ៉ាងមុតមាំ បន្តសហការយ៉ាងជិតស្និទជាមួយឯកឧត្តម ដើម្បីជម្រុញការផ្លាស់ប្តូរប្រាស្រ័យទាក់ទងគ្នារវាងគណបក្ស និងគណបក្ស រដ្ឋាភិបាល និងរដ្ឋាភិបាល ក៏ដូចជាប្រជាជននិងប្រជាជន ហើយនឹងបន្តលើកកម្ពស់ចំណងមិត្តភាពជាបងប្អូន និងកិច្ចសហប្រតិបត្តិការក្នុងភាពជាដៃគូយុទ្ធសាស្រ្ត គ្រប់ជ្រុងជ្រោយរវាងកម្ពុជា និងចិន…
គណបក្សប្រជាជនកម្ពុជាបន្តឈ្នះឆ្នោត ការជួបជុំកម្មករនៅតែបន្ត ថ្ងៃនេះ ពូពិតជាមានការរីករាយដែលបានជួបជាមួយនឹងក្មួយៗ តាមអ្វីដែលយើងបាននិយាយគ្នាកាលពីមុនបោះឆ្នោត។ ពេលនោះ ពូនៅចាំបានថា ពូបាននិយាយទៅកាន់ក្មួយៗ កម្មករ/ការិនីនៅកន្លែងមួយចំនួនថា ប្រសិនបើគណបក្សប្រជាជនកម្ពុជាឈ្នះឆ្នោត គឺពូនឹងបន្តជួបជាមួយនឹងកម្មករ/ការិនីតទៅទៀត បន្ទាប់ពីការបោះឆ្នោតរួច។ ប្រសិនបើគណបក្សប្រជាជនកម្ពុជាមិនទទួលបានជោគជ័យក្នុងការបោះឆ្នោតទេ កម្មវិធីនោះ(ជួបកម្មករ)នឹងត្រូវបញ្ឈប់ដែរ ព្រោះវាជាកិច្ចការ នៃអនាគតរបស់នាយករដ្ឋមន្រ្តីក្រោយ។ ឥឡូវនេះ ទោះបីថា ការប្រកាសលទ្ធផលផ្លូវការ នឹងត្រូវរង់ចាំប៉ុន្មានម៉ោងទៀត បើយោងទៅលើការផ្ដល់ព័ត៌មានពីគណៈកម្មាធិការជាតិរៀបចំការបោះឆ្នោត ដែលជូនទៅបណ្ដាញប្រព័ន្ធផ្សព្វផ្សាយ ដូចជានៅម៉ោង ៧ កន្លះយប់នេះ ដែលនឹងប្រកាសលទ្ធផលផ្លូវការ(នៃការបោះឆ្នោត) ហើយក៏ប្រកាសចំនួនអាសនៈ និងប្រកាសបេក្ខជនជាប់ឆ្នោតសម្រាប់មុខតំណែងតំណាងរាស្រ្តផងដែរ។ គណបក្សប្រជាជននាំមុខ ហ៊ុន សែន នឹងជានាយករដ្ឋមន្ត្រីនៃរាជរដ្ឋាភិបាលថ្មី ទោះបីមិនទាន់ប្រកាសផ្លូវការក៏ដោយ ក៏ប៉ុន្តែគេអាចដឹងបានហើយថា គណបក្សប្រជាជនកម្ពុជាកំពុងនាំមុខនៅក្នុងការកាន់កាប់អាសន ៈនៅក្នុងសភា ហើយដែលឈានទៅបង្កើតរាជរដ្ឋាភិបាលថ្មី ក្នុងនោះ បេក្ខជនដែលត្រូវបានមហាសន្និបាទតំណាងទូទាំងប្រទេសរបស់គណបក្សប្រជាជនកម្ពុជាអនុម័ត គឺ ហ៊ុន សែន នេះជានាយករដ្ឋមន្រ្តីតទៀត។ ដូច្នេះហើយ បានជាចាប់តាំងពីក្រោយពេលបោះឆ្នោត រយៈពេល ៣ អាទិត្យ នេះជាអាទិត្យទី ៣ ក៏ជាវេទិកាទី ៣ ក្រោយពេលបោះឆ្នោតផងដែរ។ នេះហើយគឺជាចំណុចដែលពូធ្លាប់បាននិយាយកាលពីពេលមុន…
បុរសថ្ពាល់ផ្អែម ក្លាយជាបុរសថ្ពាល់ឈ្ងុយ ថ្ងៃនេះ ពូបានមកជួបជុំជាមួយក្មួយៗសាជាថ្មីម្ដងទៀត នៅខេត្តកំពង់ស្ពឺ។ ហើយឡើងបានមួយថ្នាក់នៅថ្ងៃនេះ ឡើងត្រង់ថា ពីបុរសថ្ពាល់ផ្អែម ទៅជាបុរសថ្ពាល់ឈ្ងុយ។ នៅត្រង់អញ្ចេះ ក្មួយៗនៅខាងណោះអម្បាញ់មិញ មានក្មួយៗម្នាក់បានថើបពូហើយថា ឈ្ងុយណាស់។ កាលពីមុន មានម្នាក់នោះ ថើបរួចហើយថា ផ្អែម។ អញ្ចឹងបានពូហៅខ្លួនឯងថា បុរសថ្ពាល់ផ្អែម។ ឥឡូវនេះ ក្លាយទៅជាបុរសថ្ពាល់ឈ្ងុយម្ដង។ ប៉ុន្តែសូមប្រាប់ថា អាឈ្ងុយហ្នឹង ក្លិនរបស់មីងទេ ព្រោះមីងថើបពូពីល្ងាច។ សូមនិយាយលេងបន្ដិចចុះ ដែលយើងបានជួបជុំគ្នានៅថ្ងៃនេះ។ ការជួបជុំជាមួយកម្មករ នៅតែបន្ត រហូតដល់ ១០ ឆ្នាំទៀត ដំបូង ខ្ញុំសុំសំដែងការស្វាគមន៍យ៉ាងកក់ក្ដៅចំពោះក្មួយៗជាកម្មករ/ការិនីទាំងអស់ ដែលបានអញ្ជើញមកជួបពូនៅថ្ងៃនេះ ហើយដែលយើងបាននិយាយគ្នាមុនហើយថា ពូនឹងវិលត្រឡប់មកខេត្តកំពង់ស្ពឺ។ ពូក៏នឹងធ្វើការជួបជាមួយនឹងកម្មករ/ការិនីជាបន្តទៀត។ ក្នុងរយៈពេលនៃយុទ្ធនាការឃោសនាបោះឆ្នោត (ពូបានអះអាងថា)ប្រសិនបើគណបក្សប្រជាជនកម្ពុជាឈ្នះ ដែលពូនឹងក្លាយទៅជាអនាគតនាយករដ្ឋមន្រ្តី ពូនឹងបន្តនៃការដើរជួប។ ប៉ុន្តែបើសិនជាគណបក្សប្រជាជនកម្ពុជាមិនឈ្នះឆ្នោតទេ ពូនឹងមិនទៅប្រជែងការងារជាមួយនឹងអនាគតនាយករដ្ឋមន្រ្តីនៃបក្សនយោបាយផ្សេងនោះទេ។ ប៉ុន្តែឥឡូវនេះ បើទោះបីជាលទ្ធផលផ្លូវការមិនទាន់បានប្រកាសក៏ដោយចុះ ក៏ប៉ុន្តែគេអាចដឹងបានថា គណបក្សប្រជាជនកម្ពុជាបានទទួលជោគជ័យ។ ដូច្នេះអាទិត្យមុននេះ ពូបានទៅជួបជុំជាមួយនឹងកម្មករ/ការិនីនៅឯទីក្រុងភ្នំពេញ។ ថ្ងៃនេះ ពូបានមកជួបជុំកម្មករ/ការិនីរបស់យើងនៅឯខេត្តកំពង់ស្ពឺ។ វិលជុំជួបកម្មករ/ការិនី ពិនិត្យដោះស្រាយបញ្ហាប្រឈមក្នុងវិស័យការងារ/ឧស្សាហកម្ម ពូនៅជំពាក់ខេត្តកំពង់ស្ពឺច្រើន។…
