Speech given by the Prime Minister on national and international occasions, review conference, etc. in English and in Khmer
គោលការណ៍គឺយើងយកវ៉ាក់សាំងមកស្រោច គ្រាន់(តែ)ថា វ៉ាក់សាំងរបស់យើង មកដល់មុនមកដល់ក្រោយ (រួម)នឹងវ៉ាក់សាំងមានក្នុងដៃ។ ខ្ញុំឯកភាពជាមួយនឹងការដែលយើងប្រមូលផ្តុំ(វ៉ាក់សាំង) ដែលមានក្នុងដៃស្រាប់ ដាក់ចូលទៅក្នុងតំបន់ដែលមានកងទ័ពធ្វើសកម្មភាពហ្នឹងតែម្តង។ បន្តិចទៀតខ្ញុំនឹង voice សម្លេងទាំងអស់ហ្នឹងទៅឲ្យ លោកជំទាវ ឱ វណ្ណឌីន ហើយទូរស័ព្ទប្រាប់គាត់។ ស្អែកនឹងវ៉ាក់សាំង(របស់)យើងមកដល់ថែមទៀត។ អញ្ចឹងទេ យើងបុកផ្តាច់ចំនួនប្រជាជនកម្មករស្អីៗនៅក្នុងហ្នឹង។ យើងមានប្រហែលជាមួយលាន(ដូស)ជាង។ អញ្ចឹង យើងចាក់បានប្រហែលជា ៥០ ម៉ឺននាក់។ (វ៉ាក់សាំង)វានឹងមកដល់ថ្មីថែមទៀត។ យើងត្រូវការចាក់។ តាមការប៉ាន់ស្មាន ភ្នំពេញ និងខេត្តកណ្តាលគឺ(មានប្រជាពលរដ្ឋ)ចំនួន ៣ លាននាក់។ បើ ៣ លាននាក់ យើងត្រូវការ ៦ លានដូស។ អញ្ចឹង កម្លាំងកងទ័ពត្រូវតែប្រមូលផ្តុំមក។ ខ្ញុំឯកភាព។ បន្តិចទៀតខ្ញុំប្រាប់ទៅលោកជំទាវ ឱ វណ្ណឌីន ឲ្យផ្តល់(ការចាក់វ៉ាក់សាំងដល់) ៤ ខណ្ឌហ្នឹង ហើយឲ្យកងទ័ពចូលធ្វើ។ កងទ័ពចូលធ្វើតែម្តង។ ចៀសវាងកុំឲ្យប្រជាជនចេញពីតំបន់ក្រហមមកចាក់ខាងក្រៅ (ក្រុមពេទ្យកងទ័ព)ចូលទៅរកទីតាំងក្នុងហ្នឹង … គឺថាទទួលយកភារកិច្ចពីគណៈកម្មការចំពោះកិច្ច ហើយកងទ័ពអនុវត្តតែម្តងទៅ។ ទទួលយកវ៉ាក់សាំងចាក់ជូនប្រជាជនក្នុងតំបន់ហ្នឹង ហើយពេលទទួលវ៉ាក់សាំងកុំខ្វល់ថាប្រជាជនមកពីត្រង់ណាអីត្រង់ណា ឲ្យតែមកយល់ព្រមចាក់គឺចាក់ឲ្យតែម្តង…
សម្តេច ឯកឧត្តម លោកជំទាវ ដែលជាឧបនាយករដ្ឋមន្រ្តី ក៏ដូចជាសមាជិករាជរដ្ឋាភិបាលបានជ្រាបដោយសារតែបញ្ហាកូវីដ-១៩ ក៏ដូចជាយើងកំពុងបិទទីក្រុងភ្នំពេញផង។ ការចេញដំណើររបស់ខ្ញុំលើកនេះចេញទៅក្រៅប្រទេសពុំមានការចាំបាច់ដើម្បីនឹងជូនដំណើរពីសម្តេច ឯកឧត្តម លោកជំទាវ ដែលជាឧបនាយករដ្ឋមន្រ្តីដូចពេលមុននោះទេ។ ខ្ញុំឲ្យពិធីការជូនដំណឹងទៅសម្តេច ឯកឧត្តម លោកជំទាវ ហើយខ្ញុំក៏ចង់ជម្រាបបន្ថែមថា ហេតុផលគឺងាយយល់គឺថាយើងកំពុងបិទទីក្រុងទី ១។ ទី ២ បញ្ហាកូវីដ-១៩ គឺជាបញ្ហាសំខាន់នៅត្រង់ថា ខ្ញុំធ្វើដំណើរទៅគឺត្រឡប់មកវិញគឺត្រូវធ្វើចត្តាឡីស័ក។ អញ្ចឹងប្រសិនបើសម្តេច ឯកឧត្តម លោកជំទាវ ទៅទទួលខ្ញុំក៏អាចនឹងធ្វើចត្តាឡីស័កដូចគ្នា ដូច្នេះធ្វើឲ្យកម្លាំងដឹកនាំនៅតាមស្ថាប័នរាជរដ្ឋាភិបាល នឹងជួបការលំបាកកាន់តែខ្លាំង។ អញ្ចឹងទេខ្ញុំទៅពេលព្រឹក ហើយយប់តាមអ្វីដែលជាព័ត៌មាននៃការប្រជុំអាចនឹងយប់បន្តិចខ្ទង់រំលងម៉ោង ៩យប់ គឺខ្ញុំនឹងត្រឡប់មកដល់ប្រទេសវិញ ហើយពេលមកដល់ប្រទេសគឺពុំមានការធ្វើសន្និសីទកាសែតដូចកាលពីពេលមុនដោយឯកឧត្តម កៅ គឹមហួន នោះទេ គឺពុំមានការធ្វើសន្និសីទសារព័ត៌មាននោះទេប៉ុន្តែជំនួសវិញដោយការយកសំណាកដើម្បីធ្វើតេស្តរកកូវីដ-១៩ ទៅវិញទេ។ ដូច្នេះហើយបានជាខ្ញុំស្នើដូរទម្រង់នៃការចាកចេញរបស់ខ្ញុំដោយគ្មានអ្នកជូន និងអ្នកទទួលដំណើរ ហើយការវិលត្រឡប់របស់ខ្ញុំ និងគណៈប្រតិភូក៏មិនចាំបាច់មានអ្នកជូនដំណើរ។ ដោយឡែកសម្រាប់ខាងផ្នែកពិធីការ ឬក៏អ្នកសារព័ត៌មានក៏ត្រូវនៅឲ្យឆ្ងាយៗដើម្បីចៀសវាងនូវបញ្ហាការជាប់ធ្វើចត្តាឡីស័ក ហើយការប្រើប្រាស់សំលៀកបំពាក់ ការថែទាំអនាម័យ ក៏ត្រូវតែបានធ្វើគ្រប់មនុស្សទាំងអស់ បើទោះបីថាជាគណៈប្រតិភូជាន់ខ្ពស់ទាំងមានរបៀបការពារខ្លួនក៏ដោយ ក៏ប៉ុន្តែយើងមិនប្រាកដថា ការការពារខ្លួនរបស់យើងអាចរួចផុតអំពីកូវីដ-១៩ ដែលយើងមើលមិនឃើញនោះទេ។ ដូច្នេះសុំសម្តេច ឯកឧត្តម លោកជំទាវ ជាឧបនាយករដ្ឋមន្រ្តីធ្លាប់ជូនដំណើរហើយជាទេសរដ្ឋមន្រ្តី ឬរដ្ឋមន្រ្តីមួយចំនួនធ្លាប់ជូនដំណើរគឺផ្អាកការជូនចុះ។…
ឯកឧត្តម លី ប៉ោទុង (Li Baodong) អគ្គលេខាធិការ នៃវេទិកាបូអាវសម្រាប់អាស៊ី; ឯកឧត្តម លោកជំទាវ ថ្នាក់ដឹកនាំប្រទេសទំាងអស់ ឯកឧត្តម លោកជំទាវ លោក លោកស្រី! ថ្ងៃនេះ ខ្ញុំមានសេចក្ដីរីករាយជាអនេក ដែលបានចូលរួមថ្លែងសុន្ទរកថា នៅក្នុងពិធីបើកវេទិកាបូអាវ សម្រាប់អាស៊ី ក្រោមប្រធានបទ «ពិភពលោកក្នុងការផ្លាស់ប្តូរ៖ រួមដៃគ្នាដើម្បីពង្រឹងអភិបាល កិច្ចសកល និងលើកកម្ពស់កិច្ចសហប្រតិបត្តិការខ្សែក្រវាត់ និងផ្លូវ» ។ ខ្ញុំក៏សូមអបអរសាទរចំពោះ ខួបគម្រប់ ២០ ឆ្នាំនៃការបង្កើតវេទិកា ដែលកន្លងមកបានចូលរួមចំណែកយ៉ាងសំខាន់ ក្នុងការជំរុញ កិច្ចសហប្រតិបត្តិការនយោបាយ សេដ្ឋកិច្ច-សង្គម វប្បធម៌ និងបរិស្ថាន ។ បច្ចុប្បន្ន ជំងឺកូវីដ-១៩ បានបន្តគំរាមកំហែងយ៉ាងធ្ងន់ធ្ងរដល់សុខភាពសាធារណសកល និងការអភិវឌ្ឍជារួម ។ ក្នុងបរិការណ៍នេះ គ្មានប្រទេសណាមួយមានសុវត្ថិភាពនោះទេ ដរាបណាប្រទេសទាំងអស់មិនមានសុវត្ថិភាព ។ ក្នុងន័យនេះ កម្ពុជាសូមវាយតម្លៃខ្ពស់ចំពោះការយកចិត្តទុកដាក់ខ្ពស់ និងការប្តេជ្ញាចិត្តរបស់ប្រទេសចិន ក្នុងការអនុវត្ត «ផ្លូវសូត្រសុខភាព» ក្រោមគំនិតផ្តួចផ្តើមខ្សែក្រវាត់ និង ផ្លូវ និងតួនាទីឈានមុខក្នុងការផ្តល់នូវថ្នាំពេទ្យ…
