មហាអំណាចចិន សម្រេចផ្តល់ជំនួយជិត ៦០០លានដុល្លារដល់កម្ពុជា និងប្រកាសបន្តនាំអង្ករពីកម្ពុជាទៅចិនឲ្យបាន ៤០ម៉ឺនតោន

តេជោ តាមរយៈសារព័ត៌មាន

FN ៖ ប្រធានាធិបតីចិនលោក ស៊ី ជីនពីង បានប្រកាសផ្តល់ជំនួយប្រមាណ ៤ពាន់លានយ័ន ស្មើនឹងជិត ៦០០លានដុល្លារអាមេរិកសម្រាប់អភិវឌ្ឍន៍នៅកម្ពុជាចាប់ពីឆ្នាំ២០១៩ ដល់ឆ្នាំ២០២១។ លោកប្រធានាធិបតី ក៏បានប្រកាសបន្តនាំអង្ករកម្ពុជាទៅកាន់ប្រទេសចិនឲ្យបាន ៤០ម៉ឺនតោននៅក្នុងឆ្នាំ២០១៩នេះ ដើម្បីរួមចំណែកជួយលើកកម្ពស់ជីវភាពរបស់ប្រជាកសិករកម្ពុជា។ ការប្រកាសរបស់លោកប្រធានាធិបតីចិន បានធ្វើឡើងនៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាក្នុងដំណើរបំពេញទស្សនកិច្ចនៅទីក្រុងប៉េកាំង ប្រទេសចិន នៅល្ងាចថ្ងៃទី២១ ខែមករា ឆ្នាំ២០១៩នេះ។ ក្នុងជំនួបនេះក្រៅពីការប្រកាសផ្តល់ជំនួយជិត ៦០០លានដុល្លារ និងទិញអង្ករកម្ពុជា ៤០ម៉ឺនតោនក្នុងមួយឆ្នាំទៅ លោក ស៊ី ជីនពីង ក៏បានប្រកាសខិតខំជំរុញទំហំពាណិជ្ជកម្មនៃប្រទេសទាំងពីរកើនដល់ ១០ពាន់លានដុល្លារនៅឆ្នាំ២០២៣ ហើយនឹងបន្តលើកទឹកចិត្តដល់អ្នកវិនិយោគចិន ឲ្យមកវិនិយោគនៅកម្ពុជាកាន់តែច្រើនថែមទៀត។

សម្តេចតេជោ ហ៊ុន សែន អនុញ្ញាតឲ្យប្រធានសមាគមមិត្តភាពចិន-កម្ពុជា និងរដ្ឋមន្ត្រីក្រសួងទំនាក់ទំនងអន្តរជាតិ នៃគណៈកម្មាធិការមជ្ឈឹមបក្សកុម្មុយនីស្តចិន ចូលជួបពិភាក្សា

តេជោ តាមរយៈសារព័ត៌មាន

FN ៖ ក្នុងដំណើរបំពេញទស្សនកិច្ចនៅក្នុងប្រទេសចិន នៅថ្ងៃទី២១ ខែមករា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏មានជំនួបដាច់ដោយឡែកពីគ្នាចំនួនពីរផ្សេងទៀត គឺជំនួបពិភាក្សាការងារជាមួយលោកស្រី Gu Xiulian ប្រធានសមាគមមិត្តភាពចិន-កម្ពុជា និង លោក សុង តាវ រដ្ឋមន្រ្តីក្រសួងទំនាក់ទំនងអន្តរជាតិ នៃគណះកម្មាធិការមជ្ឈឹមបក្សកុម្មុយនីស្តចិន។ ក្នុងឱកាសចូលជួបសម្តែងការគួរសម ក៏ដូចជាពិភាក្សាការងារជាមួយសម្តេចតេជោ ហ៊ុន សែន នោះ លោកស្រី Gu Xiulian មានថ្លែងអំណរគុណយ៉ាងជ្រាលជ្រៅជូនចំពោះសម្តេចតេជោ ហ៊ុន សែន នាយករដ្ឋមន្រ្តី ដែលបានអនុញ្ញាតឲ្យថ្នាក់ដឹកនាំ នៃសមាគមមិត្តភាពចិន-កម្ពុជា បានជួបសំណេះសំណាល នៅទីក្រុងប៉េកាំងប្រទេសចិន ក្នុងឱកាសដែលរូបសម្តេចអញ្ជើញទៅបំពេញទស្សនកិច្ចផ្លូវការដ៏មមាញឹកបំផុតនេះ។ លោកស្រីក៏បានជំរាបជូនសម្តេចតេជោនាយករដ្ឋមន្ត្រី ពីភាពរីកចម្រើនធំធាត់ពីមួយថ្ងៃទៅមួយថ្ងៃ បន្ទាប់ពីប្រទេសទាំងពីរចិន និងកម្ពុជា បានបង្កើតឡើងនូវ សមាគមមិត្តភាពចិន-កម្ពុជា កាលពីពេលកន្លងទៅ។ លោកស្រីក៏បានជំរាបជូនសម្តេចតេជោដែរថា សមាគមមិត្តភាពចិន-កម្ពុជា មានសមាជិកចូលរួមគឺជាអតីតមន្ត្រីការទូតរបស់ប្រទេសចិន ប្រចាំកម្ពុជា និងអ្នកមួយចំនួនទៀត ក៏ជាអ្នកធ្លាប់បំពេញការងារមនុស្សធម៌ក្នុងប្រទេសកម្ពុជា។ លោកស្រីក៏បានសំដែងនូវការអបអរសាទរ ជូនចំពោះគណបក្សប្រជាជនកម្ពុជា ដែលទទួលបានជ័យជម្នះភ្លូកទឹកភ្លូកដី ពីការបោះឆ្នោតសកលឆ្នាំ២០១៨កន្លងទៅ។…

សម្តេចតេជោ ហ៊ុន សែន គាំទ្រក្រុមហ៊ុនចិនមួយចង់សាងសង់ខ្សែកាបអុបទិចក្រោមបាតសមុទ្រពីហុងកុង មកកម្ពុជា

តេជោ តាមរយៈសារព័ត៌មាន

FN ៖ ក្រុមហ៊ុនដ៏ធំមួយរបស់ចិន បានបង្ហាញបំណងតភ្ជាប់ខ្សែកាបអុបទិចក្រុមបាតសមុទ្រពីទីក្រុងហុងកុង ប្រទេសចិន មកកាន់ប្រទេសកម្ពុជា ដើម្បីផ្តល់សេវាអ៉ីនធើណេតឲ្យមានល្បឿនកាន់តែលឿនថែមទៀត។ ការបង្ហាញពីគម្រោងសាងសង់ខ្សែកាបអុបទិចដោយបង្កប់ក្រោមបាតសមុទ្រពីហុងកុងមកកាន់ប្រទេសកម្ពុជានេះ បានធ្វើឡើងក្នុងពេលដែលថ្នាក់ដឹកនាំក្រុមហ៊ុនវិស្វកម្ម និងដែកថែមចិន ដឹកនាំដោយលោក ស៊ូ ស៊ីវេ (Xu Siwei) ប្រធានក្រុមប្រឹក្សាភិបាលក្រុមហ៊ុន អញ្ជើញចូលជួបសម្តែងការគួរសម និងពិភាក្សាការងារជាមួយសម្តេចតេជោនៅព្រឹកថ្ងៃទី២១ ខែមករា ឆ្នាំ២០១៩នេះ នៅទីក្រុងប៉េកាំង ប្រទេសចិន ទីដែលសម្តេចតេជោកំពុងបំពេញដំណើរទស្សនកិច្ច។ ក្នុងជំនួបជាមួយក្រុមហ៊ុនវិស្វកម្ម និងដែកថែម លោក ស៊ូ ស៊ីវេ បានបង្ហាញគម្រោងសាងសង់ខ្សែកាបអុបទិកក្រោមបាតសមុទ្រពីហុងកុង មកប្រទេសកម្ពុជា ដើម្បីប្រព័ន្ធអ៉ីនធើណែតរបស់កម្ពុជា កាន់តែមានល្បឿនលឿនជាងមុន។ សម្តេចតេជោនាយករដ្ឋមន្ត្រី បានឯកភាពទៅនឹងការស្នើសុំនោះ ដោយសារតែកម្ពុជា ទើបតែមានប្រព័ន្ធខ្សែកាបអុបទិកក្រោមបាតសមុទ្រតែមួយខ្សែតែប៉ុណ្ណោះ។ ក្នុងឱកាសនោះប្រធានក្រុមប្រឹក្សាភិបាលក្រុមហ៊ុន ក៏បានគោរពរាយការណ៍ជូនសម្តេចតេជោនាយករដ្ឋមន្ត្រី ពាក់ព័ន្ធគម្រោងដែលក្រុមហ៊ុនកំពុងអនុវត្តក្នុងប្រទេសកម្ពុជា។ ពិសេសទាក់ទិនទៅនឹងការផលិតវារីអគ្គិសនីដើរដោយធ្យូងថ្ម រួមទាំងការចាប់អារម្មណ៍ពីសំណាក់ក្រុមហ៊ុនលោកពាក់ព័ន្ធគម្រោងសាងសង់ហេដ្ឋារចនាសម្ព័ន្ធក្នុងប្រទេសកម្ពុជា ដោយឈរលើនយោបាយបើកចំហររបស់សម្តេចតេជោ និងរាជរដ្ឋាភិបាលកម្ពុជា ដែលស្វាគមន៍អ្នកវិនិយោគបរទេសទាំងអស់ ក្នុងការមកបណ្តាក់ទុនកសាង និងអភិវឌ្ឍន៍ប្រទេសកម្ពុជា៕