ក្នុងបទសម្ភាសន៍ដោយផ្ទាល់ និងផ្តាច់មុខជាមួយនាយកប្រតិបត្តិ Fresh News លោក លឹម ជាវុត្ថា នៅព្រឹកថ្ងៃទី ០៣ ខែ កញ្ញា ឆ្នាំ ២០១៨ នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រតិកម្មយ៉ាងខ្លាំងក្លា និងធ្ងន់ៗចំពោះអ្នកវិភាគ មាស នី ដែលចង់ឃើញមានការចរចាគ្នារវាងសម្តេចតេជោ ជាមួយទណ្ឌិត សម រង្ស៊ី និងបណ្តាប្រទេសនៅសហគមន៍អឺរ៉ុប ដើម្បីបញ្ចប់បញ្ហានយោបាយនៅកម្ពុជា។
សម្តេចតេជោ ហ៊ុន សែន បានបញ្ជាក់យ៉ាងច្បាស់ៗថា គ្មានការចរចាណាមួយរវាងសម្តេច និងទណ្ឌិត សម រង្ស៊ី នោះឡើយ ហើយកម្ពុជាក៏គ្មានវិបត្តិនយោបាយដូចការវិភាគរបស់លោក មាស នី នោះឡើយ។
ប្រតិកម្មរបស់សម្តេចតេជោ ហ៊ុន សែន បានធ្វើឡើងបន្ទាប់ពីលោក មាស នី តាមរយៈបទសម្ភាសន៍ជាមួយសារព័ត៌មានក្នុងស្រុកមួយ បានបង្ហាញការចង់ឃើញចរចារវាងសម្តេចតេជោ ហ៊ុន សែន និងទណ្ឌិត សម រង្ស៊ី ដើម្បីឈានទៅដោះស្រាយបញ្ហានៅក្នុងប្រទេសកម្ពុជា ក្នុងពេលសម្តេចធ្វើដំណើរទៅកាន់សហរដ្ឋអាមេរិក និងអឺរ៉ុបនាអំឡុងខែនេះ ឬខែក្រោយនោះ។
សម្តេចតេជោ ហ៊ុន សែន បានបញ្ជាក់ជាមួយសម្តីដាច់ណាត់ និងធ្ងន់ៗយ៉ាងដូច្នេះថា «គ្មានការចរចាណាមួយរវាងខ្ញុំ ជាមួយនឹងទណ្ឌិត សម រង្ស៊ី នោះឡើយក្នុងដំណើរទស្សនកិច្ចរបស់ខ្ញុំទៅក្រៅប្រទេស ទាំងអាមេរិក និងនៅអឺរ៉ុប។ ខ្ញុំសូមប្រាប់ថា កម្ពុជាគ្មានវិបត្តិនយោបាយដូចការវិភាគឆ្កួតលេលាដូច មាស នី នោះឡើយ មានតែអ្នកនយោបាយអនុវត្តទោសតាមច្បាប់របស់កម្ពុជាតែប៉ុណ្ណោះ»។
សម្តេចនាយករដ្ឋមន្ត្រី ក៏បានផ្តាំទៅ លោក មាស នី ឲ្យឈប់ធ្វើការវិភាគទៅទៀត បើមិនយល់ពីបញ្ហានយោបាយទេនោះ។ សម្តេចតេជោ បានផ្តាំយ៉ាងដូច្នេះ «មាស នី បើឆ្កួត ឆ្កួតតែឯងទៅ កុំមកនាំគេឆ្កួតជាមួយ។ បើ មាស នី ឯងល្ងង់មិនយល់ផ្នែកនយោបាយទេ កុំមកធ្វើជាអ្នកវិភាគបន្តទៅទៀត»។
សូមបញ្ជាក់ថា ក្នុងមួយរយៈពេលចុងក្រោយនេះ ស្ថានការណ៍នយោបាយនៅកម្ពុជាត្រូវបានគេមើលឃើញមានភាពល្អប្រសើរ បន្ទាប់ពីអ្នកនយោបាយ សកម្មជននយោបាយ និងសកម្មជនដីធ្លីផង ត្រូវបានសម្តេចតេជោ ហ៊ុន សែន ទូលថ្វាយព្រះមហាក្សត្រខ្មែរ សុំព្រះរាជទានលើកលែងទោសជាបន្តបន្ទាប់។ ការទូលថ្វាយសុំព្រះរាជទានលើកលែងទោសបានធ្វើឡើងបន្ទាប់ពីអ្នកទោសទាំងនោះ បានទទួលស្គាល់ទោសកំហុសរបស់ខ្លួន និងបានសុំការយោគយល់អធ្យាស្រ័យពីសម្តេចតេជោ ហ៊ុន សែន។
ការទូលថ្វាយសុំព្រះរាជទានលើកលែងទោសនេះ ត្រូវបានគេពណ៌នាថា ធ្វើឡើងក្រោមស្មារតីនៃការបង្រួបបង្រួមជាតិ ដូចអ្វីដែលសម្តេចតេជោ ហ៊ុន សែន ធ្លាប់បានធ្វើជាមួយខ្មែរគ្រប់ភាគី ជាពិសេសជាមួយក្រុមខ្មែរក្រហមកាលពី ២០ ឆ្នាំមុន ដើម្បីនាំមកនូវសុខសន្តិភាព និងភាពសុខដុមក្នុងសង្គមកម្ពុជា ពោលមិនមែនជាការធ្វើឡើងតាមគំនាប និងសម្ពាធពីបរទេសណាមួយនោះឡើយ។
បើទោះបីជាយ៉ាងណា សម្តេចតេជោ ហ៊ុន សែន ធ្លាប់បានបញ្ជាក់ហើយថា នឹងគ្មានការលើកលែងទោសសម្រាប់ លោក កឹម សុខា និងទណ្ឌិត សម រង្ស៊ី អ្នកនយោបាយមានរហស្សនាមជនកំសាក ដែលកំពុងរត់គេចខ្លួននៅក្រៅប្រទេសនោះឡើយ។
នៅក្នុងខែកញ្ញា និងខែតុលាខាងមុខនេះ សម្តេចតេជោ ហ៊ុន សែន នឹងមានភារកិច្ចជាច្រើនចេញទៅចូលរួមកិច្ចប្រជុំនៅអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក និងកិច្ចប្រជុំមួយចំនួនទៀតអឺរ៉ុបផងដែរ។ តាមរយៈកិច្ចប្រជុំទាំងនេះ ជាពេលដែលសម្តេចនឹងបង្ហាញមុខរបស់រាជរដ្ឋាភិបាលអាណត្តិថ្មី និងជាការស្វែងរកកិច្ចសហការ ដើម្បីកិច្ចអភិវឌ្ឍន៍នៅកម្ពុជាបន្តទៅទៀតផងដែរ។ តែសម្តេចតេជោ បានអះអាងហើយថា នឹងគ្មានរបៀបវារៈចរចារឿងនយោបាយណាមួយជាមួយក្រុមក្បត់ជាតិ ក្នុងអំឡុងទៅកាន់ក្រៅប្រទេសនោះឡើយ៕
កម្ពុជាទស្សនៈថ្មី
ក.ទ.ថ.
