សំណើធំៗចំនួន៣ ត្រូវបានសម្តេចតេជោ ដាក់ទៅកាន់អគ្គលេខា UN, សម្តេចសម្រេចឲ្យការិយាល័យសិទ្ធិមនុស្ស UN មានវត្តមាននៅកម្ពុជា២ឆ្នាំទៀត
FN ៖ សំណើធំចំនួន៣ ត្រូវបានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដាក់ទៅកាន់អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូតេរ៉េស (Antonio Guterres) នៅក្នុងជំនួបពិភាក្សាការងារនាទីក្រុងញូវយ៉ក់ សហរដ្ឋអាមេរិក នៅរសៀលថ្ងៃទី២៨ ខែកញ្ញា ឆ្នាំ២០១៨ ម៉ោងនៅញូវយ៉ក សហរដ្ឋអាមេរិក។ សំណើទាំង៣ ដែលត្រូវបានលើកឡើងនៅក្នុងជំនួបនោះរួមមាន៖ ១. បញ្ហាការិយាល័យអង្គការសិទ្ធិមនុស្សរបស់អង្គការសហប្រជាជាតិនៅក្នុងប្រទេសកម្ពុជា, ២. កិច្ចសហប្រតិបត្តិការរវាងកម្ពុជា និងអង្គការសហប្រជាជាតិស្តីពីសាលាក្តីខ្មែរក្រហម និងទី៣. ការបញ្ជូនកងកម្លាំងរក្សាសន្តិភាព។ ពាក់ព័ន្ធបញ្ហាការិយាល័យអង្គការសិទ្ធិមនុស្សរបស់អង្គការសហប្រជាជាតិ ដែលត្រូវផុតកិច្ចព្រមព្រៀងនៅឆ្នាំ២០១៨នេះ, សម្តេចតេជោ ហ៊ុន សែន បានសម្រេចអាណត្តិឲ្យរយៈពេលពីរឆ្នាំបន្តទៀត ហើយនៅក្នុងខែតុលាខាងមុខ ពេលសម្តេចអញ្ជើញទៅបំពេញទស្សនកិច្ចនៅទីក្រុងហ្សឺណែវ នឹងមានការចុះហត្ថលេខារវាងឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេសកម្ពុជា ជាមួយនិងតំណាងស្នងការសិទ្ធិមនុស្សអង្គការសហប្រជាជាតិ។ សម្រាប់បញ្ហាទី២. សម្តេចតេជោ បានបញ្ជាក់ថា កម្ពុជានៅបន្តផ្តល់ថវិកាលើការចំណាយសម្រាប់ប្រាក់ខែរបស់មន្ត្រី និងបុគ្គលិកបម្រើការនៅសាលាក្តីខ្មែរក្រហម។ ដោយឡែកបញ្ហាទី៣វិញ គឺរាជរដ្ឋាភិបាលកម្ពុជានឹងបន្តចូលរួមឲ្យកាន់តែសកម្មថែមទៀត លើបេសកកម្ម នៃការថែរក្សាសន្តិភាពរបស់អង្គការសហប្រជាជាតិ។ ពោលបើប្រទេសណាត្រូវការកងទ័ពមួកខៀវរបស់កម្ពុជា ចូលរួមបំពេញបេសកកម្មមនុស្សធម៌ ក្រោមឆ័ត្ររបស់អង្គការសហប្រជាជាតិ គឺកម្ពុជានឹងបញ្ជូនបន្ថែមទៀត។ ជាការឆ្លើយតបអគ្គលេខាធិការអង្គការសហប្រជាជាតិ…