តាមទំព័រហ្វេសប៊ុកសម្តេចតេជោ ហ៊ុន សែន ល្ងាចថ្ងៃ ទី ២១ ខែ មិថុនា ឆ្នាំ ២០១៦ និស្សិតចំនួន ៣៩ នាក់ ថ្នាក់ឯកទេសនៃសាកលវិទ្យាល័យវិទ្យាសាស្រ្តសុខាភិបាល ដែលជាប់ចំណាត់ថ្នាក់លេខ ១ ហើយដែលត្រូវរៀនក្នុងឆ្នាំសិក្សា ២០១៥ ដល់ ២០១៨ និងឆ្នាំសិក្សា ២០១៦ ដល់ ២០១៩ ត្រូវបានសម្តេច និងភរិយា ព្រមទាំងក្រុមគ្រួសារ ផ្តល់អាហារូបករណ៍ ក្នុងម្នាក់ៗ ៣០០០ ដុល្លារសហរដ្ឋអាមេរិក។ សម្តេចតេជោ សរសេរថា នៅចំពោះមុខ កម្ពុជាយើងមានឯកទេស ២០ ដែលជាតម្រូវការរបស់ប្រទេស។ ដូច្នេះ សូមក្មួយៗ ខិតខំសិក្សាឲ្យបានល្អ។ សម្តេចតេជោ និងភរិយា សង្ឃឹមថា ឪពុកម្តាយ និងអាណាព្យាបាលរបស់និស្សិតទាំងអស់ នឹងបានធូរស្រាលមួយកម្រិតពីការព្រួយបារម្ភក្នុងការរកថវិកាបង់ថ្លៃសាលា។ សម្តេចតេជោ បានដាស់តឿន អោយនិស្សិតទាំងអស់ ចៀសឲ្យឆ្ងាយពីល្បែងពាលាអាវ៉ាសែ និងអំពើអបាយមុខគ្រប់យ៉ាង ដើម្បីការសិក្សា និងអនាគត។
សម្តេចតេជោ បានធ្វើការប្រៀបធៀបថា ក្នុងពេលម៉ោងនេះ ថ្ងៃនេះ កាលពី ៣៩ ឆ្នាំមុន សម្តេច កំពុងដឹកនាំទ័ពវាយផ្តួលរំលំ ប៉ុល ពត ទាំងវ័យជាយុវជន ផ្ទុយទៅវិញ ពេលនេះ សម្តេច កំពុងផ្តល់អាហារូបករណ៍ដល់ក្មួយៗ និស្សិត ដើម្បីបន្តការសិក្សាសម្រាប់អនាគតវែងឆ្ងាយ។ សម្តេចតេជោ បានក្រើនរំលឹកដល់និស្សិតទទួលអាហារូបករណ៍សម្តេចតេជោទាំងអស់ថា អ្នកទាំងអស់ពិតជាមានសំណាង ព្រោះពេលនេះ កម្ពុជាមានសុខសន្តិភាពពេញលេញ ធ្វើអោយមានឱកាសកាន់តែច្រើន ក្នុងការសិក្សារៀនសូត្របានជ្រៅជ្រះ និងបានសម្តេចផ្ញើនូវក្តីសង្ឃឹមថា និស្សិតទាំងអស់នឹងមានអនាគតល្អគ្រប់ៗគ្នា៕
