FN ៖ កុំព្យូទ័រយួរដៃ (computer laptop) ចំនួន៥៤គ្រឿង ព្រមទាំងថវិកា ជារង្វាន់របស់លោកបណ្ឌិត ហ៊ុន ម៉ាណែត ត្រូវបានលោកបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ នាំយកទៅផ្តល់ជូនសិស្សានុសិស្សប្រលងជាប់សញ្ញាបត្រទុតិយភូមិ (បាក់ឌុប) និទ្ទេស A ទាំង៥៤នាក់ ក្នុងឆ្នាំសិក្សា២០២០-២០២១។
នេះជាការលើកទឹកចិត្តដល់សិស្សានុសិស្ស ដែលខិតខំសិក្សា ប្រលងជាប់ទទួលបាននិទ្ទេសល្អ ក្នុងចំណោមសិស្សដែលប្រលងជាប់ជាស្ថាពរសរុប ២៩៤៤នាក់ ក្នុងខេត្តត្បូងឃ្មុំទាំងមូល បើទោះបីជាស្ថិតក្នុងការលំបាកសិក្សារៀនសូត្រ ក្នុងបរិបទឆ្លងរីករាលដាលជំងឺកូវីដ១៩ ជាសកលនេះ។
ក្នុងឱកាសសំណេះសំណាលផ្តល់រង្វាន់ និងថវិកាលើកទឹកចិត្ត នាព្រឹកថ្ងៃទី២៤ ខែមករា ឆ្នាំ២០២២ នៅសាលាខេត្តត្បូងឃ្មុំ លោកបណ្ឌិត ជាម ច័ន្ទសោភ័ណ ក៏បានចែកថវិកា ដល់លោកគ្រូអ្នកគ្រូ និងអាណាព្យាបាលសិស្ស ដែលខិតខំបង្ហាត់បង្រៀន អប់រំទូន្មានណែនាំ រហូតទទួលបានលទ្ធផលផ្លែផ្កាដ៏ល្អនាពេលនេះផងដែរ។
លោកអភិបាលខេត្ត បានពាំនាំការផ្តាំផ្ញើសួរសុខទុក្ខ កោតសរសើរសិស្សានុសិស្សទាំង ៥៤រូប និងលោកគ្រូអ្នកគ្រូ ព្រមទាំងអាណាព្យាបាលសិស្ស ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ជាពិសេសលោកបណ្ឌិត ហ៊ុន ម៉ាណែត ដែលជាបេក្ខភាពនាយករដ្ឋមន្ត្រីដ៏សាកសមបំផុត មានទាំងចំណេះដឹងខ្ពង់ខ្ពស់ បុគ្គលិកលក្ខណៈល្អឥតខ្ចោះ មានសុជីវធម៌ គុណធម៌ និងប្រជាប្រិយភាពគ្រប់ស្រទាប់វណ្ណៈនៃពលរដ្ឋកម្ពុជា ទាំងក្នុងនិងក្រៅប្រទេស។
ជាមួយនឹងការជួបសំណេះសំណាល និងផ្តល់រង្វាន់លើកទឹកចិត្តនេះ លោកបណ្ឌិត ជាម ច័ន្ទសោភ័ណ គូសបញ្ជាក់ថា យុវជនសម័យតេជោ ពិតជាមានសំណាង ដែលមានឱកាសសិក្សារៀនសូត្រយ៉ាងទូលំទូលាយ ដើម្បីយកចំណេះដឹងទៅអភិវឌ្ឍខ្លួនឯង គ្រួសារ និងសង្គមជាតិទាំងមូល។
លោកបន្តថា ដោយអនុវត្តតាមគោលនយោបាយឈ្នះឈ្នះ របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំបានធ្វើឲ្យកម្ពុជា មានសុខសន្តិភាព ស្ថិរភាពនយោបាយ មានការអភិវឌ្ឍរីកចម្រើន លើគ្រប់វិស័យ ទើបប្រជាពលរដ្ឋមានឱកាសគ្រប់បែបយ៉ាង ក្នុងការរស់នៅប្រកបរបរទទួលទានចិញ្ចឹមជីវិត ពិសេសគឺមានឱកាសឲ្យកូនៗ ដែលជាទំពាំងស្នងឫស្សីបានរៀនសូត្រ និងឱកាសការងារយ៉ាងច្រើនរង់ចាំពួកគាត់ទៅបំពេញ។
លោក ជាម ច័ន្ទសោភ័ណ បន្ថែមថា «ដូចនេះយើងត្រូវរួមគ្នា ថែរក្សាសុខសន្តិភាពនេះឲ្យបានដាច់ខាត ដោយមិនត្រូវឲ្យជនអគតិណាមួយមកបំផ្លាញបានឡើយ»។
ជាមួយគ្នានោះ លោកអភិបាលខេត្ត ក៏បានជំរុញឲ្យសិស្សានុសិស្ស យកសម្ភារៈសិក្សា និងថវិកាដែលផ្តល់ជូន ទៅប្រើប្រាស់ឲ្យចំគោលដៅ ខិតខំប្រឹងប្រែងរៀនសូត្របន្ត នាថ្នាក់ឧត្តមសិក្សា ពិសេសសិស្សានុសិស្សថ្នាក់វិទ្យាល័យនាជំនាន់ក្រោយៗទៀត ខិតខំប្រឹងប្រែងសិក្សាដើម្បីទទួលបានការលើកទឹកចិត្តដូចគ្នាបែបនេះ ពិសេសត្រូវចង់ចាំថា ចំណេះវិជ្ជាជាស្ពានឈានទៅរកជោគជ័យនិងកិត្តិយស សម្រាប់ខ្លួនឯង ក្រុមគ្រួសារ និងសង្គមជាតិយើងទាំងមូល ដែលកំពុងត្រូវការធនធានមនុស្សជាចាំបាច់ នាសព្វថ្ងៃនេះក្នុងការបន្តអភិឌ្ឍប្រទេស៕
